;
གསར་འཕྲིན།

2016/07/17

སེར་བྱེས་མཁན་རབས་དོན་དྲུག་པ་རྗེ་བཙུན་དགེ་འདུན་ཆོས་འཕེལ་གྱི་རྣམ་ཐར་རགས་བསྡུས།

 
སེར་བྱེས་མཁན་རབས་དོན་དྲུག་པ་རྗེ་བཙུན་དགེ་འདུན་ཆོས་འཕེལ་གྱི་རྣམ་ཐར་རགས་བསྡུས།

སེར་བྱེས་ཏྲེ་ཧོར་རྗེ་བཙུན་དགེ་འདུན་ཆོས་འཕེལ་མཆོག་ནི་ཕྱི་ལོ་1941ལོར་ཏྲེ་ཧོར་དཀར་མཛེས་གྲོང་ཁྱེར་གྱི་ཉེ་འདབས་སུ་ཆགས་པའི་སུ་ངོ་ཞེས་པའི་གྲོོང་ཚོ་ཞིག་ཏུ་ཡབ་ཨ་དགའ་དང་ཡུམ་བསོད་ནམས་སྒྲོལ་མ་གཉིས་སུ་སྐུ་འཁྲུངས། དགུང་ལོ་བརྒྱད་ལོན་པ་ན་དཀར་མཛེས་དགོན་དུ་ཆོས་བཞུགས་གནང་ཞིང་དགོན་དུ་ལོ་ཤས་བཞུགས་རྗེས་གྲྭ་སར་ཕེབས། ཕྱི་ལོ་1955ལོར་གདན་ས་ཆེན་པོ་སེ་ར་དགོན་དུ་ཕེབས་གནང་གིས་བྱེས་མཁས་སྙན་གྲྭ་ཚང་དུ་གསར་ཞུགས་བྱས་ཏེ་རྒན་བསྟན་པ་ཉིི་མ་ཁག་ཐེག་དགེ་རྒན་དུ་བསྟེན་པར་གནང་། སྦས་པའི་རྣམ་འབྱོར་པ་ཆེན་པོ་རྒན་བློ་དགའ་མཆོག་དང་བྱེས་མཁས་སྙན་གྲྭ་ཚང་གི་མཁས་པའི་གཙུག་རྒྱན་རྒན་རིན་པོ་ཆེ་དགེ་བཤེས་བློ་བཟང་དབང་ཕྱུག་(སེར་བྱེས་མཁན་རབས་རེ་དྲུག་པ)ཅེས་གྲགས་པའི་སྙན་པ་ས་སྟེང་དུ་ཁྱབ་པའི་དམ་པ་གང་དེའི་ཞབས་རྡུལ་སྤྱི་བོས་བླངས་ཏེ་འགོ་བསྡུས་གྲྭ་ནས་བཟུང་གཞུང་ཆེན་ཁག་ལེགས་གཟིགས་གནང། དུས་འགྱུར་སྐབས་སྦག་ས་ཆོས་སྒ་དང་བྱེས་ཀྱི་སེ་ར་དགོན་དུ་རིམ་བཞིན་སློབ་གཉེར་འཕྲོ་སྐྱོང་གནང་།
ང་རང་གསར་བཞུགས་བྱས་ཏེ་ཐོག་མའི་དཔེ་ཁྲིད་ཞུས་པ་ནས་ད་བར་རྒན་ཁོང་གི་མདུན་དུ་དཔེ་ཁྲིད་དང་འཆད་ཁྲིད་དབང་གནང་ལུང་མན་ངག་སོགས་ཞུ་སྐལ་ཐོབ་ཅིང་། རྒན་ཁོང་གི་སྐུ་ཡོན་དང་དགོངས་པ་བཞེས་ཕྱོགས་སོགས་མི་ཉུང་བ་ཞིག་མཐོང་ཐོས་བྱུང་་ཡོད། དུས་རྒྱུན་གདན་སའི་གསར་བུ་བ་ཚོ་ལ་དཔེ་ཁྲིད་གནང་དུས་ཉིན་ཡ་ལ་དཔེ་ཁྲིད་དང་ཉིན་ཡར་བསླབ་བྱ་གནང་གི་ཡོད་ཅིང་། དཔེ་ཆ་ཁྲིད་དུས་ཀྱང་བཤད་པ་གཅིག་པོ་མིན་པར་རྟག་ཏུ་བསླབ་བྱ་དང་འབྲེལ་ནས་གསུངས་གནང་གི་ཡོད།
རྒན་ཁོང་ཉིད་བོད་ཀྱི་རྒྱལ་རབས་དང་ལོ་རྒྱུས། དམ་པ་ཚོའི་རྣམ་ཐར་སོགས་ཀློག་རྒྱུར་མཉེས་པོར་ཡོད་སྟབས་སྐབས་རེ་འདས་པའི་ལོ་རྒྱུས་ཀྱི་ཆགས་འཇིག་དང་སླད་མ་འོངས་བྱེད་འཆར་ཅི་དགོས་ཀྱང་ཁ་གསལ་གནད་ལ་ཁེལ་བའི་བཀའ་སློབ་ཡང་ཡང་གནང་གི་ཡོད། བཀའ་སློབ་དང་གསུང་བཤད་ཅི་འདྲ་ཞིག་གནང་རུང་རྙིང་ཞེན་དང་ཨུ་ཚུགས་མི་གནང་བར་ཐུགས་བབ་ཡངས་པོ་དང་གཟིགས་རྒྱ་ཆེན་པོས་དོན་དངོས་དང་མཐུན་པ་ཞེ་ཅིག་གནང་གིན་ཡོད་པས་གདན་སའི་བགྲེས་སོང་ཚོའི་གྲས་ན་དུས་དང་མཐུན་པ། གུ་ཡངས་དང་གཟིགས་རྒྱ་ཆེ་བ་དེ་ལྟ་བུ་རེ་ཨེ་ཡོད་སྙམ་པ་དྲན་མྱོང་། མཐུན་རྐྱེན་གང་འདྲ་ཞིག་འཛོམས་ནས་དེ་ལྟར་ཆགས་པ་ཡིན་མིན་ཁ་གསལ་ཞིག་མ་ཤེས་རུང་། ངས་བསམ་ཚོད་ལ་རྒན་ཁོང་དཔེ་དེབ་ཀློག་རྒྱུར་ཧ་ཅང་མཉེས་ཤིང་དཔེ་དེབ་སྣ་ཚོགས་གཟིགས་པའི་རྐྱེན་གྱིས་མིན་ནམ་སྙམ། ཐེངས་ཤིག་ལ་དགེ་ཕྲུག་ཅིག་གིས་དཔེ་དེབ་ལེགས་པོ་ཞིག་གཟིགས་འབུལ་ཆེད་རྒན་གྱི་སྐུ་ཚ་དེ་ལ་སྤྲོད་འདུག སྐུ་ཚ་དེས་དོ་ནུབ་དཔེ་དེབ་འདི་རྒན་ལ་འབུལ་རྒྱུ་མིན། དཔེ་དེབ་འདི་བཀླགས་ནས་མ་གཟིམ་པར་ཕྱི་པོར་བཞུགས་ཀྱི་རེད་ཅེས་བཤད་འདུག
ན་ནིང་ད་ལོ་གདན་སའི་སྐྱེས་ཆེན་མང་པོ་ཞིག་དགོངས་པ་གཞན་དོན་དུ་བཤེགས་ཏེ་དབང་ལུང་མན་ངག་གནང་མཁན་ཡང་དཀོན་ཙམ་གྱུར་ཡོད་སྟབས། གཞི་ནས་རྒན་ཁོང་གི་དབང་ལུང་མན་ངག་སྩོལ་རྒྱུར་ཞལ་བཞེས་གནང་བ་ལས། དེ་སྔ་ཡིན་ན་དཔེ་ཁྲིད་ཤ་སྟག་གནང་བཞིན་བཞུགས་པ་ལས་དབང་ལུང་གནང་རྒྱུ་ཞལ་བཞེས་གནང་གི་མེད། དེ་སྔར་དགེ་ཕྲུག་ཅིག་གིས་རྡོ་རྗེ་འཇིགས་བྱེད་ཀྱི་དབང་ཞུ་ཆེད་གསོལ་འདེབས་ཞུས་དུས། རྒན་ཁོང་གིས་ཟམ་པ་ལྟག་ཏུ་བཞག་སྟེ་ཆུ་རག་འོག་ནས་རྒྱག་ན་མི་འགྲིག ད་ལྟ་སྐྱབས་རྗེ་ཆོས་ལྡན་རིན་པོ་ཆེ་སོགས་བཞུགས་མུས་ཡིན་སྟབས་ཁོང་རྣམ་པར་ཞུས་ན་ཡག་ཚུལ་གྱི་བཀའ་སློབ་ཕེབས་ནས་ཞལ་བཞེས་གནང་མི་འདུག
ཟམ་གདོང་རིན་པོ་ཆེས་སེ་རར་གསུང་ཆོས་གནང་གཏན་ཁེལ་བ་རྒན་ཁོང་གིས་གསན་རྗེས། བུམ་པ་མགོ་ཐོག་བཞག་ནས་བྱིན་རླབས་ཐོབ་མིན་མི་ཤེས། བྱིན་རླབས་ཞེས་པ་ནི་མཁས་པ་ཚོའི་ལེགས་བཤད་ཉན་ནས་བློ་སྐྱེད་ཐོབ་པ་འདི་རང་ཡིན་ཞེས་ཟམ་གདོང་རིན་པོ་ཆེའི་གསུང་ཆོས་ལ་འགྲོ་ཐུབ་ན་བློ་སྐྱེད་ཧ་ཅང་ཆེན་པོ་ཡོད་ཚུལ་གསུངས་ཏེ་རྒན་ཁོང་ཉིད་ཀྱང་གསུང་ཆོས་སུ་ཕེབས་གནང་འདུག
སྔ་ལོ་སྔ་ལོ་ཞིག་ཏུ་དགེ་སྐོས་ཤིག་གིས་རྒན་རིན་པོ་ཆེ་ལ་ཆོས་རྭའི་ནང་དུ་སློབ་གཉེར་བ་དག་ལ་བཀའ་སློབ་གནང་དགོས་ཚུལ་གྱི་བཀའ་ཕེབས་བྱུང་རྗེས། བཀའ་ནན་མ་ཆོག་པར་དགེ་འདུན་འདུས་པ་རྒྱ་མཚོ་ལ་རྒན་ཁོང་གི་དགོངས་ཚུལ་ཅི་ཡོད་གསུང་གནང་སོང་། སྐབས་དེར་ད་ཡོད་ཀྱི་གདན་སའི་དཔེ་ཁྲིད་གནང་སྟངས་འདིར་འགྱུར་བ་ཞིག་བྱུང་ན་ཡག་ཚུལ་གྱི་བཀའ་སློབ་ཕེབས་ཤིང་། རྒན་རང་ཉིད་དཔེ་ཁྲིད་དགེ་རྒན་ཞིག་ཡིན་སྟབས་ཞོགས་པ་ནས་དགོང་མོའི་བར་འཛིན་གྲྭ་ཧ་ཅང་མང་པོ་ཞིག་ལ་གཞུང་ཆ་ཚང་ཁྲིད་དགོས་དུས་དགེ་རྒན་ཚོས་ཁྲིད་བྱའི་སློབ་ཚན་ཁག་གྲ་སྒྲིག་ལེགས་པོར་བྱེད་ཁོམ་མེད་པས་སློབ་ཁྲིད་སྐབས་ཇི་བཞིན་ཁྲིད་མ་ཐུབ་པའི་སྐྱོན་གནས་འབྱུང་ཉེ་ཆེ་ཚུལ། དེ་ལས་ཕར་ཕྱིན་དང་དབུ་མ་སོགས་གཞུང་ཆེན་ཁག་ཁྱད་ལས་ལྟ་བུས་གཞུང་གཅིག་རང་ཁྲིད་ཐུབ་མཁན་ཞིག་བྱུང་ན་སློབ་མ་ཚོ་ལ་བློ་སྐྱེད་ཆེ་བ་ཡོང་ཚུལ་སོགས་ཀྱི་གལ་འགངས་ཆེ་བའི་བཀའ་སློབ་ནན་པོར་གནང་། (བཀའ་སློབ་འདི་ཡིག་ཐོག་ཕབ་བཞིན་འདུག་པས་མི་རིང་བར་དྲ་གྲོགས་ཚོས་སྤྱན་གཟིགས་གནང་ཐུབ་སྲིད།) དུས་སྐབས་དེ་འདྲ་ལ་དེ་ལྟ་བུའི་དགོངས་པ་བཞེས་ཐུབ་མཁན་ཡང་དཀོན་ཙམ་ཡིན་ལ་སྐབས་དེ་ཤད་ནས་བཟུང་རྒན་ཁོང་གིས་ཉིན་རྒྱུན་སློབ་ཚན་ཆ་ཚང་ཁྲིད་རྒྱུ་མཚམས་བཞག་ནས་གལ་ཆེའི་གཞུང་ལུགས་མང་པོ་ཞིག་ཆེད་དུ་ཟླ་ངོ་མང་པོར་དཔེ་གཟིགས་གནང་རྗེས་འཆད་ཁྲིད་བྱེད་འགོ་བཙུགས་ཡོད། ཕར་ཕྱིན་གཟིགས་མཁན་ལས་དང་པོ་བ་ཚོར་དམིགས་ཏེ་རྗེ་བཙུན་ཆོས་ཀྱི་རྒྱལ་མཚན་གྱིས་མཛད་པའི་ཕར་ཕྱིན་སྐབས་དང་པོ་ཆ་ཚང་། དབུ་མ་གཟིགས་མཁན་ལས་དང་པོ་བ་དག་ལ་དམིགས་ཏེ་དབུ་མའི་སྤྱི་དོན་འཆད་ཁྲིད། རྗེའི་ལྟ་བའི་ལེགས་བཤད་ཆེན་པོ་ལྔ་ཁྲིད་རྒྱུ་དགོངས་བཞེས་ཀྱིས། ལྷག་མཐོང་ཆེན་མོ་ཆ་ཚང་འཆད་ཁྲིད། རྩ་ཤེར་ཊིཀ་ཆེན། དབུ་མ་དགོངས་པ་རབ་གསལ། ལེགས་བཤད་སྙིང་པོ་དབུ་མའི་སྐོར་ཆ་ཚང་འཆད་ཁྲིད་(འདི་མཇུག་མ་རྫོགས།)
སློབ་གཉེར་བ་དག་ལ་རྒྱུན་དུ་གཞུང་ཆེན་གཟིགས་དུས་རྩོད་རྒྱུ་ཞིག་དང་ལུང་འགལ་ཞིག་ག་འདུག་བལྟས་ཏེ་དཔེ་ཆ་ལྟ་བའི་གོམས་གཤིས་དེ་འཇག་མི་རུང་། གཞུང་གི་ཁོག་ལོན་པར་བྱས་ཏེ་དོན་ཇི་བཞིན་ཤེས་ཐབས་བྱེད་དགོས། གཞུང་མཁྲེགས་པོ་ཞིག་མདུན་དུ་བཞག་དུས་བཤད་ཐུབ་པ་ཞིག་ཡིན་ན་དཔེ་ཆ་ཤེས་པ་རེད་ཅེས་ཡང་ཡང་ནན་གསུང་གནང། ཚིག་གི་གོ་དོན་། དོན་གྱི་ཞིབ་ཆ། རང་གི་འཛིན་མཚམས་སོགས་ཀྱི་རྨང་གཞི་ལེགས་པོ་ཞིག་མེད་ཕྱིན་རང་ལུགས་གཏོད་སོ་མེད་པར་ཆགས་ཉེ་ཆེ་ཚུལ་དང་། ཡང་ནས་ཡང་དུ་དཔེ་ཆ་དང་འདྲིས་པར་བྱས་ན་ཤེས་ནས་དད་པ་ཐོབ་པ་ཞིག་ཡོང་རྒྱུ་ཡོད་ཅེས་གདམ་པར་མཛད།
རྒན་ཁོང་གི་སྐུ་ཚེ་ལོ་རྒྱུས་ཀྱི་རྡོ་རིང་ལྟ་བུ་དེ་ནི་གྲྭ་ས་རང་དུ་བཞུགས་ཤིང་བཞུགས་པ་ཙམ་མ་ཟད་གྲྭ་སའི་སློབ་གཉེར་བ་བརྒྱ་ཕྲག་བརྒལ་བ་གསོ་སྐྱོང་དང་གྲྭ་སའི་བསྟན་པ་ཉམས་མེད་བརྒྱུད་འཛིན་དང་དར་སྤེལ་གནང་ཡོད་པ་འདི་རང་ཡིན།

གོང་གི་རྒན་རིན་པོ་ཆེའི་རྣམ་པར་ཐར་པ་ཟུར་ཙམ་སྨྲས་འདི་ནི་ཁོ་བོའི་མཐོང་ཐོས་དབང་པོའི་མངོན་སུམ་དུ་གྱུར་པའི་གནད་ཅན་རགས་བསྡུས་ཙམ་ཡིན་གྱི་ཞིབ་ཅིང་ཕྲ་བ་ཞིག་ནི་ཁོ་བོ་ལྟ་བུ་ཞིག་གིས་བཤད་ཤེས་དང་འབྲི་ཐབས་མེད་པའི་ཚོད་དུ་ཡོད་ན། མི་སྙོབ་པ་ལ་ལག་སྙོབ་དེ་མ་བྱས་སོ།། ཆེད་དུ་བཤད་རྒྱུ་ཞིག་ལ་སྔ་སྲོལ་གྱི་རྣམ་ཐར་འབྲི་སྟངས་བཞིན་ཁ་ཡག་དང་ཚིག་ཡག་སྤུང་ཐབས་བྱས་མེད་ཅིང་། མ་མཐོང་བ་ལ་མཐོང་མདོག་དང་མ་དད་པ་ལ་དད་མདོག་དེའང་ཁོ་བོའི་གཤིས་སུ་མེད་པས་ན་གང་ཞིག་མཐོང་བ་དང་ཐོས་པ་དག་ཡི་གེར་ཕབ་པ་ཡིན་ནོ།།
སེར་བྱེས་ཏྲེ་བོ་སྲོང་བཙན་གྱིས་རྒན་རིན་པོ་ཆེའི་ཁྲི་འདོན་མཛད་སྒོ་ཉིན་རྟེན་འབྲེལ་མཚོན་སླད་དུ་སྤེལ།


