;
གསར་འཕྲིན།

2016/11/29

དགེ་བཤེས་ཚེ་དབང་སྟོབས་ལྡན་གྱི་གཏམ་བཤད་མ་ཟིན།

སེར་བྱེས་གཙུག་ལག་སློབ་གཉེར་ཁང་དང་། རྒྱ་གར་གྱི་དྷར་ཝཌ་གཙུག་ལག་སློབ་གཉེར་ཁང་གཉིས་ཐུན་མོང་གི་གོ་སྒྲིག་འོག་"འཛམ་གླིང་ཇི་ལྟར་བཟང་དུ་གཏོང་བ"ཞེས་པའི་བརྗོད་གཞིའི་ཐོག་རྒྱལ་སྤྱིའི་རང་བཞིན་ལྡན་པའི་ཉིན་གསུམ་གྱི་བགྲོ་གླེང་ཐོག་ཏུ་སེར་བྱེས་ཏྲེ་ཧོར་ལྷ་རམས་དགེ་བཤེས་ཚེ་དབང་སྟོབས་ལྡན་གྱིས་དབྱིན་སྐད་ཀྱིས་(རིས་མེད་བཟང་སྤྱོད)ཅེས་པའི་ཐོག་ཏུ་གཏམ་བཤད་བྱས་པའི་བོད་ཡིག་གི་མ་ཟིན།

དེ་རིང་ངའི་བརྗོད་གཞི་གཙོ་བོ་དེ་རིས་མེད་བཟང་སྤྱོད་ཅེས་པ་འདིའི་ཐོག་ལ་རེད་འདུག  སྤྱིར་བཏང་གི་ཡ་རབས་བཟང་སྤྱོད་ཟེར་བ་དེ་ཧ་ཅང་རྒྱ་ཆེན་པོ་ཞིག་རེད། མི་རིགས་སོ་སོ་དང་རྒྱལ་ཁབ་སོ་སོ། དེ་བཞིན་ཆོས་ལུགས་དང་ལུང་ཚན་སོ་སོ་ལ་ཡང་རང་རང་གི་དམིགས་བསལ་གྱི་ཡ་རབས་གོམས་སྲོལ་རྩི་སྟངས་མི་འདྲ་བ་མང་པོ་ཞིག་ཡོད་ཚོད་རེད། དེ་དག་ཐམས་ཅད་བཤད་ཐུབ་ཀྱི་མ་རེད་ལ། ངས་བཤད་ཤེས་ཀྱི་ཡང་མེད། ཡིན་ན་ཡང་གྲྭ་ཚང་གིས་ངོས་རང་བརྗོད་གཞིའི་འདིའི་སྟེང་དུ་གཏམ་བཤད་བྱེད་མཁན་དུ་བཏང་པ་ཡིན་དུས། གྲྭ་ཚང་རིན་པོ་ཆེའི་བཀའ་མ་ལྡོག་ཙམ་ཞིག་མ་ཞུ་རང་ཞུ་འདྲ་པོ་ཞིག་ཆགས་སོང། དེ་འདྲ་ཡིན་དུས་ངས་དེ་རིང་འདིར་༸གོང་ས་མཆོག་གི་གཙོས་སྐྱེས་ཆེན་རྣམས་ཀྱི་བསླབ་བྱ་རྣམས་གཞི་བྱས་ཏེ། ང་རང་གི་འཆར་སྣང་དང་་མྱོང་ཚོར་མདོར་བསྡུས་ཤིག་ཞུ་བར་འབད་བརྩོན་བྱེད་ཀྱི་ཡིན། དེ་ཡང་ངས་བརྗོད་གཞི་འདི་དོན་ཚན་ལྔའི་ཐོག་ནས་ཞུ་ན་བསམ་སོང་། 

ཐོག་མ་དེ་ལ་ཡ་རབས་བཟང་སྤྱོད་ཟེར་བ་དེ་གང་འདྲ་ཞིག་ལ་ངོས་འཛིན་བྱེད་དགོས་མིན། 
གཉིས་པ། དེང་རབས་ཀྱི་ཀུན་སྤྱོད་དེ་གང་འདྲ་ཞིག་གི་ཐོག་ལ་འགྲོ་ཡི་ཡོད་མེད། 
གསུམ་པ། དེང་རབས་ཀྱི་ཀུན་སྤྱོད་དེ་དང་འབྲེལ་བའི་དཀའ་རྙོག  
བཞི་པ། དེ་འདྲའི་དཀའ་རྙོག་དེ་དག་ཡོང་བའི་རྒྱུ་རྐྱེན་ག་རེ་ཡིན་མིན། 
ལྔ་པ། དཀའ་རྙོག་དེ་སེལ་ཐབས་ལ་ང་རང་གི་བསམ་ཚུལ་མདོར་བསྡུས་ཤིག་སྟེ་དོན་ཚན་ལྔའི་སྒོ་ནས་ཞུ་ན་བསམ་བྱུང་།