2016/06/29

ཆེན་དང་ཆེ་ཇི་ལྟར་འབྲི་དགོས།


བོད་སྐད་ཡིག་གི་མིང་ཚིག་འབྲི་ལུགས་རེ་འགའ་ཅུང་མགོ་རྙོག་པོ་དང་། སྟབས་བདེ་མིན་པར་ཡོད་ཅིང་དེ་དག་ཇི་ལྟར་འབྲི་དགོས་པའི་དཔྱད་རྩོམ་རེ་ད་བར་མ་མཐོང་ལ་འོན་ཀྱང་རང་ཉིད་ཐེ་བའི་མི་མང་པོ་ལ་ཉིན་རྒྱུན་དཀའ་ངལ་འཕྲད་ས་ཞིག་ཡིན་སྟབས་ཁོ་བོོས་འདིའི་ཐད་དཔྱད་ཞིབ་མི་ཉུང་བ་ཞིག་ལ་ཞིབ་འཇུག་བྱས་ཏེ་ལས་སླ་པོའི་ཐོག་ནས་འབྲི་ཐབས་ཤིག་སྟོན་ཁུལ་བྱས་ཡོད།

ཚིག་མཛོད་ཁག་ཏུ་ཆེན་པོའི་དོན་བཤད་དུས། ཆུང་བའི་ལྡོག་ཕྱོགས་སྤྱིར་བཏང་ཞེས་བྲིས་ཡོད་ཅིང་། རིགས་མཐུན་གཞན་ལས་ཆེ་བ། བོངས་ཚོད་དང་རྒྱ་ཁྱོན་སོགས་གཞན་ལས་ཆེ་བའི་དོན་ཡང་བྲིས་འདུག མཚན་གཞི་ལ། ལམ་ཆེན་པོ། ཆུ་ཆེན། ལམ་ཆེན། སོགས་དང་། ཡང་ལོ་ཚོད་མཐོ་བ་ལ་འཇུག་པ། དགུང་ལོ་ཆེན་པོ་དང་། ལོ་ཆེན་པོ། ངའི་ཨ་མ་ལོ་ཆེན་པོ་ཡིན། ལྟ་བུ། གོ་གནས་དང་དབང་ཆ་ཆེ་བའི་དོན་ལ་འཇུག་པ། བླ་མ་ཆེན་པོ། དཔོན་པོ་ཆེན་པོ། ལྟ་བུ་ཡིན།

ཆེན་པོ་ཟེར་དུས་ཆེ་ཆུང་གཉིས་གཤིབ་ནས་གང་ཞིག་ཆེ་བ་དེ་ངོས་འཛིན་པ་ཞིག་མིན་པར་སྤྱིར་བཏང་ནས་ཆེ་བའི་རིགས་ལ་གོ་དགོས་པ་འདུག དཔེར་ན། ས་ཆ་ཞིག་ལ་ཤིང་སྡོང་ཆེན་པོ་གཅིག་བུ་ཞིག་ཡོད་ཚེ་དེ་ལ་ཤིང་སྡོང་ཆེན་པོ་ཞེས་ལབ་ཆོག་པ་ཡིན། དེ་ནི་སྤྱིར་ཆེན་པོའི་རིགས་སུ་བཏོགས་པའི་རྒྱུ་མཚན་གྱིས་ཡིན།  འོན་ཀྱང་དེ་ལ་ཤིང་སྡོང་ཆེ་བ་ཞེས་ནི་མི་ཟེར་ཏེ། གལ་སྲིད་དེ་བཞིན་ལབ་ན་ས་ཆ་དེར་ཤིང་སྡོང་ཆེ་ཆུང་གཉིས་སམ་དུ་མ་ཡོད་པའི་གྲས་ནས་ཆེ་བ་ངོས་འཛིན་པ་ཞིག་ཆགས་འགྲོ་བ་ཡིན། དེ་བཞིན་བུ་ཆེ་བ་དེ། ཁང་པ་ཆེ་བ། ལམ་ཆེ་བ། སོགས་ནི་ཆེ་ཆུང་གཉིས་བསྡུར་ནས་ཆེ་བ་ངོས་འཛིན་པ་ཞིག་དང་། གལ་སྲིད་བུ་གཅིག་ལས་མེད་པ་ཞིག་ཡིིན་ན་བུ་ཆེ་བ་ཞེས་མི་ཟེར། དེ་མཚུངས་ཆེ་ཤོས་ཞེས་པའང་ན་ཡིག་མེད་པ་དེ་འབྲི་དགོས།

ཆེན་པོ་ཚིག་བསྡུ་བྱེད་པ། དཔེར་ན། ལམ་ཆེན།-ལམ་ཆེན་པོ། གལ་ཆེན།-གལ་ཆེན་པོ། འགངས་ཆེན།-འགངས་ཆེན་པོ། རླབས་ཆེན།-རླབས་ཆེན་པོ། པཎ་ཆེན།-པཎ་གྲུབ་ཏ་ཆེན་པོ། སྒྲ་ཆེན།-སྒྲ་ཆེན་པོ། བསྐལ་ཆེན།-བསྐལ་བ་ཆེན་པོ། མཁས་ཆེན།-མཁས་པ་ཆེན་པོ། ས་ཆ་ཧ་ཅང་རྒྱ་ཆེན་པོ་འདུག་ཅེས་པ་ཚིག་བསྡུ་བྱེད་དགོས་ཚེ། ས་ཆ་ཧ་ཅང་རྒྱ་ཆེན་འདུག་ཅེས་འབྲི་ཆོག་པ་ཡིན།

ཆེ་བའི་ཚིག་བསྡུ། ལམ་ཆེ།-ལམ་ཆེ་བ། གལ་ཆེ།-གལ་ཆེ་བ། འགངས་ཆེ།-འགངས་ཆེ་བ། རླབས་ཆེ།-རླབས་ཆེ་བ། སྒྲ་ཆེ།-སྒྲ་ཆེ་བ། བསྐལ་ཆེ།-བསྐལ་པ་ཆེ་བ། རྒྱ་ཆེ།-རྒྱ་ཆེ་བ། གནད་དོན་འདི་ནི་ཧ་ཅང་གལ་ཆེ་བ་ཞིག་ཡིན་ཞེས་པ་ཚིག་བསྡུ་བྱེད་ན། གནད་དོན་འདི་ནི་ཧ་ཅང་གལ་ཆེ་ཡིན་ཞེས་འབྲི་དགོས། རང་གིས་འབྲི་བ་ཙམ་མིན་པར་གཞན་གྱིས་བྲིས་པ་གོ་བ་ལེན་དུས་ཀྱང་གཅིག་མཚུངས་ཡིན། གལ་ཏེ་ཁྱེད་ཀྱིས་ཚིག་བསྡུ་འདི་དག་ཤེས་པར་བྱོས་དང་དུས་རྒྱུན་ཆེན་དང་ཆེ་གཉིས་ཇི་ལྟར་བེད་སྤྱོད་བྱེད་དགོས་མིན་ལེགས་པར་ཁོང་དུ་ཆུད་ཐུབ།

འདི་ནས་བཤད་དགོས་པ་ཞིག་ལ་ཆེན་མོ་ཞེས་པ་འདི་ཇི་ལྟར་འབྲི་དགོས་པའི་སྐོར་གྱི་དཔྱད་གཞི་ཞིག་མ་རྙེད་ལ། ཚིག་མཛོད་དུ། ཆེན་པོ་དང་དོན་འདྲ་ཞིང་གཙོ་བོར་ཆེད་དུ་བཏགས་པའི་མིང་མཐར་སྦྱོར་བ་ཞེས་འཁོད་འདུག། ལམ་རིམ་ཆེན་མོ། སློབ་གྲྭ་ཆེན་མོ། ནང་བསྟན་སློབ་གཉེར་ཁང་ཆེན་མོ། རྒྱུགས་སྤྲོད་ཆེན་མོ། ཚིག་མཛོད་ཆེན་མོ། སོགས་བེད་སྤྱོད་དང་ལག་ལེན་བྱེད་མུས་ཡིན། ངས་བསམ་ན་ནང་དོན་རྒྱ་ཆེ་ཆུང་སོགས་ཀྱི་དབང་ལས་ཆེན་མོ་ཞིག་བཏགས་ཀྱི་འདུག་སྙམ་སྟེ། སློབ་གྲྭ་ཆེན་པོ་ལབ་དུས་ཕྱིའི་བཀོད་པ་སོགས་རྒྱ་ཆེ་ཆུང་བཤད་པ་དང་། སློབ་གྲྭ་ཆེན་མོ་ཟེར་དུས་ཕྱིའི་བཀོད་པ་སོགས་མིན་པར་ནང་གི་སློབ་ཚན་དང་གནས་རིམ་སོགས་སློབ་ཆུང་དང་སློབ་འབྲིང་དག་ལས་ཆེ་བའི་རྒྱུ་མཚན་གྱིས་ཡིན། དེ་བཞིན་མདུན་རེ་རྒྱུགས་སྤྲོད་རེ་བཏང་བ་ལ་རྒྱུགས་སྤྲོད་དང་ལོ་འཁོར་རྒྱུགས་སྤྲོད་ལ་རྒྱུགས་སྤྲོད་ཆེན་མོ་ལྟ་བུ་ནང་དོན་གྱི་ཆ་ནས་ཆེན་མོ་འབྲི་མིན་ཐད་ལག་ལེན་དང་བེད་སྤྱོད་གཏོང་བཞིན་འདུག་སྙམ་པའོ།།
ཕྱི་ལོ་2016ལོ་འགོ་བྲིས་ཤིང་ཟླ་6-29ལ་བསྐྱར་བཅོས་དང་ཁ་གསབ་བྱས།



2016/05/25

ཨེ་མོ་རི་ཚན་རིག་ཟབ་སྦྱོང་འགོ་བཙུགས་པ།


མི་ལོ་སུམ་ཅུ་ལྷག་གི་སྔོན་ནས་༸གོང་ས་མཆོག་གིས་ནང་པ་ཚོས་ཚན་རིག་སྦྱོང་གལ་ཆེ་ཚུལ་གྱི་བཀའ་སློབ་ཐེངས་མང་གནང་བ་ཙམ་མ་ཟད། འགྲོ་གྲོན་ཕོན་ཆེར་གནང་སྟེ་བོད་ཀྱི་དཔེ་མཛོད་ཀྱི་འགན་ཁུར་འོག དགེ་བཙུན་དད་གཉེར་ཅན་མི་ཉུང་བ་ཞིག་གིས། མི་ལོ་བཅུ་ལྷག་གི་རིང་དུ་ཚན་རིག་ཟུར་སྦྱོང་མཛད་དེ་སྐུ་ལས་གང་མང་སྐྱོན་པའི་གྲུབ་འབྲས་སུ། ཨེ་མོ་རི་གཙུག་ལག་སློབ་གཉེར་ཁང་དུ་དགེ་འདུན་པ་སྐོར་ཐེངས་གསུམ་ཕེབས་ཐུབ་པ་བྱུང་ཡོད་ཅིང་། 2013ལོ་རྒྱུས་ཐོག་ཏུ་བོད་ཀྱི་དགེ་འདུན་པ་སྐོར་ཞིག་གིས་ཨེ་མོ་རི་གཙུག་ལག་ཁང་ནས་སློབ་ཐོན་ལག་ཁྱེར་ལེན་པའི་མཛད་སྒོ་ཐོག་ཏུ་བགྲེང་སྟེ་ཐེངས་དང་པོའི་སློབ་ཐོན་ལག་ཁྱེར་བླངས་ཡོད། ཁོ་ཚོས་གྲས་ཀྱིས་ད་སྐབས་བོད་ཀྱི་དགོན་སྡེ་ཁག་ཏུ་ཚན་རིག་སློབ་དེབ་བསྒྱུར་སྒྲིག་དང་ཉིན་རེའི་སློབ་ཚན་ཁྲིད་རྒྱུ། དགེ་སྡེའི་ཚན་རིག་དང་འབྲེལ་བའི་ཕྱག་ལས་སྣ་མང་ལ་རྐང་འགན་ཁུར་བཞིན་ཡོད།

ད་དུང་༸གོང་ས་མཆོག་སྐུ་སྒེར་གྱིས་ཚན་རིག་པ་དག་དང་<སེམས་དང་སྲོག>གི་ལས་རིམ་དུ་ཐུགས་འགན་བཞེས་ཏེ་བགྲོ་གླེང་མཛད་བཞིན་ཡོད་ཅིང་། སྔ་ལོར་སེ་ར་དགོན་དུ་<སེམས་དང་ཚེ་སྲོག་>གི་བགྲོ་གླེང་ཐེངས་30པ་དེ་བསྐྱངས་ཡོད།

1987ལོར<སེམས་དང་ཚེ་སྲོག>ཚོགས་པ་གསར་འཛུགས་གནང་ཞིང་། ༸གོང་ས་མཆོག་ནི་ཚོགས་པ་འདི་གསར་འཛུགས་གནང་མཁན་གྱི་གྲས་ནས་གཅིག་ཡིན། ལྷག་པར་དུ་ད་བར་ཚོགས་པ་འདི་འཕེལ་རྒྱས་དང་རྒྱ་བསྐྱེད་ཡོང་བའི་གཞི་རྩ་ནི་ཁོང་ཆགས་ཡོད་ཅེས་འབྲེལ་ཡོད་ཡིག་ཆར་འཁོད་འདུག

ད་བར་<སེམས་དང་ཚེ་སྲོག>ཚོགས་པར་ཚོགས་མི་ཉིས་ཁྲི་རྒལ་བྱུང་འདུག་ཅིང་། ཚོགས་པ་འདིས་ཚན་རིག་དང་འབྲེལ་བའི་ཉམས་ཞིབ་དང་ལས་རིམ་སྣ་ཚོགས་ཤིག་གཉེར་ནས་འགྲོ་གྲོན་ཡང་ཨ་སྒོར་ས་ཡ་ལྔ་བཅུ་ང་ལྔ་ལྷག་ནར་གཏོང་བྱས།

བཀའ་སློབ་ཙམ་མིན་པར་བོད་ཀྱི་དགོན་སྡེ་དག་ཏུ་ཤུགས་རྐྱེན་ཡོང་ཐབས་སུ་<སེམས་དང་སེམས་སྲོག་>གི་བགྲོ་གླེང་གདན་ས་ཁག་ཏུ་འཚོག་རྒྱུ་བྱས་པ་སོགས་ལས་རིམ་གང་མང་དབུ་འཛུགས་མཛད་ནའང་བོད་ཀྱི་དགོན་སྡེ་ཁག་ཏུ་འགུལ་དཀྱོག་ཅིག་ཐེབས་མེད། མཐའ་མར་ཨུ་ཐུག་པ་ལྟ་བུས་གདན་ས་གསུམ་གཙོས་པའི་དགེ་ལྡན་པའི་དགོན་ཁག་དུ་མར་ཚན་རིག་འཛིན་གྲྭ་གསར་འཛུགས་དགོས་ཚུལ་དང་རི་བོ་དགེ་སྡེ་པའི་དགེ་ལུགས་རྒྱུགས་སྤྲོད་ཆེན་མོའི་ནང་དུ་ཚན་རིག་རྒྱུགས་སྤྲོད་འཇུག་དགོས་པའི་བཀའ་སློབ་ནན་ཆེར་ཕེབས་རྗེས་གདན་ས་གསུམ་དང་དགོན་སྡེ་མང་པོའི་ནང་དུ་དངོས་སུ་ཚན་རིག་འཛིན་གྲྭ་གསར་འཛུགས་དང་། སློབ་ཚན་བཀོད་བསྒྲིགས། སློབ་དེབ་ཆེད་བསྒྲིགས། དགེ་རྒན་ཐབས་འཚོལ་སོགས་བྱས་ཏེ་ཚ་ཚ་འུར་འུར་མ་བྱས་དཀའ་མེད་ཅིག་ལ་ཐུག་སྟེ་ཕྱི་ལོ་2012ལོར་དངོས་སུ་གདན་ས་གསུམ་དུ་ཚན་རིག་འཛིན་གྲྭ་གསར་འཛུགས་ཐུབ་པ་བྱུང་ཡོད།

སློབ་ཚན་དང་དགེ་རྒན་སོགས་ཀྱི་དཀའ་ངལ་ཙམ་མིན་པར་དགེ་འདུན་པར་ཚོར་ཚན་རིག་གི་རྨང་གཞི་ཨང་རྩིས་སོགས་ཀྱི་གཞི་རྩ་ཡག་པོ་མེད་རྐྱེན་སྐྱེ་དངོས་དང་རྫས་འགྱུར་ཚན་རིག་གཏིང་ཟབ་པོ་ཤེས་ཐབས་དཀའ་ཡང་ཐོག་མའི་ཚན་རིག་ངོ་སྤྲོད་དང་ཨང་རྩིས་རྒྱབ་ལྗོངས་སུ་མི་དགོས་པའི་རིག་ཚན་མང་པོ་སྦྱོང་པར་བྱས།

 ཕྱི་ལོ2014ནས་ཨེ་མོ་རི་དང་བོད་ཀྱི་ཚན་རིག་ཟུང་འབྲེལ་གྱིས། ཨེ་མོ་རི་ཚན་རིག་ཟབ་སྦྱོང་དབུ་འཛུགས་གནང་སྟེ་ཟླ་བ་གཅིག་གི་རིང་དུ་ཟབ་སྦྱོང་བྱེད་བཞིན་ཡོད་ཅིང་། འདི་ལོ་ཡང་ཕྱི་ཟླ་5ཚེས་18ནས་ཟླ་ངོ་གཅིག་གི་རིང་དུ་ཟབ་སྦྱོང་གནང་གཏན་ཁེལ་ཡོད། ད་ལོའི་ཨེ་མོ་རི་ཚན་རིག་ཟབ་སྦྱོང་ཐེངས་གསུམ་པ་གདན་ས་གསུམ་དུ་འཚོག་རྒྱུ་དང་། འདི་གར་སེ་ར་དགོན་དུ་ཟབ་སྦྱོང་དུ་བཞུགས་པའི་ཚན་རིག་འཛིན་གྲྭའི་ཁོང་ནས་འཛིན་གྲྭ་གསུམ་མཉམ་བཞུགས་དང་སེ་ར་བྱེས་སྨད་གཉིས། བཀྲིས་ལྷུན་པོ་བཅས་ནས་དགེ་འདུན་པ་332མཉམ་བཞུགས་གནང་བཞིན་ཡོད།

ཧིན་སྒོར་འབུམ་བཅུ་ལྷག་གི་འགྲོ་སོང་ཡོད་པའི་ཟླ་ངོ་གཅིག་གི་ཟབ་སྦྱོང་འདིར། ཨེ་མོ་རི་གཙུག་ལག་སློབ་གཉེར་ཁང་དང་དེ་མིན་གྱི་གཙུག་ལག་སློབ་གཉེར་ཁང་གི་འབུམ་རམས་པ་དང་ཉམས་ཞིབ་པ། སློབ་ཆེན་ཁག་གི་སློབ་དཔོན་ཆེན་མོའི་གོ་གནས་བཞེས་པའི་དགེ་རྒན་ཉི་ཤུ་ཙམ་ཆེད་ཕེབས་ཀྱིས་ཟབ་སྦྱོང་གནང་གི་རེད། སློབ་ཚན་དུ་ཚན་རིག་གི་ལྟ་གྲུབ། སྐྱེ་དངོས་ཚན་རིག དངོས་ཁམས་ཚན་རིག དབང་རྩའི་ཚན་རིག་བཅས་ཁྲིད་རྒྱུ་དང་། ཉིན་རེའི་སློབ་ཐུན་བཞི་རེ་དང་ཆུ་ཚོད་5་ལྷག་བཅས་གཏོང་དགོས་ལ། གཟའ་མཇུག་ཏུ་བདུན་གཅིག་གི་ཁྲིད་ཟིན་པ་ཁག་ལ་རྒྱུགས་སྤྲོད་གཏོང་དགོས། 

2016/05/07

སྨྲེ་སྔགས་དབྱངས་ཀྱི་མཆོད་པ།


སེར་བྱེས་ཏྲེ་ཧོར་མཁན་ཟུར་རྗེ་བཙུན་བློ་བཟང་དཔལ་ལྡན་དགོངས་པ་རྫོགས་པའི་ཡིད་སྐྱོ་བའི་གནས་ཚུལ་མིག་སྔར་ལྷགས་བཞིན་པའི་སྐབས་འདིར་དམ་པ་ཁོང་རྗེས་དྲན་དང་མྱ་ངན་ཞུ་ཆེད་དུ་སྙན་ཚོམ་འདི་ཆེད་སྒྲིག་བྱས་པ་ཡིན།
(གསལ་བཤད། རྩོམ་འབྲི་བའི་མིང་གི་ཀ་མད་བཞིན་རྩོམ་ཡིག་སྔ་ཕྱི་བསྒྲིགས་ཡོད།)


ཡང་བསྟན་པའི་སྒྲོན་མེ་ཞིག་ཟུམ་སོང་
            _____མཁར་སྒང་བསོད་ནམས་དབང་ལྡན།

ཐོས་བསམ་སྒོམ་པའི་བྱ་བར་ཆགས་པས་འབྱོར་པའི་འདུ་འགོད་བློ་ལ་མ་དྲན་འཇིག་རྟེན་བླུན་པོའི་ཕུལ་བྱུང་ཞིག །
མི་བསྲུན་སྐྱེ་བོས་ཡང་ཡང་རྒོལ་ཡང་སྡང་མིག་ཚིག་མཚོན་གཡོ་འདེབས་མ་ཤེས་འཇིག་རྟེན་བླུན་པོའི་ཕུལ་བྱུང་ཞིག །
སྲིད་ཞིའི་དཀའ་གནད་མདུད་པ་གྲོལ་ལ་སྨན་མཆོག་འཛིན་པའི་ཐབས་མཁས་ཐུགས་རྗེས་འཇིག་རྟེན་འདས་པའི་མཁས་མཆོག་ཅིག །
འཁོར་སློབ་ལ་སོགས་རིས་མེད་ཀུན་ལ་རྟག་ཏུ་འཛུམ་པའི་ཐུགས་རྗེའི་མདངས་གསལ་སྐྱབས་རྗེ་གང་ལ་སྙིང་ནས་འདུད། །

དད་ལྡན་སློབ་མར་རྗེས་བརྩེའི་ཐུགས་ཀྱིས་སྐྱོ་ངལ་ཀུན་སྤངས་གཞན་དོན་མཛད་བཟང་བསམ་མི་ཁྱབ་པའི་ངང་ཚུལ་ཅན། །
ཐུགས་རྗེས་འགྲོ་ལ་ཀུན་ནས་ཆགས་ན་མ་དག་ཞིང་འདིར་ཉམས་ཐག་བོར་ནས་དག་པའི་ཞིང་དུ་ཆས་ཕོད་དམ། །
དེའི་ཕྱིར་བསྟན་འགྲོ་ཀུན་ནས་སྐྱོང་ལ་འཆིང་བ་མ་ལྷོད་ཟླ་ཞལ་འཛུམ་མདངས་མྱུར་དུ་སྟོན་ཅིག་བླ་མ་རྗེ། །
ཚེ་ཚེ་རབས་རབས་རྗེས་འཛིན་ལྕགས་ཀྱུས་འདོར་བ་མ་གནང་སྐྱབས་མཆོག་བླ་མར་གསོལ་འདེབས་ཕུར་ཚུགས་སྙིང་ནས་ཞུ། །

ཞེས་པ་འདིའང་རང་ཅག་རྣམས་ལ་དུས་གསུམ་རྒྱལ་བ་ཀུན་ལས་བཀའ་དྲིན་ལྷག་པའི་སྐྱབས་རྗེ་མཁན་ཟུར་རྡོ་རྗེ་འཆང་མཚན་བརྗོད་པར་དཀའ་བ་རྗེ་བཙུན་བློ་བཟང་དཔལ་ལྡན་དཔལ་བཟང་པོ་མཆོག་ཕྱི་ལོ་ 2016-5-1 བོད་ཟླ་ 3 ཚེས་ 24 ཉིན་ཐཻ་ཝན་རྒྱལ་ས་ཐཻ་པེའི་དགོང་མོ་ཆུ་ཚོད་ 8:10 རྒྱ་གར་ལྷོ་ཕྱོགས་གྲོང་ཁྱེར་ཅེ་ནཻའི་ཆུ་ཚོད་ 5:40 ཐོག་རེ་ཞིག་དགོངས་པ་ཆོས་དབྱིངས་སུ་ཐིམ་ཚུལ་བསྟན་པ་ལ། མདང་དགོང་སྨོན་ལམ་དང་དྲང་ངེས་ལེགས་བཤད་སྙིང་པོ་སོགས་མཚན་ཐོག་ཐག་ཏུ་དགེ་འདུན་འདུས་པ་རྒྱ་མཚོ་དང་ལྷན་དུ་བཏོན་ཅིང་། དེ་རིང་ 5-2 ཞོགས་པའི་ཆ་ལ་གུས་སློབ་སེར་ཏྲེ་མཁར་སྒང་བསོད་ནམས་དབང་ལྡན་གྱིས་དད་གདུང་དྲག་པོས་བྲིས་པ་དགེའོ།། །།

གདུང་སེལ་དབྱངས་ཀྱི་མཆོད་སྤྲིན།


བསོད་ནམས་ལེགས་བྱས་མཐའ་ཡས་གསེར་གྱི་སྙིང་པོ་རུ།།
དྲི་མེད་རྒྱལ་བའི་ལུང་རིགས་མི་གཡོ་སྤོ་མཐོ་བ།།
རྣམ་དག་བཤད་སྒྲུབ་གང་གཱ་འཛིན་མའི་རྒྱུན་བཏམས་པ།།
འགྲོ་བའི་དཔལ་གྱུར་དཔལ་ལྡན་བླ་མ་གཙུག་ན་རྒྱལ།།
དཔག་མེད་འགྲོ་བ་སྨག་རུམ་མུན་པའི་གཏིང་མཐའ་རུ།།
སྡུག་བསྔལ་གསུམ་གྱི་སྟོབས་ལྡན་གླང་པོས་བརྫི་བ་ན།།
བརྩེ་བའི་འོད་ཀྱི་ཟླ་གཞོན་འཛུམ་པ་ལྟ་བུ་ཡི།།
གཞན་དོན་མཛད་ལ་སྐོམ་པ་ཆུ་དང་འཕྲད་ཇི་བཞིན།།
མ་དག་གླིང་འདིར་བྱོན་ཞིང་ཐལ་མའི་རྟུལ་ཞུགས་བཟུང་།།
ཐུགས་རྒྱུད་འཇམ་པ་དྲི་མེད་ཆུ་ཤེལ་འོད་ཀྱི་ངོས།།
ཞི་བའི་འཛུམ་གྱི་འདབ་བརྒྱ་མེ་ཏོག་གྲོལ་བ་ན།།
བརླང་ཞིང་རྩུབ་པའི་ཁྲོ་བ་འཕྱུར་བའི་དགྲ་བོས་ཀྱང་།།
མཐོང་ན་འབར་བའི་དུག་གི་མེ་ལྕེ་རང་སར་དེངས།།
རང་བཞིན་སྤྲོས་མེད་ལྟ་བའི་རལ་གྲི་གདེངས་བ་ཡིས།།
འཁོར་བའི་མཚོ་ཆེན་སྲུབས་པའི་རླབས་ཀྱི་གཡོ་བ་རུ།།
གྲངས་མེད་བསོད་ནམས་ཚོགས་ཀྱི་གྲུ་ཆེན་ལ་ཞུགས་ཏེ།
འཇིགས་རུང་སྲིད་པའི་འཁོར་བའི་གནས་ལས་རབ་ཏུ་བརྒལ།
བྱམས་ཆུབ་སེམས་དང་སྙིང་རྗེའི་འོད་མདངས་འཕོྲ་བ་ཡིས།།
མགོན་མེད་འཁྱམ་པའི་འགྲོ་བའི་ཡིད་ལ་དཔལ་སྟེར་ཀྱང་།།
མི་སྲུན་སྐྱེས་བུ་བླུན་པོའི་གདོན་ཆེན་བདག་འཛིན་དེ།།
བསྲེགས་ཤིང་ཚིག་སྟེ་རྡུལ་ཙམ་ཡང་ནི་རྨང་མེད་བཏང་།།
ཟབ་ཅིང་ཕྲ་བའི་མཐའ་ཡས་ཆོས་ཀུན་གནས་ལུགས་ལ།།
ཐོས་བསམ་སྒོམ་པས་རྨོངས་དང་སོམ་ཉི་ཀུན་འཇོམས་པས།།
གྲགས་པས་འཁུར་བའི་རློམ་པས་འགྱིང་བའི་ཆེན་པོ་དག།
ཚིག་ལ་འཁྲིལ་ཅིང་རྩེན་པའི་བྱིས་པ་བཞིན་དུ་གྱུར།།
རང་རྒྱུད་སྨིན་ཞིང་དུལ་བའི་ཕ་རོལ་ཕྱིན་པ་བཅུའི།།
བློ་སྦྱོང་གནད་དུ་ངམ་གྱིས་གཞོལ་ཞིང་འཇུག་པ་ལ།།
བློ་སྟོབས་རི་རབ་ལྟར་བརྟན་བརླིང་བའི་འཕགས་པ་མཆོག།
དུག་གསུམ་འཆིང་བས་བསྡམས་པའི་ཕ་རོལ་སྐྱེས་བུའི་རྒྱུད།།
འདུལ་ལ་ཐབས་མཁས་བསྡུ་བའི་དངོས་པོ་བཞི་སྐྱོང་བ།།
གསལ་དང་འཇམ་ལ་སྙན་པའི་གསུང་གི་ཆ་ཤས་ཙམ།།
གཞན་དོན་མ་འདྲེས་རྡུལ་ཙམ་ཡོད་པའི་སྐབས་སྤང་ངོ་།།
མདོར་ན་འཕགས་པའི་ནོར་གྱིས་ཕྱུག་པའི་ཡོན་ཏན་མཛོད།།
ས་གཞི་དང་ནི་ནམ་མཁའ་ལྟ་བུའི་གཡོ་མེད་དུ།།
གཞན་གྱི་དོན་དུ་སྐད་ཅིག་ཙམ་ཡང་ལྷོད་མེད་པ།།
རྒྱལ་བ་དགྱེས་པའི་མཛད་བཟང་བ་དན་རབ་དཀར་བ།།
མཁས་པ་མགུ་བའི་ཡིད་ཀྱི་ནམ་མཁའི་ཀློང་དུ་འགུལ།།
རབ་འབྱམས་གཞུང་གི་ཟབ་མོའི་ལྟ་བ་རྟོགས་དཀའ་བར།།
དྲི་མེེད་ཐུགས་ཀྱི་དཀྱིལ་འཁོར་མཐིལ་དུ་ལྟེམ་མེར་འཁྱིལ།།
གཙང་བཀྲུའི་ཐུགས་ཀྱི་ཀུ་མུད་གཉེན་ལས་ཕྱུང་བ་ཡི།།
ཞི་དུལ་འོད་ཀྱི་ཟིལ་མ་དད་པའི་སྙིམ་པར་སིམ།།
རིས་མེད་འགྲོ་བ་འཁོར་བ་ལས་སྒྲོལ་སེམས་དཔའ་མཆོག།
རེ་ཞིག་རྟག་འཛིན་འཆིང་བས་བཅིངས་པའི་གདུལ་བྱ་རྣམས།།
མི་རྟག་རླུང་གི་གཡོ་བའི་འདུ་བྱེད་སྒྱུ་མའི་ངང་ཚུལ་དུ།།
བསྐུལ་བ་ཡང་ནི་འགྲོ་བའི་སླད་ལ་ཞིང་གཞན་དུ།།
སྣང་བའི་བདག་པོ་སེམས་དཔལ་ཁྱེད་ཉིད་གཤེགས་པ་བས།།
ཉི་མ་བྱེ་བ་འོད་ཀྱིས་དྲངས་པའི་སྣང་བ་ནུབ།།
དམ་པ་བཤུམ་པའི་སྤྱན་ཆབ་བྲུག་སྟེ་རྫིང་བུར་གྱུར།།
ཞི་བདེའི་བསིལ་བ་ཟླ་ཟེར་འབྱུང་བ་རྒྱུན་ཆད་ཅིང་།
འཁོར་བའི་རྒྱ་མཚོར་འོབས་སུ་ལྟུང་བའི་རྗེས་འབྲངས་དག།
ཕ་མ་བྲལ་བའི་བྱིས་པ་བཞིན་དུ་གདུང་བས་མནར།།
སྙིགས་མ་ལྔ་བདོའི་དུས་ཀྱི་ཡོ་ལང་བཙན་པོ་ན།།
སྡུག་བསྔལ་གསུམ་གྱིས་བག་མེད་མནར་བའི་འགྲོ་བའི་སྨན།།
བསྟན་པ་རིན་ཆེན་གདུང་འདེགས་ཀ་ཆེན་རེ་ཟུང་ཙམ།།
གྱུར་པའི་ངང་ཚུལ་དེས་ཀྱང་སེམས་དཔའ་ཆེན་པོ་ཁྱེད།།
སླར་ཡང་གངས་ལྗོངས་བསྟན་དང་འགྲོ་བའི་དཔལ་གྱུར་ཅིག།

         ཞེས་བདག་གི་རྗེ་བླ་མ་སེར་བྱེས་མཁན་ཟུར་བློ་བཟང་དཔལ་ལྡན་མཆོག་སྐུ་ཞི་བ་ཆོས་དབྱིངས་སུ་འཐིམ་ཚུལ་བསྟན་ནས་ཉིན་གཉིས་ཀྱི་རྗེས་སུ་གང་གི་སློབ་བུའི་གྲལ་མཐར་གནས་པ་ལྕོག་མིག་འབོད་པས་དད་པ་ཆེན་པོས་སྦྱར་བའོ།།

ས་གཞི་འོད་དུ་འཁྱིལ་བའི་སྒྲོན་མེ་ཞིག་གཟིམས་སོང་།
_____གོ་བོ་འཆི་མེད།
ས་གཞི་འོད་དུ་འཁྱིལ་བའི་སྒྲོན་མེ་ཞིག།
ཞི་འཇམ་ཐུགས་བརྒྱུད་མངའ་བའི་སེམས་དཔའ་ཞིག།
སྙན་འཇེབས་ལེགས་བཤད་སྒྲོག་མཁས་དེད་དཔོན་ཆེ།།
གློ་བུར་ཞི་བར་གཟིམས་འདི་ཡིད་རེ་འཁྲེང་།།

བརྒྱ་ཕྲག་སློབ་ཚོགས་སྐྱོང་བའི་བཤེས་གཉེན་ཆེ།།
ལུང་རིགས་གཏེར་དུ་སྦྲུམ་པའི་མངའ་བདག་ཆེ།།
ཞི་དུལ་བརྟུལ་ཞུགས་འཆང་བའི་བདག་ཉིད་ཅན།།
ཞི་དབྱིངས་ལམ་ལ་བཞུད་འདི་ཕམ་ཁ་ཞིག།

དགྱེས་འཛུམ་ཉམས་འགྱུར་བག་ཕེབས་སྐུ་མངའ་ཞིང་།།
སྙན་འཇེབས་གསུང་དབྱངས་ཁམས་པའི་འགྱུ་ཁུག་ལྡན།།
ཟབ་ཡངས་ཐུགས་རྗེའི་གྲིབ་བསིལ་ཀུན་སྙོམས་པའི།།
དཔལ་ལྡན་བླ་མ་གཤེགས་འདིར་གདུང་བས་མནར།།

ཞི་བདེའི་དེད་དཔོན་ཆེན་མོའི་སྐྱབས་འོག་ནས།།
ཤར་བསྐྱོད་ལམ་བུ་རྙེད་འབྱེད་མཁས་རྗེས་འཛིན་པ།།
ཞི་འཛུམ་མི་ཕྱེད་དད་པའི་དམ་ཚིག་ཅན།།
གློ་བུར་ཞིང་གཞན་གཤེགས་འདི་ཕམ་ཁ་ཉིད།།

རྣམ་དཔྱོད་རིགས་ལམ་རྩལ་གྱི་བང་ཁ་ཅན།།
རྣམ་མང་འགྲོ་ལ་བརྩེ་བའི་ཐུགས་ཞགས་ཅན།།
རྣམ་དག་རྒྱལ་སྲས་སེམས་དཔའི་ལྟ་སྤྱོད་ཅན།།
རྣམ་གསུམ་ངུར་སྨྲིག་ཅན་ཁྱེད་གང་དུ་བཞུད།།

སྣ་མང་ལེགས་བཤད་འཆད་མཁས་སྨྲ་ཡངས་ཅན།།
ལུང་རིགས་བརྒལ་རྟགས་རྩོད་མཁས་རིགས་ལམ་ཅན།།
བརྒྱ་ཕྲག་རིགས་པས་དཔྱོད་མཁས་མཛད་བཟང་ཅན།།
སྨྲ་དབང་བཤེས་གཉེན་མགོན་ཁྱེད་གཤེགས་འདིར་སྐྱོ།།


བློ༵་རིགས་རི་མོ་བཀྲ་བའི་མགོན་པོ་ཉིད།།
བཟ༵ང་པོའི་རང་གཤིས་མངའ་བའི་སྐྱེ་མཆོག་ཅིག།
དཔ༵ལ་ལྡ༵ན་བླ་མ་གང་ཁྱེད་མི་ཡུལ་ནས།།
དག་པ་ཞི་དབྱིངས་གཟིམས་འདི་སྐྱོ་བ་ཞིག།

གང་གི་ཞབས་ཟུང་བཏུགས་ཏེ་ལེགས་བཤད་གསུང་།།
རྣ་བར་སིམ་པའི་བགོ་སྐལ་མ་བྱུང་རུང་།།
གང་ཞིག་དགྱེས་འཛུམ་མཇལ་བའི་སྐལ་བ་དེས།།
གང་ལ་དད་འདུན་ཅན་པོས་འཕྲལ་མར་སྤེལ།།

གོང་མའི་རྣམ་ཐར་སྐྱོང་ལ་དཔའ་ངར་ཅན།།
རྣམ་དཔྱོད་རྩལ་སྟོབས་ངོམ་པའི་གཤོག་ཟུང་ཅན།།
ཡང་སྤྲུལ་གཞོན་གསར་པའི་འོད་སྟོང་གི།
ས་གཞི་འོད་དུ་འཁྱིལ་བ་བདག་གིས་སྨོན།།


ཞེས་པ་འདི་ནི་གདན་ས་འབྲས་སྤུངས་ནས་གོ་བོ་འཆི་མེད་དུ་འབོད་པས་མཁན་ཟུར་དམ་པ་རྗེ་བཙུན་བློ་བཟང་དཔལ་ལྡན་གང་ལ་དད་པའི་གདུང་འབོད་དུ་ ༢༠༡༦/༥/༦ ཉིན་གྱི་ཕྱི་དྲོ་འཕྲལ་མར་སྤེལ།


དེ་རིང་གི་ཉི་མས་རི་བོ་བརྒལ་སོང་།

 _____རྒྱང་མིག་པ།
བླ་མ་ལགས
ཁྱོད་ཉིད་ང་ཚོ་དང་གྱེས་ཀྱང
ང་ཚོས་ད་དུང་ཁྱེད་ཀྱི་གདམས་ངག་རྣམས་ཡིད་ལ་དྲན་བཞིན་ཡོད

བླ་མ་ལགས
མི་ཚེ་འདིར་ཁེར་རྐྱང་ངང་འཚོ་ཡང
འཇིག་རྟེན་ན་སྐྱོ་གདུང་ཆེ་བའི་སྐྱེ་འགྲོའི་ཆེད
དུས་རྟག་ཕན་སེམས་དང་བྱམས་སྐྱོང་དོར་མ་མྱོང་བའི་ཁྱོད
ཆེས་མཐར་མཇུག་གི་སྐྱབས་འཇུག་དེ་དབྱངས་སུ་གྱེར་བཞིན
ང་ཚོའི་མིག་ལམ་ན་མངོན་པ་མེད་པའི་སྣང་ཚུལ་དེ་ཅི་ཡིན་ནམ

བླ་མ་ལགས
ཁྱོད་ནི་ནམ་མཁའི་ཉི་མ་བཞིན
འཇིག་རྟེན་ན་ཆེས་བཀའ་དྲིན་ཆེ་ལ་གཟི་འོད་འཕྲོ
མིའི་ཡུལ་ཚ་རླབས་འཕྱུར་བའི་ཡུལ་གྲུ་ཞིག་ནས
ཁྱོད་ཀྱི་བཀའ་སློབ་དང་མི་ཚེ་ལ་ཕྱིར་དྲན་བྱས་དུས
ཁྱེད་ནི་ཟིམ་པ་མེད་པའི་གནས་མཆོག་འདིའི་ཤེས་རབ་ཀྱི་བདག་པོ་ཞིག
མུན་སེལ་གྱི་སྐར་མ་འོད་ཆེ་ཞིག་དང་ཆོས་ཀུན་ནས་མཚུངས

བླ་མ་ལགས
ཁྱོད་ནི་ཁ་རྩང་གི་ཉིན་མོ་དེ་ནས
སྐྱེ་འཆི་ལ་རང་དབང་ཡོད་ཀྱང་འདི་ནས་ཕེབས་སོང
གདུལ་བྱ་ལ་ཉེ་རིང་མེད་ཀྱང་ང་ཚོ་དང་བྲལ་སོང
ཟབ་དོན་གྱི་ལྟ་བ་རྙེད་པའི་སེམས་དཔལ་ཞིག
ཐབས་མཁས་ཀྱིས་ཐུགས་སྲས་འཁྲུངས་བའི་བྱང་ཆུབ་ཞིག
ལས་དབང་དམན་པའི་འཇིག་རྟེན་ནས་བྲལ་ཐལ

བླ་མ་ལགས
ཁྱེད་ཀྱི་རྣམ་ཤེས་གསོན་པོ་དེར
མཚན་བཟང་དབུས་ན་འོད་རླབས་འཕྲོ་ཡང
ད་དུང་འཇིག་རྟེན་འདི་མུན་པས་བརླབས་སོང
མཐར་འཇུག་གི་སློབ་བུ་རྣམས་སྡུག་གིས་མནར་སོང
ཁྱོད་ཉིད་ཉེ་རིང་མ་ཆུང      བརྩེ་སེམས་དེ་ང་ཚོ་ལ་ཕྱོགས་རོགས

དེང་རབས་འཕྲུལ་གྱིས་སྐྲུན་པའི་འཇིག་རྟེན་འདིར།།
ཡོད་ཚོད་རང་ལ་དབང་བའི་འདུ་ཤེས་དེར།།
བདེན་གཉིས་ཚུལ་བཞིན་རྟོགས་པའི་ཤེས་རབ་ཀྱིས།།
དུས་རྟག་གཡོ་མེད་གཟིགས་ཤིག་བླ་མས་མཁྱཻན།།

རྒྱལ་བསྟན་སྤྱི་དང་ཁྱེད་པར་གངས་ལྗོངས་སུ།།
སྐུ་གཟུགས་མཚན་དཔེའི་ལོང་ཚོ་གསར་ཚེས་ཏེ།།
ཉམས་ཐག་འགྲོ་བའི་ཚོགས་རྣམས་འདྲེན་སླད་དུ།།
ཡང་སྤྲུང་བློ་བཟང་དཔལ་ལྡན་མྱུར་བྱོན་སྨོན།།

བསྟན་པའི་བདག་པོ་སེར་བྱེས་མཁན་ཟུར་རིན་པོ་ཆེ་རྗེ་བཙུན་བློ་བཟང་དཔལ་ལྡན་མཆོག་གི་དངོས་སློབ་བྲག་བླ་འཇམ་དབྱངས་རྡོ་རྗེའམ་དྲ་མིང་"རྒྱང་མིག་"གིས་བླ་མའི་བཀའ་དྲིན་རྣམས་ཡིད་ལ་དྲན་བཞིན་སྤྱི་ལོ་༢༠༡༦ ཕྱི་ཟླ་ ༠༥ པའི་ཚེས་༠༦ ཉིན་སྐྱོ་ངལ་གྱི་ཚུལ་དུ་བྲིས་པའོ།

གདུང་སེལ་དབྱངས་ཀྱི་མཆོད་སྤྲིན།
 _____ལྕོག་མིག

བསོད་ནམས་ལེགས་བྱས་མཐའ་ཡས་གསེར་གྱི་སྙིང་པོ་རུ།།
དྲི་མེད་རྒྱལ་བའི་ལུང་རིགས་མི་གཡོ་སྤོ་མཐོ་བ།།
རྣམ་དག་བཤད་སྒྲུབ་གང་གཱ་འཛིན་མའི་རྒྱུན་བཏམས་པ།།
འགྲོ་བའི་དཔལ་གྱུར་དཔལ་ལྡན་བླ་མ་གཙུག་ན་རྒྱལ།།
དཔག་མེད་འགྲོ་བ་སྨག་རུམ་མུན་པའི་གཏིང་མཐའ་རུ།།
སྡུག་བསྔལ་གསུམ་གྱི་སྟོབས་ལྡན་གླང་པོས་བརྫི་བ་ན།།
བརྩེ་བའི་འོད་ཀྱི་ཟླ་གཞོན་འཛུམ་པ་ལྟ་བུ་ཡི།།
གཞན་དོན་མཛད་ལ་སྐོམ་པ་ཆུ་དང་འཕྲད་ཇི་བཞིན།།
མ་དག་གླིང་འདིར་བྱོན་ཞིང་ཐལ་མའི་རྟུལ་ཞུགས་བཟུང་།།
ཐུགས་རྒྱུད་འཇམ་པ་དྲི་མེད་ཆུ་ཤེལ་འོད་ཀྱི་ངོས།།
ཞི་བའི་འཛུམ་གྱི་འདབ་བརྒྱ་མེ་ཏོག་གྲོལ་བ་ན།།
བརླང་ཞིང་རྩུབ་པའི་ཁྲོ་བ་འཕྱུར་བའི་དགྲ་བོས་ཀྱང་།།
མཐོང་ན་འབར་བའི་དུག་གི་མེ་ལྕེ་རང་སར་དེངས།།
རང་བཞིན་སྤྲོས་མེད་ལྟ་བའི་རལ་གྲི་གདེངས་བ་ཡིས།།
འཁོར་བའི་མཚོ་ཆེན་སྲུབས་པའི་རླབས་ཀྱི་གཡོ་བ་རུ།།
གྲངས་མེད་བསོད་ནམས་ཚོགས་ཀྱི་གྲུ་ཆེན་ལ་ཞུགས་ཏེ།
འཇིགས་རུང་སྲིད་པའི་འཁོར་བའི་གནས་ལས་རབ་ཏུ་བརྒལ།
བྱམས་ཆུབ་སེམས་དང་སྙིང་རྗེའི་འོད་མདངས་འཕོྲ་བ་ཡིས།།
མགོན་མེད་འཁྱམ་པའི་འགྲོ་བའི་ཡིད་ལ་དཔལ་སྟེར་ཀྱང་།།
མི་སྲུན་སྐྱེས་བུ་བླུན་པོའི་གདོན་ཆེན་བདག་འཛིན་དེ།།
བསྲེགས་ཤིང་ཚིག་སྟེ་རྡུལ་ཙམ་ཡང་ནི་རྨང་མེད་བཏང་།།
ཟབ་ཅིང་ཕྲ་བའི་མཐའ་ཡས་ཆོས་ཀུན་གནས་ལུགས་ལ།།
ཐོས་བསམ་སྒོམ་པས་རྨོངས་དང་སོམ་ཉི་ཀུན་འཇོམས་པས།།
གྲགས་པས་འཁུར་བའི་རློམ་པས་འགྱིང་བའི་ཆེན་པོ་དག།
ཚིག་ལ་འཁྲིལ་ཅིང་རྩེན་པའི་བྱིས་པ་བཞིན་དུ་གྱུར།།
རང་རྒྱུད་སྨིན་ཞིང་དུལ་བའི་ཕ་རོལ་ཕྱིན་པ་བཅུའི།།
བློ་སྦྱོང་གནད་དུ་ངམ་གྱིས་གཞོལ་ཞིང་འཇུག་པ་ལ།།
བློ་སྟོབས་རི་རབ་ལྟར་བརྟན་བརླིང་བའི་འཕགས་པ་མཆོག།
དུག་གསུམ་འཆིང་བས་བསྡམས་པའི་ཕ་རོལ་སྐྱེས་བུའི་རྒྱུད།།
འདུལ་ལ་ཐབས་མཁས་བསྡུ་བའི་དངོས་པོ་བཞི་སྐྱོང་བ།།
གསལ་དང་འཇམ་ལ་སྙན་པའི་གསུང་གི་ཆ་ཤས་ཙམ།།
གཞན་དོན་མ་འདྲེས་རྡུལ་ཙམ་ཡོད་པའི་སྐབས་སྤང་ངོ་།།
མདོར་ན་འཕགས་པའི་ནོར་གྱིས་ཕྱུག་པའི་ཡོན་ཏན་མཛོད།།
ས་གཞི་དང་ནི་ནམ་མཁའ་ལྟ་བུའི་གཡོ་མེད་དུ།།
གཞན་གྱི་དོན་དུ་སྐད་ཅིག་ཙམ་ཡང་ལྷོད་མེད་པ།།
རྒྱལ་བ་དགྱེས་པའི་མཛད་བཟང་བ་དན་རབ་དཀར་བ།།
མཁས་པ་མགུ་བའི་ཡིད་ཀྱི་ནམ་མཁའི་ཀློང་དུ་འགུལ།།
རབ་འབྱམས་གཞུང་གི་ཟབ་མོའི་ལྟ་བ་རྟོགས་དཀའ་བར།།
དྲི་མེེད་ཐུགས་ཀྱི་དཀྱིལ་འཁོར་མཐིལ་དུ་ལྟེམ་མེར་འཁྱིལ།།
གཙང་བཀྲུའི་ཐུགས་ཀྱི་ཀུ་མུད་གཉེན་ལས་ཕྱུང་བ་ཡི།།
ཞི་དུལ་འོད་ཀྱི་ཟིལ་མ་དད་པའི་སྙིམ་པར་སིམ།།
རིས་མེད་འགྲོ་བ་འཁོར་བ་ལས་སྒྲོལ་སེམས་དཔའ་མཆོག།
རེ་ཞིག་རྟག་འཛིན་འཆིང་བས་བཅིངས་པའི་གདུལ་བྱ་རྣམས།།
མི་རྟག་རླུང་གི་གཡོ་བའི་འདུ་བྱེད་སྒྱུ་མའི་ངང་ཚུལ་དུ།།
བསྐུལ་བ་ཡང་ནི་འགྲོ་བའི་སླད་ལ་ཞིང་གཞན་དུ།།
སྣང་བའི་བདག་པོ་སེམས་དཔལ་ཁྱེད་ཉིད་གཤེགས་པ་བས།།
ཉི་མ་བྱེ་བ་འོད་ཀྱིས་དྲངས་པའི་སྣང་བ་ནུབ།།
དམ་པ་བཤུམ་པའི་སྤྱན་ཆབ་བྲུག་སྟེ་རྫིང་བུར་གྱུར།།
ཞི་བདེའི་བསིལ་བ་ཟླ་ཟེར་འབྱུང་བ་རྒྱུན་ཆད་ཅིང་།
འཁོར་བའི་རྒྱ་མཚོར་འོབས་སུ་ལྟུང་བའི་རྗེས་འབྲངས་དག།
ཕ་མ་བྲལ་བའི་བྱིས་པ་བཞིན་དུ་གདུང་བས་མནར།།
སྙིགས་མ་ལྔ་བདོའི་དུས་ཀྱི་ཡོ་ལང་བཙན་པོ་ན།།
སྡུག་བསྔལ་གསུམ་གྱིས་བག་མེད་མནར་བའི་འགྲོ་བའི་སྨན།།
བསྟན་པ་རིན་ཆེན་གདུང་འདེགས་ཀ་ཆེན་རེ་ཟུང་ཙམ།།
གྱུར་པའི་ངང་ཚུལ་དེས་ཀྱང་སེམས་དཔའ་ཆེན་པོ་ཁྱེད།།
སླར་ཡང་གངས་ལྗོངས་བསྟན་དང་འགྲོ་བའི་དཔལ་གྱུར་ཅིག།

         ཞེས་བདག་གི་རྗེ་བླ་མ་སེར་བྱེས་མཁན་ཟུར་བློ་བཟང་དཔལ་ལྡན་མཆོག་སྐུ་ཞི་བ་ཆོས་དབྱིངས་སུ་འཐིམ་ཚུལ་བསྟན་ནས་ཉིན་གཉིས་ཀྱི་རྗེས་སུ་གང་གི་སློབ་བུའི་གྲལ་མཐར་གནས་པ་ལྕོག་མིག་འབོད་པས་དད་པ་ཆེན་པོས་སྦྱར་བའོ།།

དྲན་གདུང་དབྱངས་ཀྱི་མཆོད་པ།
 _____བློ་བཟང་ཆོས་འཕེལ།
བློ་༵བཟང་གྲགས་སོཊ་དངོས་བརྒྱུད་བླ་མ་དང་། །
བ༵ཟང་སྤྱོད་སྤེལ་མཛད་རྗེ་བཙུན་ཏཱ་རེ་མ། །
ད༵པལ་ཆེན་པདྨ་དབང་གི་ལྷ་ཚོགས་སོགས། །
ལྡ༵ན་གྲོལ་བཤེས་གཉེན་བསྔག་ལ་མཐུན་རྐྱེན་སྩོལ། །

ཐུབ་པའི་བསྟན་པ་མིང་ཙམ་གྱུར་དུས་འདིར། །
གསུང་རབ་སྤྱི་དང་བློ་བཟང་རྒྱལ་བའི་བསྟན། །
རང་གིས་འཛིན་ཅིང་གཞན་ལ་སྤེལ་མཁས་པའི། །
བསྟན་འཛིན་བཤེས་གཉེན་ཆེན་པོ་སྙིང་ནས་དྲན། །

ཁྱེད་ཐུཊ་མཁྱེན་དཔྱོད་ནམ་མཁའ་ཡངས་པ་ལས། །
འཁྲུངས་པའི་ཟབ་རྒྱས་ཆོས་ཀྱི་ཆར་ཆེན་དག །
སྐལ་ལྡན་ཚོགས་ཀྱི་རྣ་བའི་ཞིང་ས་རུ། །
ཕབས་ཏེ་རྣམ་དག་ལམ་ལ་ཁྲིད་དེ་དྲན། །

མགོན་པོ་ཁྱེད་ཀྱི་ཐུགས་ཀྱི་གྲིབ་སོའི་འོག །
ལན་གཅིག་ངལ་གསོ་ཐོབ་པའི་སྐལ་ལྡན་ཚོཊ། །
གསུང་གི་བདུད་རྩིར་ངོམས་མེད་སྤྱད་གྱུར་ཏེ། །
ས་བཅུ་ལམ་ལྔའི་རྟོགས་པ་མྱུར་བགྲོད་ཤོག །

དཀར་ཕྱོཊ་ལྷ་ཚོཊ་རྣམས་ཀྱི་བྱིན་རླབས་དང་། །
དད་ལྡན་སློབ་བུའི་སྨོན་པའི་བདེན་སྟོབས་ཀྱིས། །
མགོན་པོ་ཉིད་དང་མཚུངས་པའི་ཡང་སྤྲུལ་ཞིག །
བདག་སོཊ་བསྟན་འགྲོའི་མགོན་དུ་མྱུར་བྱོན་ཤོག །

ཁྱེད་ཀྱི་ཡོན་ཏན་འོ་མའི་ཆུ་གཏེར་ལས། །
ཐིཊ་པ་ཙམ་ཞིག་བསྔཊ་པའི་རྣམ་དཀར་འདིས། །
སྲིད་གསུམ་གྲོང་དུ་ལུས་བའི་འགྲོ་བ་ཀུན། །
གཏན་བདེའི་གོ་འཕང་མཆོག་དེ་བརྙེས་གྱུར་ཅིག །

དམན་པ་བདག་ལ་བཀའ་དྲིན་ཤིན་ཏུ་ཆེ་བའི་སེར་བྱེས་མཁན་ཟུར་རིན་པོ་ཆེ་༸རྗེ་བཙུན་བློ་བཟང་དཔལ་ལྡན་མཆོག་དགོངས་པ་གཞན་དུ་གཤེགས་རྗེས་སུ་གུས་སློབ་ཟུར་རྙིང་གོང་མ་སེར་ཏྲེ་བློ་བཟང་ཆོས་འཕེལ་གྱིས་གདུང་ཤུགས་དྲག་པོས་2016/5/5 ཉིན་བྲིས།།

གསོལ་འདེབས་དབྱངས་ཀྱི་མཆོད་པ།
 _____ཚེ་རིང་ཕུན་ཚོགས།
སྐལ་པ་སྤྱོད་དེ་མཛད་པའི་ཆ་རེར་ཡང་།།
བསྟན་པའི་ཁུར་བཞེས་སྙིང་རྗེ་གཞན་དབང་གིས།།
འགྲོ་ལ་གཟིགས་པ་མ་ཆུང་ཐབས་མཁས་པའི།།
རྗེ་བཙུན་བླ་མ་དམ་པ་གང་དེར་འདུད།།

བློ་གྲོས་ཡོངས་པའི་མདོ་བརྒྱུད་མཁའ་གཤེགས་མ།།
དཔྱད་གསུམ་དག་པའི་བསྟན་པའི་སྲོལ་འཛིན་མཆོག།
སྙིགས་མའི་དུས་འདིར་བསྟན་པའི་སྒྲོན་མེ་ཁྱེད།། 
གཞན་དུ་ཕེབས་པའི་སློབ་ཚོགས་བསོད་ནམས་དམན།།

བླ་མ་ཞིང་གཞན་ཕེབས་པའི་གཏམ་ངན་དེ།།
བདག་ཅག་སློབ་བུ་རྣམས་ཀྱི་ཐོས་ཙམ་ནས།།
ཤུལ་དུ་ལུས་པའི་སྤྲང་འཁྱམ་སློབ་བུའི་ཚོགས།། 
སྡུག་གི་མུན་པས་ལུས་སེམས་སྐྱོ་བས་ལྕི།།

བླ་མ་ཁྱེད་ནི་དམ་ཚིག་གཙང་དང་གཅིག།། 
མདོ་བརྒྱུད་གསུངས་རབ་མཁའ་ལ་ཐོག་མེད་གཉིས།། 
ཁྲོ་བ་མི་མངའ་བཟོད་པའི་སྟོབས་བརྟན་གསུམ།།
བསམ་ཞིང་བསམ་ན་དད་པ་ལྷག་ཏུ་འཕེལ།། 

བདག་ཅག་སློབ་བུ་རྣམས་ཀྱིས་མགོན་ཁྱེད་ཀྱི།།
གསེར་ཞལ་མཇལ་བའི་སྐལ་བཟང་བྲལ་ན་ཡང་།།
ནམ་ཞིག་འདི་ནས་ཕྱི་འཕོས་གྱུར་མ་ཐག།། 
དམ་པ་ཁྱེད་ཀྱིས་རྗེ་བཟུང་ལམ་བསྟན་ཤོག།། 

གསེར་གྱི་རི་བོ་ལས་ལྷག་བླ་མ་གང་།།
རེ་ཞིག་འཇིག་རྟེན་འདི་ནས་ཟིམ་གྱུར་ཀྱང་།།
འགྲོ་ལ་བརྩེ་བས་དབང་གིས་ཡང་སྤྲུལ་ཞིག།།
མ་ཐོགས་མྱུར་བ་མྱུར་དུ་ཕེབས་པ་གསོལ།།

སེར་བྱེས་མཁན་ཟུར་རིན་པོ་ཆེ་རྗེ་བཙུན་བློ་བཟང་དཔལ་ལྡན་མཆོག་དགོངས་པ་གཞན་དུ་གཤེགས་རྗེས་སུ་གུས་སློབ་དབུ་གསར་གོང་མ་འཛིན་གྲྭ་ཆོས་མེད་སྤྲང་འཁྱམ་པ་ཚེ་རིང་ཕུན་ཚོགས་ནས་ཡིད་སྐྱོར་བ་དང་བཅས་ཏེ་བྲིས།།

སེར་བྱེས་མཁན་ཟུར་རྗེ་བཙུན་བློ་བཟང་དཔལ་ལྡན་མཆོག་དགོངས་པ་གཞན་དུ་གཤེགས་པར་རྗེས་དྲན་ཞུ།

 _____སེར་ཤུལ་རིན་ཆེན་དོན་གྲུབ།

མཁྱེན་པའི་རྩལ་གྱིས་གཞུང་ཆེན་སྒོ་གླེགས་འབྱེད།།
བཟོད་པའི་མཐུ་ཡིས་ཁྲོ་བའི་གཉེན་ལ་བཞེངས།།
བསྟན་པའི་མཛེས་རྒྱན་བློ་བཟང་དཔལ་གྱིས་ཕྱུག།
ཚུལ་ལྡན་དགེ་བའི་བཤེས་ཁྱེད་དྲན་པར་འོས།།

སེར་ཤུལ་རིན་ཆེན་དོན་གྲུབ་ཀྱིས་དམ་པ་གང་གི་དགོངས་རྫོགས་ལ་གུས་པས་ཕུལ།། ༢༠༡༦/༥/༣/ ལ།

གཤེགས་ཤུལ་ན་སྨྲེ་ངག་འཁྱིལ་འདུག
 _____སྲོང་བཙན།
མི་སྙན་གཏམ་གྱི་ཐིགས་པ་ས་ལ་བབ།།
སྙིང་རུས་གུས་ཆག་ཐེབས་པའི་གཤེད་དུ་སོང་།
ས་ཆེན་སྡུག་གིས་གཡོས་པའི་འགྲམ་ངོགས་ན།།
མིག་ཆུ་འབབ་ལ་ཁད་ཀྱི་སློབ་མས་འཚངས།།
མཇལ་ན་ཡིད་སྲིན་གླང་པོ་རབ་ཏུ་དུལ།།
ཐོས་ན་རང་རྒྱུད་གྱོང་པོ་མཉེན་དུ་གྱུར།།
སྐྱིད་སྡུག་ཅི་བྱུང་རང་བློ་གཏད་ས་ཞིག།།
ཡོད་སྙམ་སེམས་ཚོར་དྲོན་མོ་འཁྱགས་ལ་འབྱར།།
རྡོག་སྣེ་ས་མཐར་སྲིངས་བའི་ནམ་ཟླ་ནས།།
ཚ་དྲོད་མེ་སྤུངས་འབར་བས་ལོ་ཟླ་འདེད།།
མི་ཚེ་དཀའ་བ་སྤྱོད་ན་སྐྱོ་གྱུར་རུང་།།
མགོན་ཁྱེད་རླུང་བུའི་ཚབ་ཏུ་ཡོད་དུས་སྐྱིད།།
སྙིང་ལ་གདོན་གྱིས་གཡབ་མོ་འཕྱོ་བའི་ཚེ།།
གྲོགས་ལ་སྡིག་གིས་འཁྲུལ་སྣང་བཏབ་པའི་དུས།།
ཅི་བསམ་དྲན་དུ་མེད་པའི་ལམ་སྣེ་ནས།
མགོན་ཁྱེད་ཉི་མ་བཞིན་དུ་རོལ་དུས་སྐྱིད།།
རི་བོ་ཞིག་ཅིང་ཆུ་གཏེར་འཁྲུགས་ན་ཡང་།།
ས་གཞི་གས་ལ་རྒྱ་མཚོ་འཕྱུར་མོད་རུང་།།
སེམས་ཀྱི་ཁེན་ས་མི་འགྱུར་རྡོ་རྗེ་ཞིག།
ཡོད་སྙམ་མི་འཇིགས་པ་སྤོབས་པ་ཡོད་མྱོང་ཨང་།
བུ་སློབ་དག་གི་ངོ་གདོང་སྐྱོ་བས་མནན།།
སྐད་འདར་ཚིག་འཁྱོར་མགྲིན་པ་བརྣང་བཞིན་རེངས།
ཅི་བྱེད་འདི་བཀོལ་མེད་པའི་རྣམ་འགྱུར་དེ།། 
མཐོང་དུས་སྙིང་ལ་གས་སྲུབས་རེ་རེ་ཤོར།།
ལྟོས་བཅས་རང་གཟུགས་ཞི་བའི་དབྱིངས་སུ་བསྡུས།།
སྣང་བ་སྒྱུ་མ་ལྟར་དེ་རང་འགག་སོང་།།
ཅི་ཡང་མེད་ཅིང་གང་ཡང་མེད་གྱུར་བ།།
བུ་སློབ་ཚོགས་ཀྱིས་ཀྱེ་མ་ཀྱེ་ཧུ་འབོད།།
མཁའ་སྤྱོད་དག་པའི་ཞིང་ནས་དར་སྣེ་སྲིངས།།
ནུབ་ཕྱོགས་བདེ་ལྡན་དཔལ་ལས་དབྱངས་སྙན་འཁྲོལ།།
མཐའ་ཀླས་རབ་འབྱམས་རྒྱལ་བས་སྔོན་བསུ་བ།།
མགོན་ཁྱེད་གང་ན་ཕེབས་སམ་གང་དུ་བཞུགས།།
དད་པའི་ཟུང་ཐག་དགུ་སྒྲུལ་སྙིང་ལ་མདུད།།
གུས་པའི་ཕྱག་རྒྱ་མ་ཞིག་བྲང་ན་འདེབས།།
བཀའ་གསུང་བྱིན་ཅན་རུས་རྐང་ཚིགས་ལ་བརྐོས།།
ནམ་ཡང་བརྗེད་པ་མེད་དེ་ཁྱེད་ཉིད་ལགས།།
བྱམས་པའི་ངག་ནས་གསེར་གྱི་ཐིགས་པ་ལྷུང་།།
ཟབ་གསལ་རྒྱལ་བའི་ཉིད་ཁུ་གདམས་པར་མཛད།།
བརྩེ་བའི་ཞལ་ནས་འཛུམ་གྱི་མེ་ཏོག་འཐོར།།
སློབ་བུའི་ཚོགས་ཀྱི་ཡིད་སེམས་བདེ་ལ་བཀོད།།
གྲོགས་མེད་ཁེར་མ་སྐྱུར་བའི་སློབ་བུའི་ཚོགས།།
རྒྱུས་མེད་འཕྲང་ལམ་དེད་ནས་འོ་དོད་འབོད།།
མགོན་ཁྱེད་དག་པས་ཞིང་དུ་མ་བཞུགས་པར།།
ད་ལྟ་ཉིད་དུ་བུ་སློབ་ཚོགས་ལ་གཟིགས།།

མཁན་ཟུར་རིན་པོ་ཆེ་དགོངས་པ་རྫོགས་པར་ཕངས་སེམས་དང་སྐྱོ་བ་སྐྱེ་བཞིན། ལྷག་པར་དུ་སློབ་མ་དག་ཅི་བྱེད་འདི་བྱ་མེད་པའི་གནས་སུ་གྱར་བ་མཐོང་དུས་ཡིད་སྐྱོ་བས་ཁེངས་བཞིན་སྨྲེ་སྔགས་གྱི་ཚུལ་དུ་ཤར་མར་བྲིས་སོ།།

2016/04/15

ལྷ་རམས་པ་ཏྲེ་ཧོར་ཟླ་བ་ཚེ་རིང་གིས་དགེ་ཆོས་ཀྱི་ཀླུ་སྒྲུབ་དགོངས་རྒྱན་སྐོར་ལ་གླེང་མོལ།




འོད་ཐིག་གིས་ཡི་གེར་ཕབ།
ཞིམ་མངར་ཁ་ལ་ཐུག་ཚེ་བྲོ་བ་བྱིན།།
གོས་བཟང་ལུས་ལ་སྦྱར་དུས་དྲོད་འཇམ་སྟེར།།
ད་དུང་མགོ་འཕྲེད་ན་སྐོར་བཞིན་དུ།།
ཐ་སྙད་ཚད་གྲུབ་མི་བཞེད་བློ་མ་བདེ།། 

ཚིགས་བཅད་འདི་ཁོང་གི་གསུང་འབུམ་པོད་བཞི་པ་ (མདོ་སྔགས་བརྗེད་བྱང་ཆེན་མོ) ནང་གི་(སྲིད་ཞི་ལེགས་ཚོགས་ཀུན་གྱི་འབྱུང་གནས་ཐ་སྙད་ཚད་གྲུབ་ཀྱི་རྣམ་གཞག་) ཅེས་པ་ལས་དྲངས།

རྗེ་ཙོང་ཁ་པའི་འཇུག་པའི་ཊཱིཀ་ཆེན་དགོངས་པ་རབ་གསལ་བཤད་ཁྲིད་སྐབས་ཀླུ་སྒྲུབ་དགོངས་རྒྱན་སྐོར་ལ་ཞོར་འཕྲོས་སུ་གསུང་དོན། མཁས་དབང་དགེ་འདུན་ཆོས་འཕེལ་གྱི་ལེགས་བཤད་རྣམས་ལ་བལྟས་པ་ན། ཚིགས་བཅད་ལྷུག་གང་ཡིན་ཡང་ཚིག་སྦྱོར་ཆ་ནས་ནི་རྨད་དུ་བྱུང་བ་ཞིག་རེད། བརྗོད་བྱ་ཕལ་པ་རྗོད་པའི་ཚིག་དུམ་དུམ་ཞིག་ཡིན་ཡང་བསྐྱར་སྐོར་ཡང་བསྐོར་གྱིས་ཀློག་དགོས་པའི་ཚོར་སྣང་དང་སྤྲོ་བ་མི་འདྲ་ཞིག་སྟེར་ཐུབ་འདུག འདི་ལ་དེང་རབས་སྒྱུ་རྩལ་རྩོམ་རིག་ལ་ཉམས་ཞིབ་མཛད་པའི་མཁས་པ་མང་པོས། ཉེ་རབས་ཀྱི་གསར་གཏོད་རང་བཞིན་ལྡན་པའི་ཕུལ་དུ་བྱུང་བའི་རྩོམ་རིག་ཅིག་ལ་ངོས་འཛིན་བྱེད་ཀྱི་འདུག དེ་དངོས་གནས་ཁས་མི་ལེན་དཀའ་མེད་རེད། ཀླུ་སྒྲུབ་དགོངས་རྒྱན་ཡང་ཚིག་སྦྱོར་གྱི་ཆ་ནས་དེ་དང་གཅིག་མཚུངས་རེད། ཤིན་ཏུ་སྙན་པོ་རེད། ཡིན་ན་ཡང་མཁས་པ་ཞིག་ལ་མཚོན་ནའང་འདྲ། མཁས་པ་དེ་དང་དེའི་ལེགས་བཤད་ཅིག་ལ་མཚོན་ནའང་འདྲ། ཆ་ནས་ཐམས་ཅད་ནས་དཀར་རྐྱང་དང་ནག་རྐྱང་དེ་འདྲ་སྲིད་མཐའ་ཙམ་རེད། དགེ་སྐྱོན་གཉིས་ཆ་ཡོད་སྲིད་པ་དང་ཡོད་འོས་པ་ཞིག་རེད། ལེགས་ཉེས་དོ་མི་མཉམ་པའི་སྐབས་སུ་དགེ་སྐྱོན་གང་ཆེ་བརྟགས་ནས་ལེགས་ཉེས་ཀྱི་སྡོམ་ཚིག་བཞག་དགོས་པ་ལས་མཁས་པའི་གསུང་ཡིན་ཚད་ལ་སྐྱོན་ཆ་ཕྲ་མོ་ཙམ་ཡང་ཡོད་མི་ཆོག་པ་དང་འབྱུང་མི་སྲིད་པ་དེ་འདྲའང་གཏན་ནས་མིན། 

བོད་ཀྱི་ཤེས་ཡོན་པའི་སྡེའི་ནང་དུ་མཁས་པ་གང་ཞིག་གི་གསུང་ལ་གཟུ་བོར་གནས་པའི་བློའི་བརྟག་དཔྱད་བྱེད་དུས་གང་ཟག་ལ་གནོད་པའི་ཆེད་དུ་དམིགས་པ་ལྟ་བུའི་ཚོར་སྣང་དང་ལྟ་ཚུལ་གཉིས་ཀ་ཡོང་གི་ཡོད། འདི་ཉེན་ཁ་ཅན་ཞིག་རེད། ཡར་རྒྱས་ཀྱི་བཀག་རྡོ་ལྟ་བུ་རེད། ཞི་བ་ལྷས། ཐུབ་པས་ཉོན་མོངས་དགྲར་གཟིགས་ཤིང་།། ཉོན་མོངས་དང་འབྲེལ་གང་ཟག་མིན།། ཞེས་གསུངས་པ་དངོས་ཡོད་རེད། དམ་པ་རྣམས་ཀྱི་ཞལ་རྒྱུན་ལའང་། གང་ཟག་དག་སྣང་སྦྱོངས། གསུང་ལ་རྟོག་དཔྱོད་གྱིས། གསུངས་པ་དེ་ཚིག་ལྗིད་ཁོག་ཅན་རེད། སྟོན་པ་སངས་རྒྱས་བཅོམ་ལྡན་འདས་ཉིད་ཀྱིས་ཀྱང་ཁོང་གི་གསུང་ལ་བརྟག་དཔྱད་ཞིབ་ཏུ་བྱ་དགོས་པའི་གསུང་ནན་པོ་ཕེབས་ཡོད། འདི་ནང་པའི་ཆོས་དང་ལྟ་གྲུབ་ཀྱི་ཞག་རྩི་གདོན་ས་དེ་རེད། 

ཤར་ནུབ་ཀྱི་མཚན་ཉིད་རིག་པའི་ལྟ་གྲུབ་ལ་ཉམས་ཞིབ་བྱེད་མཁན་གྱི་མཁས་པ་ཞིག་གིས། ཤར་ནུབ་ཀྱི་མཚན་ཉིད་རིག་པའི་ལྟ་གྲུབ་སྨྲ་བའི་གང་ཟག་གི་ཁྱད་པར་བཤད་སྐབས། ཤར་ཕྱོགས་ཀྱི་མཚན་ཉིད་རིག་པ་བ་རྣམས་འགལ་བ་ཅིག་ཅར་བཟོ་མཁན་དང་། ནུབ་ཕྱོགས་ཀྱི་མཚན་ཉིད་རིག་པ་བ་རྣམས་ཅིག་ཅར་འགལ་བཟོ་མཁན་ཞིག་ལ་ངོས་འཛིན་བྱས་ཡོད། དེའི་རྒྱུ་མཚན་ནི། ཤར་ཕྱོགས་མཚན་རིག་པ་བ་རྣམས་ཀྱིས་རང་གིས་དད་པ་བྱ་ས་དང་གུས་པ་བྱ་སའི་གང་ཟག་དེའི་གསུང་ལ་འགལ་བ་ཡོད་མི་ཆོག་པ་དང་། ཡོད་མི་འོས་པ་དང་། དངོས་གསལ་ཅན་གྱི་་འགལ་བ་མཐོང་ཡང་གང་ཐུབ་ཅི་ཐུབ་ཀྱིས་ཡག་ས་དང་ལེགས་ས་ཞིག་ལ་འགྲེལ་ཅི་ཐུབ་བྱེད་ཀྱི་རེད། ནུབ་ཕྱོགས་མཚན་ཉིད་རིག་པ་བ་རྣམས་མཁས་པ་སྔ་མས་གསུངས་དང་མ་གསུངས་ལ་གཙོ་བཏོན་བྱེད་ཀྱི་མ་རེད། རང་གིས་ཀླད་པ་བེད་སྤྱད་བྱས་ནས་དངོས་ཡོད་བརྟག་པར་བྱེད་ཀྱི་རེད་ལ། སྐྱོན་ཡོད་ན་བསྔོགས་ནས་ཐེར་འདོན་ཡང་བྱེད་ཀྱི་རེད་ཟེར་ཡོད།

  སྐད་ཆ་འདི་ཆ་ཐམས་ཅད་ནས་བདེན་པ་ཞིག་ལ་ངོས་འཛིན་བྱེད་མི་ཐུབ་ཀྱང་། དེའི་ནང་དུ་གོ་རྒྱུ་མང་པོ་ཡོད། རང་རང་གི་རྣམ་དཔྱོད་ཀྱི་རྩལ་ཅི་ཡོད་བེད་སྤྱད་བྱས་ཏེ། གསུང་རབ་གང་དང་གང་ལའང་རྟོག་དཔྱོད་ངེས་པར་བྱ་དགོས་པ་ལས། གསུང་རབ་ལ་བརྒལ་བརྟག་དང་དོགས་སློང་བྱེད་དུས་གང་ཟག་ལ་གནོད་སེམས་དང་ངོ་རྒོལ་བྱེད་པའི་བསམ་བློ་བཏང་ན་སངས་རྒྱས་ཀྱིས་གསུངས་པའི་རྟོན་བཞིའི་འཇུག་ལྡོག་གཞི་རྩ་ཁོ་རང་ནས་ནོར་བ་རེད། རང་གི་ཀླད་པ་རྒྱར་བསྐྱེད་མི་ཐུབ་པའི་དོན་མེད་ཀྱི་ཚོད་འཛིན་བྱས་ཟིན་པས་རང་གི་རྣམ་དཔྱོད་ནུས་པ་རང་དབང་གིས་འཕེལ་རྒྱས་འགྲོ་ཐུབ་རྒྱུ་མ་རེད། རྒྱུ་མཚན་ཡོད་མེད་ལ་མ་བལྟས་པར། གཙོ་བོས་ཇི་ལྟར་བཀའ་བསྩལ་པ།། དེ་དག་ཐམས་ཅད་བདག་གིས་བགྱི།། ཟེར་ནས་འདུག་དགོས་ཐུག་གི་རེད། དེ་འདྲ་བྱས་ན་མི་བརྒྱ་ཡིས་བཤད་ན་གཅིག་པ་རེད། མི་བརྒྱ་ཡིས་གཞུང་ལུགས་བརྩམས་ནའང་གཅིག་པ་རེད། ཡར་རྒྱས་ཡོད་མ་རེད། 

རང་ཅག་ལ་ལོངས་སྤྱོད་དུ་ཡོད་པའི་ལྟ་གྲུབ་གཏིང་ཟབ་མོ་དང་། དེ་དང་འབྲེལ་བའི་གཞི་ལམ་འབྲས་བུའི་རྣམ་གཞག་ངོ་མཚར་རྨད་དུ་བྱུང་བ་འཇིག་རྟེན་སྤྱིའི་གཅེས་ནོར་དུ་གྱུར་པ། དེང་སྐབས་མགོ་སེར་ཚན་རིག་པ་སྙན་གྲགས་ཅན་མང་པོས་ཀྱང་བརྟག་དཔྱད་ཞིབ་འཇུག་གི་ཚད་ཤིང་འཛིན་ས་ཆགས་པ་འདི། རྒྱུ་མེད་རྐྱེན་ལས་བྱུང་བ་མིན་པ་སྔར་རྒྱ་གར་ཡིན་ན་ཕྱི་རོལ་པ་རྣམས་དང་རྩོད་པས་འཁོར་ལོ་བསྐོར། བགྲོ་གླེང་ལོ་ཟླ་དང་ཉིན་མཚན་མང་པོ་བསྐྱལ་ནས་བྱུང་བ་ཞིག་དང་། བོད་ལ་མཚོན་ནའང་བོད་སྔ་ཕྱིའི་མཁས་པའི་བར་དུ་ཡིན་ཡང་འདྲ། ཆོས་བརྒྱུད་གཅིག་གི་ནང་དུ་ཡིན་ཡང་འདྲ། ཕན་ཚུན་བརྒལ་བརྟག་དང་རྩོད་པ། བགྲོ་གླེང་དང་། ཞིབ་འཇུག་གཏིང་ཟབ་ཡུན་རིང་བྱས་ནས་བྱུང་ཡོད་པ་ཞིག་ལས། གཅིག་གིས་བཤད་རྐྱང་གཞན་གྱིས་ཉན་རྐྱང་བྱས་ནས་བྱུང་བ་ཞིག་གཏན་ནས་མ་རེད། དེ་འདྲ་ཡིན་དུས་གང་དང་ཅི་ལའང་བརྟག་དཔྱད་དང་ཐེ་ཚོམ་བྱེད་དགོས་པ་ཤིན་ཏུ་གལ་ཆེ་རེད། དང་པོ་ནས་ཡིན་ཤག་བྱེད་རྒྱུ་མེད། དེས་ཁུངས་འཁྱོངས་དཀའ། འདི་བསམ་ཚོད་ཙམ་ཡིན། འགྲིག་མིན་རྣམ་པ་ཚོས་སོམས།

དེ་ནས་ཀླུ་སྒྲུབ་དགོངས་རྒྱན་སྐོར་རེད། དགེ་ཆོས་ཀྱིས་ཀླུ་སྒྲུབ་དགོངས་རྒྱན་ནང་གསུངས་པའི་གཞི་རྩའི་ལྟ་བ་དེ་གསར་པ་ཅི་ཡང་མ་རེད། སྔ་རབས་ཀྱི་གཞུང་ནས་གསུངས་པའི་ལྟ་བ་དེ་རང་རེད། འགའ་ཞིག་གིས། དགེ་ཆོས་ཀྱིས་ཤིང་རྟའི་སྲོལ་གསར་པ་ཕྱེས་པ་དང་། གསར་གཏོད་བྱས་པ་ལྟ་བུ་མཐོང་གི་ཡོད་འདུག དེ་ནི་ནོར་བ་རེད། བོད་སྔ་རབས་ཀྱི་གཞུང་ལུགས་རྣམས་སུ་གསུངས་པའི་ལྟ་གྲུབ་ཀྱི་རྣམ་གཞག་ལ་མ་བལྟས་པའི་སྐྱོན་རེད། གཞི་རྩའི་ཆ་ནས་དགག་གཞི་དང་དགག་བྱའི་ཁྱད་པར་མི་ཕྱེ་བ་སྣང་བ་ཐམས་ཅད་འགོག་པའི་ལྟ་བ་དེ་རང་རེད། དེ་དག་གི་ལྟ་གྲུབ་རྣམ་གཞག་དང་ཇི་མ་ཇི་བཞིན་རེད། ཡིན་ན་ཡང་དཔེ་དང་བཤད་ཐབས་ཕུན་སུམ་ཚོགས་པའི་སྒོ་ནས་ཁ་གསར་པོར་བཟོས་པ་ཙམ་རེད། ཡིན་ཡང་སྔ་རབས་པའི་མཁས་པ་སྤྱིས་གསུངས་པ་དང་མི་འདྲ་ས་གཅིག་ཡོད་པ་ནི། སྔ་རབས་པའི་མཁས་གྲུབ་ཕལ་མོ་ཆེས་ཐ་སྙད་ཚད་གྲུབ་མི་བཞེད་ཀྱང་། ཚད་མས་གྲུབ་པའི་ཆོས་མེད་པར་གཏན་ནས་མི་བཞེད། དགེ་ཆོས་ཀྱིས་ཀླུ་སྒྲུབ་དགོངས་རྒྱན་ལས། ཐ་སྙད་ཚད་གྲུབ་མེད་ཅེས་པ་ཀུན་རྫོབ་དང་དོན་དམ་གང་གིས་ཀྱང་ཁྱད་པར་ཕྱེ་ནས་གསུངས་མི་དགོས་པར་སྤྱི་སྟངས་ནས་ཀ་བུམ་སོགས་འཁྲུལ་སྣང་ཙམ་ལས། ཚད་མས་གྲུབ་པ་གཏན་ནས་མི་འདོད་པ་རེད། བོད་སྔ་རབས་པའི་མཁས་གྲུབ་ཕལ་མོ་ཆེས་དོན་དམ་དཔྱོད་བྱེད་ཀྱིས་བརྟགས་པའི་ཚེ་དགག་གཞི་ཀ་བུམ་སོགས་བཀག་དགོས་པར་གསུངས་པ་ལས། སྤྱི་ན་ཀ་བ་དང་བུམ་པ་མེད། འགྲོ་འཆག་ཉལ་འདུག་གི་སྤྱོད་ལམ་མེད། ཁ་ལ་ཟ་རྒྱུ་དང་རྒྱབ་ལ་གོན་རྒྱུ་མེད་ཅེས་གཏན་ནས་མི་ཟེར། ཀླུ་སྒྲུབ་དགོངས་རྒྱན་དུ་གསར་གཏོད་ཅིག་ཡོད་ན་འདི་རེད། འདི་གསར་རྙིང་སུས་ཀྱང་ཁས་ལེན་རྒྱུ་མ་རེད། དེའི་རྒྱུ་མཚན་གྱིས། རྡོ་སྦིས་དགེ་བཤེས་ཤེས་རབ་རྒྱ་མཚོས་གསར་མིན་རྙིང་མིན་གཏོགས་པའི་བར་དོ་བ། ཞེས་གསུངས་པའང་ཐུགས་བདེན་པ་རང་རེད།

 དེ་ནས་ཡང་ཁོང་གིས་གསུངས་པའི་ལྟ་བ་འདི། པཎ་ཆེན་བློ་བཟང་ཆོས་རྒྱན་དང་། གུང་ཐང་བསྟན་པའི་སྒྲོན་མེས་ཀྱང་ལྟ་བ་འདི་ཁོ་ན་གསུངས་ཡོད། ཅེས་ཀླུ་སྒྲུབ་དགོངས་རྒྱན་ལས་གསུངས་ཡོད། དེ་ནི་ཡོངས་སུ་ནོར་བ་རེད། པཎ་ཆེན་བློ་བཟང་རྒྱན་གྱི་གསུང་འབུམ་པོད་ལྔ་དང་རྗེ་གུང་ཐང་པའི་གསུང་འབུམ་པོད་བརྒྱད་ཡོད་པས་དེ་གཉིས་གང་དུ་ཡང་ལྟ་བ་དེ་ཁོ་ན་གསུང་རྒྱུ་ཕར་ཞོག དེ་འདྲ་གསུངས་པའི་ཟིན་ཙམ་ཡང་མཁས་པ་དེ་གཉིས་ཀྱི་ལེགས་བཤད་དེ་དག་ལས་མཇལ་དུ་མེད། མཁས་པ་འདི་གཉིས་ཀྱི་གསུང་ལས། ལྟ་གྲུབ་ཀྱི་རྣམ་གཞག་ནི། རྗེ་ཙོང་ཁ་པ་ཆེན་པོས་ལེགས་བཤད་ནས་ཇི་ལྟར་འབྱུང་བ་ལྟར། དོན་དམ་དཔྱོད་པའི་རིགས་ཤེས་ཀྱིས་ལས་འབྲས་དང་ལས་འབྲས་ཀྱི་རྟེན་གཞིར་གྱུར་པའི་གང་ཟག་དང་ཆོས་མ་བཀག་ཅིང་། དགག་གཞི་ལ་མི་གནོད་པའི་སྟེང་ནས་དགག་བྱ་རང་བཞིན་གྱིས་གྲུབ་པ་བཀག་པའི་ལྟ་བ་འདི་ཁོ་ན་རྩལ་དུ་བཏོན་ནས་གསུངས་ཡོད། འདི་ཤེས་དགོས་པ་གཅིག་རེད།
 དེ་ནས་ལྕང་སྐྱ་རོལ་པའི་རྡོ་རྗེའི་ལྟ་མགུར་ཨ་མ་ངོས་འཛིན་དུ། སྣང་བ་ལིངས་ལིངས་འདི་རང་སོར་བཞག་ནས།། དགག་རྒྱུ་རྭ་ཅན་ཞིག་འཚོལ་བར་འདུག་སྟེ།། ཞེས་པས་དགག་གཞི་དང་དགག་བྱའི་ཁྱད་པར་མ་ཕྱེ་བར་དགག་གཞི་ཉིད་ཀྱང་བཀག་དགོས་པ་དང་ལྷག་པར་མཐོང་ཐོས་མྱོང་གསུམ་སོགས་ཡོད་ཚད་ཐམས་ཅད་བཀག་དགོས་པའི་ཤེས་བྱེད་དུ་ཀླུ་སྒྲུབ་དགོངས་རྒྱན་དུ་བཀོད་ཡོད། འདི་ཡང་གཏན་ནས་ནོར་བ་ཡིན། ལྟ་མགུར་མཛད་པ་པོ་ལྕང་སྐྱ་རིན་པོ་ཆེ་རང་ཉིད་ཀྱིས་མཛད་པའི་ཡོངས་སུ་གྲགས་པའི་གྲུབ་མཐའ་ཐུབ་བསྟན་ལྷུན་པོའི་མཛེས་རྒྱན་དུ། སྣང་བ་ལིངས་ལིངས་ཞེས་པ་དབུ་མ་པས་བདེན་གྲུབ་ཀྱི་ཐ་སྙད་དུ་བཞེད་པར་ཤིན་ཏུ་གསལ་བར་གསུངས་ཡོད། འདིས་སྣང་བ་ལིངས་ལིངས་ཞེས་པ་བདེན་གྲུབ་ལ་མི་བཞག་པར་དགག་གཞི་ཀ་བུམ་སོགས་པ་འཇོག་དགོས་པར་ལྕང་སྐྱའི་དགོངས་པ་གཏན་མིན་པའི་གསར་བཤད་ཁུངས་གསལ་ཤོས་སུ་གྱུར་ཡོད། རྒྱུ་མཚན་དེ་གཉིས་རྩོམ་པ་པོ་གཅིག་ཡིན་པས་དགོངས་པར་འགྲོ་མིན་ཐེ་ཚོམ་བྱེད་དགོས་དོན་ཡོད་མ་རེད། སྣང་བ་ལིངས་ལིངས། ཞེས་པ་སྐབས་སྟོབས་ཀྱིས་དོན་སྣ་ཚོགས་ལ་འཇུག་པའི་ཚིག་ཅིག་ཡིན་པ་ཙམ་ལས། དོན་བྱེ་བྲག་གཅིག་བསྟན་པའི་རང་ཚུགས་ཅན་གྱི་ཚིག་ཀྱང་མ་རེད། དེ་གཅིག་རེད།

དེ་ནས་ཡང་། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན།། ཞེས་པའི་གསུང་འདི་སངས་རྒྱས་ཀྱི་བཀའ་ཡིན་པ་ཀླུ་སྒྲུབ་དགོངས་རྒྱན་ལས་གསུངས་ཡོད་རེད། དེ་ཡང་ཁག་པོ་རེད། ཚིགས་བཅད་འདི་ད་ལྟར་རང་ཅག་གིས་ལོངས་སྤྱོད་ཅིང་བསོད་ནམས་ཀྱི་གོ་སྐལ་དུ་བཞུགས་པའི་བཀའ་འགྱུར་གླེགས་བམ་བརྒྱ་ལྷག་བཞུགས་པ་ཡོད་པ་དེའི་ནང་གསུང་འདི་མཇལ་དུ་མེད་པ་ཆེད་ལས་ཀྱི་ཉམས་ཞིབ་པས་གསུངས་ཡོད། གཞུང་ཤོ་ལོ་ཀ་འདི་སློབ་དཔོན་རིན་ཆེན་གྲགས་པས་མཛད་པའི་སྦྱོར་བཞི་ལྷའི་བསྟོད་པའི་ནང་གི་སྐུའི་དཀྱིལ་འཁོར་གྱི་བསྟོད་པ་ལས་གསུངས་ཡོད། དེས་ན་འདི་རྗེས་འཇུག་གི་སློབ་དཔོན་གྱིས་མཛད་པའི་བསྟན་འགྱུར་ཡིན་པ་ལས་རྒྱལ་བའི་བཀའ་མིན་པར་གསལ་པོར་ཆགས་པ་རེད། བོད་གཞན་རྣམས་ཀྱིས་སྒྲ་གཅན་འཛིན་གྱིས་ཡུམ་ལ་བསྟོད་པའི་གཞུང་དུ་བཤད་ཀྱང་། སྒྲ་གཅན་འཛིན་གྱི་བསྟོད་ཚིག་ཏུ་བཀའ་བསྟན་རང་ལས་ད་བར་གསལ་པོ་ཆགས་མེད།  འདི་རྣམས་ངས་ཀླུ་སྒྲུབ་དགོངས་རྒྱན་ལ་དོགས་གཞི་བྱུང་བ་དྲན་ཚོད་ཙམ་ཡིན།

གང་ལྟར་ཀླུ་སྒྲུབ་དགོངས་རྒྱན་གྱི་ལྟ་བ་འདི་གཞི་རྩའི་ཆ་ནས་བོད་སྔ་རབས་པའི་ལྟ་གྲུབ་དང་མཐུན་ཤོས་ཆེ་ཡང་། དགག་གཞི་དང་དགག་བྱ་ཁྱད་མ་ཕྱེད་པར་ཡོད་ཚད་དོན་དམ་དཔྱོད་བྱེད་ཀྱིས་བཀག་པར་འདོད་པའི་ཆ་ནས་རྗེ་ཙོང་ཁ་པ་རྗེས་འབྲང་དང་བཅས་པའི་ལྟ་གྲུབ་དང་གཏན་ནས་མ་མཐུན་པ་རེད། དོན་དམ་དང་ཀུན་རྫོབ་ཀྱི་ཁྱད་པར་མ་ཕྱེད་པར་སྤྱི་སྟངས་ནས་ཁ་ལ་ཟ་རྒྱུ་དང་རྒྱབ་ལ་གོན་རྒྱུ། འགྲོ་ས་དང་བསྡད་ས་ཐམས་ཅད་ཚད་མས་མ་གྲུབ་ཅིང་དེ་དག་ཡོད་སྙམ་པ་འཁྲུལ་སྣང་ཁོ་ནར་འདོད་པའི་ཆ་ནས་སྔ་རབས་པའི་ལྟ་གྲུབ་ཕལ་མོ་ཆེ་དང་མ་མཐུན་པར་གྱུར་པ་རེད། དེས་ན་གསར་མིན་རྙིང་མིན་དུ་གྱུར་འདུག་ཅེས་དགེ་བཤེས་ཤེས་རབ་སོགས་ཀྱིས་གསུངས་དོན་ཡང་འདི་རེད། 

ཀླུ་སྒྲུབ་དགོངས་རྒྱན་དགེ་ཆོས་དགོངས་པ་རྫོགས་པའི་རྗེས་རྗེས་ནས་བཏོན་པ་ཞིག་རེད། གསུང་གི་ཆ་དུ་མ་ལ་ལྷད་ཞུགས་པའི་དོགས་པ་ཡང་ཆེན་པོ་ཡོད་རེད། དཔེ་མཚོན་ཡག་ཤོས་གཅིག་ནི། དགེ་ཆོས་དངོས་སློབ་རྒན་པོ་ཤེར་རྒྱམ་ཟེར་བས་བྲིས་པའི་དགེ་ཆོས་རྣམ་ཐར་དུ། དགེ་ཆོས་ཀྱིས། ཏྲེ་ཧོར་སྐྱོར་དཔོན་རིན་པོ་ཆེ་སྨོན་ལམ་དུ་དགེ་བཤེས་དམ་བཅའ་འཇོག་ཁར་བྲོས་འདུག་ཟེར། ཕ་བཟང་བུ་རེད། མིང་སྐམ་པོས་ཅི་ཕན། ཞེས་གསུངས་བྱུང་ཞེས་བྲིས་ཡོད་པ་རེད། ཤིན་ཏུ་རྫུན་ཆེན་པོ་རེད། གྲུབ་པའི་དབང་ཕྱུག་ཏྲེ་ཧོར་སྐྱོར་དཔོན་རིན་པོ་ཆེ་དགེ་བཤེས་དམ་བཅའ་བཞག་སྟེ་གདན་ས་གསུམ་གྱི་ནང་ནས་དགེ་བཤེས་ལྷ་རམས་ཨང་དང་པོ་བླངས་ཏེ་རྒྱུད་སྨད་ལའང་ཕེབས་པ་རེད། དེ་ནས་བྱ་བྲལ་ལ་ཕེབས་པ་རེད། འདི་གནའ་དེང་གི་གདན་སའི་གསར་བུ་ཡན་ཆད་ལའང་ཡོངས་སུ་གྲགས་པ་ཞིག་རེད། དགེ་ཆོས་དང་དམ་པ་ཁོང་གཉིས་མི་ཐོག་གཅིག་རེད། གཉིས་ཀ་གདན་ས་འབྲས་སྤུངས་ནས་རེད། ངོ་ཤེས་ཡང་རེད། དགེ་འདུན་ཆོས་འཕེལ་གྱིས་རྫུན་དེ་འདྲ་གསུང་རྒྱུ་རེད་དམ། གསུང་གི་མ་རེད། སློབ་མ་ངན་པས་བླ་མ་ཟོག་པོར་གཏོང་ཟེར་བ་འདི་འདྲ་ལ་ཟེར་རེད། མ་གསུངས་པ་དེ་གསུངས་རེད། མ་གནང་བ་དེ་གནང་རེད། ཅེས་བཤད་དེ་རྙོག་དྲ་སྣ་ཚོགས་བཟོས་པ་འདས་པའི་བྱུང་རབས་ལ་བལྟས་ནའང་ཆེས་མང་པོ་རེད། ད་ཀླུ་སྒྲུབ་དགོངས་རྒྱན་སྐོར་ཞོར་འཕྲོས་དེ་ཙམ་ཡིན།
ད་རིང་འདིར་རི་བོང་གི་མཆུ་ཤོ་ས་ནས་བཤད་ཡོད། ཀླུ་སྒྲུབ་དགོངས་རྒྱན་གྱི་སྤུ་འཇམ་ས་ནས་བཤད་དགོས་ན་མང་པོ་བཤད་རྒྱུ་ཡོད། རྗེས་སུ་དུས་ཚོད་ཟུར་དུ་བྱུང་ན་གླེེང་མོལ་ཞིབ་ཏུ་བྱ་ཆོག (ཚང་མ་དགོད་སྒྲས་ཁྱབ།)

2016/04/14

འཆད་ཁྲིད་བྱ་ཐབས་སྐོར་གྱི་བསམ་འཆར་ཚིག་གཉིས།


ལྷ་རམས་པ་ཏྲེ་ཧོར་ཟླ་བ་ཚེ་རིང་།
འདི་ནས་འཆད་ཁྲིད་བྱ་ཐབས་དང་འབྲེལ་བའི་རྨོངས་འཆར་རེ་གཉིས་བརྗོད་འདོད་བྱུང་། དེང་ཁྲི་ཁར་མངོན་པར་འགྱིངས་པའི་ཆེ་གེ་མོ་ཡིན་སྐད་གྲགས་པ་འགའ་རེས་གསུངས་པ་གོ་ཐོས་ལ།  མང་ཚོགས་ཀྱིས་མ་གོ་བའི་ཆོས་ཤིག་གསུངས་ན་ཆོས་འཆད་སྟངས་མི་མཁས་པའམ། ཡང་ན། ཚོར་བ་དངོས་དང་མ་མཐུན་པས་ཆོས་ཁྲིད་ལེགས་པོ་མིན་པར་སྨྲ་ཞིང་།

"སྐྱབས་སུ་མཆི།"
བླ་མ་ག་གེ་མོ་རང་ཉིད་ཀྱིས་ནི་དུས་ནམ་ཞིག་ཡིན་ཡང་། གནས་སྐབས་ཀུན་ཏུ། ཆོས་ཅི་ཞིག་གསུངས་ཀྱང་། འགྲོ་འཆག་ཉལ་འདུག་གི་སྤྱོད་ལམ་རྐྱང་རྐྱང་གི་བསླབ་བྱ་དེ་འདྲ་ཁོ་ནའི་སྟེང་དུ་དབུ་འཁོར་བ་དང་། དེ་ལས་ཅུང་ཟད་ཚད་མཐོ་ན་སྐྱབས་འགྲོའི་བསླབ་བྱ་ཙམ་རེ་ངོ་སྤྲོད་བྱས་ནས་ལོ་འཁོར་མར་འདི་ཙམ་ཞིག་གི་ནང་དུ་གླུ་བརྒྱ་ངག་གཅིག་གི་ཚུལ་དུ་བསྐོར་ནས་འདུག སྟོན་པ་ཐུབ་པའི་དབང་པོའི་དཔྱད་གསུམ་རྣམ་པར་དག་པའི་བཀའ། རྒྱ་གར་ཚད་ཐུབ་ཀྱི་པཎ་གྲུབ་རྩོད་མེད་དག་གིས་ཞིབ་ཏུ་བཀྲལ་བ། བོད་ཁ་བ་ཅན་ལ་ཤིན་ཏུ་བཀའ་དྲིན་ཅན་གྱི་ལོ་ཙཱ་བ་རྣམས་ཀྱི་དཀའ་སྤྱད་བརྒྱ་ཕྲག་གིས་བསྒྱུར་བ། རིས་སུ་མ་ཆད་པའི་བོད་སྔ་ཕྱིའི་བླ་མ་དམ་པ་དག་གིས་མན་ངག་ཟབ་མོས་ཞིབ་བཤད་ཀྱིས་གཏན་ལ་ཕབ་པའི་འཇིག་རྟེན་སྤྱིའི་གཅེས་ནོར་དུ་གྱུར་པའི་ཐེག་པ་ཆེ་ཆུང་སྔགས་དང་བཅས་པ་འཇིག་རྟེན་ཀུན་ལ་ཕན་བདེ་ལེགས་ཚོགས་ཟད་མི་ཤེས་སྟེར་བའི་གཞི་ལམ་འབྲས་བུའི་རྣམ་གཞག་ངོ་མཚར་བ་ཡོད་པ་དག་ཡལ་བར་དོར། དེ་འདྲའི་འགྲེལ་བཤད་ནི་འཆད་ཁྲིད་མཁན་རང་ཉིད་ཀྱིས་ཤེས་ཐབས་བྱས་པར་ཕར་བཞག གཞུང་ལུགས་ཆེན་པོའི་ཆོས་སྐད་དེ་འདྲ་ནི་དགོས་པ་མེད་ཅིང་། མགོ་ན་བའི་རྒྱུར་སེམས་པ། ད་དུང་གཤགས་འབྱེད་ཐབས་ཙམ་རེད། དགོས་པ་མེད་པས་བཤད་ནས་ཅི་ཕན། ཞེས་སྡིག་སྙིང་ཆེན་པོས་ལོག་འགྲེལ་ཡང་བརྒྱབ།

ཤིན་ཏུ་ཡིད་ཕམ་པ་ཞིག་ལ། གདན་ས་ཆེན་པོར་བློ་གཉེར་བྱས་པའི་དགེ་བཤེས་དང་མཁན་པོ་འགའ་རེས་ཀྱང་རང་ནོར་ཉམས་ཀྱིས་མ་ཆོད་པ། གཞན་གྱི་མཆིང་བུ་ཙམ་ལ་འགྲམ་ཆུ་ལྡང་སྟེ། མི་ཚེ་ཧྲིལ་པོར་བློ་གཉེར་དཀའ་སྤྱད་བྱས་པའི་བློ་སྦྱོང་འདིས་ནང་ཆོས་ངོ་སྤྲོད་ཀྱི་གོ་མ་ཆོད་པར་དེ་དག་ཡལ་བ་དོར་ཏེ་ཟ་སྟངས་འདུག་སྟངས་ལེགས་པོར་བྱེད་དགོས་པའི་བསླབ་བྱ་ཙམ་གྱི་སྟེང་དུ་ལྟག་ལོག་བརྒྱབ་ཅི་ཐུབ་བྱེད་པ། 

ཡང་དེའི་རིགས་སུ་གཏོགས་པའི་སྙིང་ལ་བདུད་ཏོ་ཞུགས་པའི་ཁ་དྲག་ཅན་འགའ་རེས་ཀྱང་གདན་ས་ཆེན་མོའི་སློབ་ཁྲིད་བྱ་ཐབས་ལའང་བསྐྱར་ཞིབ་དགོས་ཚུལ་བཤད་དེ་གདན་ས་ཆེན་པོའི་སློབ་ཁྲིད་བྱ་ཐབས་ཀྱང་སླ་ཆོས་ཁོ་ནར་བྱེད་དགོས་པའི་རེ་ངན་བཅངས་པ་ནི། ནང་བསྟན་སྤྱི་དང་ལྷག་པར་བོད་བརྒྱུད་ཁྱད་འཕགས་ཀྱི་ནང་བསྟན་རིན་ཐང་བྲལ་བ་འདི་རྟོག་དཔྱོད་ཞིབ་འཇུག་དང་ཉམས་ལེན་གཏིང་ཟབ་བྱ་རིན་མེད་པར་གསོལ་འདེབས་སྨོན་ལམ་ཙམ་དང་། ལྷ་སྒྲུང་འདྲེ་སྒྲུང་ཙམ་གྱི་གཏམ་རྒྱུད་ཀྱི་ལྗིད་ཁོག་ལས་མེད་པའི་བྱབ་ཆུང་དོན་ཆུང་གི་ལམ་དུ་བརྫང་པའི་སྟ་གོན་མཉམ་དུ་བྱས་པ་ཞིག་ཅི་ལ་མིན།

དང་པོ།
དཔལ་ཆོས་གྲགས་ཀྱིས། ཐབས་བྱུང་དེར་གྱུར་ལྐོག་གྱུར་པ།། དེ་འཆད་པ་ནི་དཀའ་བ་ཡིན།། ཞེས་གསུངས་པས། རང་གིས་མ་ཤེས་ན་གཞན་ལ་འཆད་པའི་གཞི་མེད་པས་སློབ་གཉེར་ཚུལ་བཞིན་བྱེད་དགོས། གཞན་དུ། རང་གིས་མ་མཁྱེན་པ་རྒྱུ་མཚན་དུ་བྱས་ནས་གཞན་གྱིས་ཀྱང་ཤེས་མི་ཆོག་པ་དང་། ཤེས་མི་རུང་བ་དང་། ཤེས་ཀྱང་ལོག་པར་ལྟ་བ། དངོས་ཤུགས་བརྒྱུད་གསུམ་ནས་ངས་བཤད་པ་འདི་ལས་གཞན་མེད། ཡོད་ན་ལོག་པ་ཡིན་པའི་གོ་བ་བརྡ་ལོག་གི་བཀའ་མོལ་ནམ་ཡང་གསུང་མི་རུང་། རང་ཉིད་ལ་ཁ་ཕྱོགས་པའི་སློབ་མ་རྣམས་སེམས་གཏིང་ནས་ཕན་སེམས་ཡོད་ན་རང་གིས་ཇི་ཙམ་ཕན་ཐོགས་མིན་ནི་རང་བློ་རང་ལ་ལྐོག་ཏུ་མ་གྱུར་པས། རང་ལ་དེ་ཙམ་གྱི་ནུས་པ་མེད་ན་ཡང་དག་པའི་ལམ་བཟང་སྟོན་པའི་བཤེས་གཉེན་རྣམ་དག་དང་ཚད་ཐུབ་ཅིག་མཚམས་སྦྱོར་ངེས་པར་བྱ་དགོས། དེ་འདྲའི་ལྟ་བ་དང་འཆར་སྒོ་ཡངས་པའི་སློབ་དཔོན་དེ་ནི་གཏན་གྱི་མདུན་མའི་གཞི་འཛུགས་པའི་དམིགས་བུ་བཟང་པོ་ཞིག་ལ་ངོས་འཛིན་བྱ་འོས།

གཉིས་པ།
སྟོན་པ་སངས་རྒྱས་ཀྱིས་ཆོས་ཕུང་བརྒྱད་ཁྲི་བཞི་སྟོང་སོགས་གསུངས་པ་ལ་དགོས་པ་ཁྱད་པར་ཅན་ཅི་ལ་མེད། རྒྱ་གར་པཎ་གྲུབ་བཅུ་བདུན་སོགས་ཀྱིས་དཔྱད་གསུམ་རྣམ་པར་དག་ཅིང་། དགག་བཞག་སྤོང་གསུམ་གྱི་སྒོ་ནས་བསྟན་འགྱུར་གླེགས་བམ་ཉིས་བརྒྱ་ལྷག་ཙམ་ཤུལ་བཞག་མཛད་པ་ལ་དོན་ཆེན་པོ་ཞིག་ལོས་ཡོད། བོད་སྔ་ཕྱིའི་རིས་མེད་མཁས་གྲུབ་ཚད་ཐུབ་དག་གིས་བསྐྱར་འགྲེལ་ཡང་འགྲེལ་བྱས་པའང་དགོས་པ་མེད་པ་ཅི་ལ་ཡིན།

 དེས་ན་གདུལ་བྱ་དབང་པོ་རབ་འབྲིང་ཐ་གསུམ་ལ་ཆོས་ཀྱི་གནས་ཚོད་ཀྱང་དེ་དང་འཚམ་པར་འཆད་ཁྲིད་བྱེད་དགོས་པ་ལས། བཤད་ཚད་མི་དགེ་བཅུ་དང་མཚམས་མེད་ལྔ་ཁོ་ནའི་སྟེང་དུ་བསྐོར་ནས་བཞུགས་ཚེ་སངས་རྒྱས་ཀྱི་ཆོས་ཚུལ་རྨད་དུ་བྱུང་བ་འདི་ལ་གཏིང་ཚུགས་པའི་བྲོ་བ་ཞིག་རྙེད་མི་སྲིད། སངས་རྒྱས་ཀྱི་ཆོས་ཚུལ་སླ་ཆོས་དེ་ཙམ་ལས་ཞག་རྩི་གདོན་རྒྱུ་མེད་ཚེ་པཎ་གྲུབ་བཅུ་བདུན་དང་བོད་ཀྱི་མཁས་པ་རྣམས་ཀྱི་གླེགས་བམ་རི་རབ་ཀྱི་བོང་ཚོད་མཉམ་པ་ཤུལ་འཇོག་དགོས་དོན་ཅི་ཡོད།

གསུམ་པ། 
ནང་ཆོས་ལ་གོ་རྟོགས་དམན་པའི་སྤྱི་ཚོགས་ནང་མང་ཚོགས་སུ་གོ་བདེ་ཞིང་ཡིད་ལ་འཇགས་སླ་བའི་གོ་ཙ་ཉན་བདེའི་བཀའ་མོལ་གསུངས་ཐུབ་པ་ནི་ཆོས་འཆད་ཁྲིད་པ་ཞིག་ལ་ངེེས་པར་དགོས་པའི་ཁྱད་ཆོས་གལ་ཆེ་ཞིག་ལོས་ཡིན་ཡང་། བློ་རབ་འབྲིང་ཐ་གསུམ་དང་བསྟུན་ནས་ཆོས་ཚུལ་ཡང་ཕྲ་རགས་བར་གསུམ་འཆད་ཤེས་དགོས་པ་ལས། ཐུག་ཚོད་ལ་བརྒྱ་ཁ་གཅིག་ཆོད་བྱ་མི་རུང་། ཁྱད་པར་སྐབས་གང་ཡིན་གྱི་བརྗོད་དོན་ལ་མཐར་ཆོད་པའི་གཞུང་བཤད་དང་། རྩོད་བཤད་གཏིང་ཚུགས་པ་དགོས་པ་ལས། སྐབས་དོན་སྟོར་ནས་བཀའ་མོལ་མང་ཆེ་ཤོས་སྤྱི་ཚོགས་ཇུས་གཏོགས་འབའ་ཞིག་ཏུ་སོང་དྲགས་པས་འོག་གི་སློབ་ཚོགས་རྣམས་སྐད་ཤོར་བའི་དགོད་བྲོ་བའི་གནས་ཚུལ་བྱུང་བ་ལའང་ཐུགས་སྣང་དགོས།

ངས་བཤད་འདོད་པ་ནི། རིས་མེད་གདན་ས་ཆེན་པོ་དག་གི་འཆད་ཁྲིད་བྱ་ཐབས་རྨད་དུ་བྱུང་བ་འདི་དག་གི་རིན་ཐང་མ་མཐོང་བར་དེ་དག་རང་གིས་གང་འཚམ་ཤེས་བཞིན་དུ་ཡལ་བར་དོར་ཞིང་། དེས་ཆོས་འཆད་ཁྲིད་ཀྱི་གོ་མི་ཆོད་པར་ཆོས་འཆད་ཁྲིད་ཟེར་དུས་གྲོང་པར་སློབ་གསོ་གཏོང་སྟངས་ལྟ་བུའི་སྐད་ཆ་ཁོ་ན་ཞིག་ལ་ངོས་འཛིན་པ་ནི་ཆེས་ནོར་བའི་བསམ་འཆར་ཞུ་བཞིན་པ་ལས། དེ་དག་དགོས་མེད་དུ་གཏན་ནས་ངོས་འཛིན་བྱས་པ་མིན་པའང་འདི་ནས་ཤེས་དགོས་པར་ཤིན་ཏུ་གལ་ཆེའོ།།

བཞི་པ། 
ནང་པའི་གཞི་ལམ་འབྲས་གསུམ་ལ་ཐེམ་པ་རིམ་འཛེག་གི་བརྒྱུད་རིམ་ཞིབ་ཅིང་ཕྲ་བ་ཡོད་པས། ཚེས་གཅིག་ནས་སུམ་ཅུ་བར་དམྱལ་བའི་སྡུག་བསྔལ་དང་། དལ་འབྱོར་རྙེད་དཀའ་འབའ་ཞིག་གིས་གོ་ཆོད་དཀའ་བས། གོ་རིམ་དང་། འཆར་གཞི་ལྡན་པའི་འཆད་ཁྲིད་བྱ་དགོས། རྙིང་དོར་བཅུད་ལེན་ཞེས་པ་སྔ་སྲོལ་ཡོད་དོ་ཅོག་ཕན་མེད་གད་སྙིགས་ལ་བསྒྱུར་དགོས་པའི་དོན་གཏན་ནས་མིན་པ། དངོས་ཐོག་བདེན་འཚོལ་གྱིས་འཕྲལ་ཕུགས་ཀུན་ལ་ཕན་པ་ཡོད་མེད་བརྟགས་ཏེ། འདོར་ལེན་དགོས་པའི་དོན་ཡིན།

ལྔ་པ། 
གདན་ས་ཆེན་མོའི་ར་བའི་ནང་བཞུགས་པའི་སློབ་གཉེར་བ་དག་ནི་ནང་བསྟན་སློབ་གཉེར་ཚད་མཐོ་ཤོས་རིམ་པ་དང་པོའི་གྲས་སུ་གཏོགས་པས། འདི་དག་ལ་སློབ་ཁྲིད་བྱེད་སྟངས་གོ་བདེ་རགས་རིམ་དང་། བམ་བཤད་ཚིག་འགྲེལ་ཙམ་གྱི་ཁྲིད་ཐབས་སྟབས་བདེར་བསྒྱུར་དགོས་པར་འདོད་པ་ནི། ཆེས་ཤིན་ཏུ་ཡིད་དབང་འཕྲོག་ཅིང་སྤུས་ཚད་ལྡན་པའི་གདན་སའི་དཔེ་ཁྲིད་བྱ་ཐབས་རྨད་དུ་བྱུང་བ་དག་ལ་རྒྱུས་མངའ་ལྟ་ཞོག་དྲི་མ་ཙམ་ཡང་སྣོམ་མྱོང་མེད་པའི་གདོན་ལག་ནང་དུ་བསྲིངས་པ་སྟེ། ཐུན་མོང་མིན་པའི་འཆད་ཁྲིད་ཀྱི་ཕྱག་སྲོལ་འདི་དག་ཆ་རྒྱུས་ཅུང་ཟད་ཙམ་ཡོད་ན། ལ་ཕུག་གི་སྡུག་བསྔལ་ཆེ་རབས་ལྟ་བུའི་རགས་བཤད་ཙམ་གྱིས་མདོ་རྒྱུད་དགོངས་འགྲེལ་དང་བཅས་པའི་དཀའ་གནད་གསེད་བཀྲོལ་ཐུབ་མིན་བརྟག་ན་ཤེས་སླ་སྟེ།

རིགས་པའི་དབང་ཕྱུག་ཡབ་སྲས་ཀྱི་ཚད་མ་རིག་པའི་རིགས་ལམ་དྲི་མ་མེད་པ་རྨང་གཞིར་བྱས་པའི་སྟེང་དུ་དགག་གཞག་སྤོང་གསུམ་དང་། དཔྱད་གསུམ་རྣམ་པར་དག་པའི་ལམ་ནས་སྤྱིའི་ཁོག་འབུབས། ཚིག་གི་དངོས་འགྲེལ། དོན་གྱི་སྐབས་བབ། གཞུང་སྔ་ཕྱིའི་འབྲེལ། དེ་འབྲེལ་རིས་མེད་ཀྱི་གཞུང་གཞན་དང་ཞིབ་བསྡུར། བཀའ་བསྟན་ཁུངས་འཚོལ་བ་སོགས་ཀྱིས་གཏིང་ཚུགས་པའི་སྲོལ་རྒྱུན་ཞིབ་ཁྲིད་ཀྱི་མན་ངག་བཟང་པོ་རྡོ་ལག་བརྒྱུད་ཀྱི་ཚུལ་དུ་གནས་པ་འདི། རང་ལ་ཡོད་གོ་ཆོད་པ་དང་། གཞན་ལ་ངོམ་རིན་ཡོད་པའི་རིན་ཐང་གཞལ་དུ་མེད་པའི་ནོར་བུ་ཞིག་ཡིན་པ་འདི་ང་དང་ང་ལྟ་བུའི་ཀླད་མེད་གཞན་གྱི་ཟེར་རྗེས་པ་དག་ལ་དྲན་གསོ་ནན་མོ་ཐེངས་ཤིག་བྱ་འདོད་བྱུང་།

རྒྱུ་མཚན་ནི། ཁྲིད་ཐབས་འདིས་སྐབས་བབ་གནས་ལུགས་ཅི་ཞིག་གཏན་འབེབས་བྱས་ཀྱང་། རིགས་པའི་ལམ་ནས་སོ་སོའི་སྤུ་རིས་མ་འདྲེས་པར་འབྱེད་པ། གཏིང་ཚུགས་པའི་ངེས་པར་སྟེར་བ། གྲུབ་དོན་ལ་ལྡོག་ཏུ་མེད་པའི་ཡིད་ཆེས་བརྟན་པ་རྙེད་པ་སོགས་ཀྱི་ལག་རྗེས་ལ་ནི་གང་གིས་ཀྱང་ཁྲིད་ཐབས་འདིའི་ཚབ་མཚོན་བྱེད་མི་ཐུབ་པ་མྱོང་བས་ཀྱང་གྲུབ་པ་འདིའོ།།

དྲུག་པ།
འཕགས་མཆོག་སྤྱན་རས་གཟིགས་ཀྱིས་ཀྱང་། ཉེ་དུས་བཀའ་སློབ་ཅིག་ཏུ།
 "འགའ་ཞིག་གིས་ནང་པའི་ཚན་རིག་དང་ལྟ་གྲུབ་ཀུན་བཏུས་མཁྲེགས་དྲགས་འདུག གོ་མི་ཐུབ་ཟེར་མཁན་འདུག ཆོ་མེད་པའི་སྐད་ཆ་རེད། མ་གོ་བ་དེ་ཨེ་གོ་ལྟ་དགོས་པ་རེད། དེ་ལ་ཡར་རྒྱས་ཟེར། ཤེས་ཤེས་པ་ཡིན་ན་གླེགས་བམ་འདི་སྒྲིག་དགོས་དོན་ཅི་ཡོད"ཅེས་གསུངས་པ་འདི་ལ་ཀུན་གྱིས་དགོངས་བཞེས་མཛད་དགོས། རྨོངས་འཆར་གང་དྲན་ལྷུག་པོར་བརྗོད་ཅིང་དཀར་ནག་ཕྲ་གསུམ་དངོས་མཐོང་གིས་མྱོང་བ་དང་ལྟ་ཚུལ་ཆ་ཙམ་གསོང་པོར་སྨྲས་པ་འདི་ཡང་འུ་ཅག་ཐུན་མོང་གི་བསམ་པའི་ལོངས་སྤྱོད་བླ་ན་མེད་པ་བོད་བརྒྱུད་ནང་བསྟན་ལ་གཅེས་སེམས་ཉག་གཅིག་གིས་ཞུས་པ་ལས་གང་ཟག་བྱེ་བྲག་ཅིག་ལ་དམིགས་རྟེན་བཞག་པ་གཏན་མིན་པའང་ཀློག་མཁན་ཀུན་གྱིས་དགོངས་དབྱིངས་སུ་མངའ་དགོས།                                  
2016/4/4/ལ། ཁ་དྲོ་བཀྲ་ཤིས།


 
༺ དཔར་སྐྲུན་བདག་དབང་། Copyright © 2015 སྲོང་བཙན་དྲ་བ། དྲ་ཚིགས་བཟོ་མཁན། བསོད་ནམས་ཟླ་བ།

Powered by Themes24x7