དེ་ལ་དང་པོ་ཡ་རབས་བཟང་སྤྱོད་ཟེར་བ་དེ་གོང་དུ་ཞུས་པ་བཞིན་ཧ་ཅང་རྒྱ་ཆེན་པོ་ཞིག་རེད་དེ། ཡིན་ན་ཡང་འཇིན་རྟེན་ཀུན་ཁྱབ་ཀྱི་ཡ་རབས་བཟང་སྤྱོད་ཅེས་པ་དེའི་ཐོག་ལ་ང་རང་གི་བསམ་ཚུལ་ཞིག་ཞུས་པ་ཡིན་ན། རྒྱུའི་ཁྱད་པར་ཀུན་སློང་བཟང་པོ་ཞིག་གི་ཐོག་ནས། ངོ་བོའི་ཁྱད་པར་གཞན་ལ་དངོས་སུ་གནོད་པའམ་བརྒྱུད་ནས་གནོད་པའི་བྱ་བའི་རིགས་ལས་ལྡོག་པ། འབྲས་བུའི་ཁྱད་པར་གཞན་ལ་ཕན་པ་སྟེ་ཁྱད་ཆོས་གསུམ་ལྡན་གྱི་སྤྱོད་ཚུལ་ཞིག་ལ་ཡ་རབས་བཟང་སྤྱོད་ཅེས་བརྗོད་ན་འགྲིག་གམ་སྙམ། དེ་ཡང་ང་ཚོ་བོད་ལ་ཆ་མཚོན་པ་ཡིན་ན། སྔོན་གྱི་ཆོས་རྒྱལ་ཚོའི་གནས་སྐབས་ནས་ལྷ་ཆོས་དགེ་བ་བཅུ་དང་། མི་ཆོས་གཙང་མ་བཅུ་དྲུག་ཅེས་མིའི་བཟང་སྤྱོད་ཀྱི་ཐོག་ལ་ལུགས་སྲོལ་ལམ་ཁྲིམས་ལུགས་ལྟ་བུ་ཞིག་གཏན་འབེབས་གནང་ཡོད་རེད། ལྷ་ཆོས་དགེ་བ་བཅུ་དང་མི་ཆོས་གཙང་མ་བཅུ་དྲུག་ཟེར་ན་ཡང་། ཚུར་བསྡུས་པ་ཡིན་ན་ལྷ་ཆོས་དགེ་བ་བཅུའི་ནང་དུ་ཕལ་ཆེར་འདུས་པ་ལྟ་བུ་ཞིག་རེད། དེ་འདྲའི་ལྷ་ཆོས་དགེ་བ་བཅུ་པོ་དེ་ཡང་གཞན་གནོད་གཞི་དང་བཅས་པ་ལས་ལྡོག་པའི་སྤྱོད་ཚུལ་ཞིག་གསུངས་ཀྱི་ཡོད་རེད། དེ་ཡང་སྲོག་གཅོད་པ། མ་བྱིན་པ་ལེན་པ། ལོག་གཡེམ་སྟེ་གསུམ་པོ་དེ་ཕྱིའི་ལུས་ཀྱི་ཐོག་ནས་གཞན་ཕ་རོལ་པོ་ལ་དངོས་སུ་གནོད་པའི་ངན་སྤྱོད་དང་། དེ་ནས་རྫུན། ཕྲ་མ། ཚིག་རྩུབ། ངག་འཁྱལ་བཅས་བཞི་པོ་དེ་ངག་གི་ཐོག་ནས་གཞན་ཕ་རོལ་པོ་ལ་དངོས་སུ་གནོད་པའི་ངན་སྤྱོད་དང་། བརྣབ་སེམས། གནོད་སེམས། ལོག་ལྟ་གསུམ་པོ་དེ། དེ་ལྟ་བུའི་ཕྱིའི་ལུས་ངག་གི་ངན་སྤྱོད་འབྱུང་བའི་གཞི་ནང་གི་བསམ་ངན་རྣམས་རེད། དེ་ལྟ་བུའི་གཞན་གནོད་གཞི་དང་བཅས་པ་ལས་ལྡོག་པའི་སྤྱོད་ཚུལ་ཞིག་ལ་ནང་པ་ཚོས་མི་དགེ་བཅུ་སྤོང་གི་ཚུལ་ཁྲིམས་ཞེས་ཐ་སྙད་བྱེད་ཀྱི་ཡོད་རེད་ལ། འདི་ཡང་འཇིག་རྟེན་ཀུན་ཁྱབ་ཀྱི་བཟང་སྤྱོད་ལ་འགྲོ་ཡི་རེད་བསམ་གྱི་འདུག  འོ་ན་འདིའི་ནང་དུ་གཞན་གནོད་གཞི་དང་བཅས་པ་ལས་ལྡོག་པ་ཞེས་པའི་ལོག་ལྟ་ལས་ལྡོག་ཅེས་པ་ཇི་ལྟར་ཞེ་ན། དེ་ལ་བཤད་ཚུལ་གཉིས་འདྲ་པོ་ཞིག་ཡོང་ཆོག་གམ་སྙམ་སྟེ།  དེ་ཡང་ནང་པའི་ཐུན་མོང་མ་ཡིན་པའི་དབང་དུ་བྱས་ན་ལོག་ལྟ་ཟེར་བ་དེ་ནང་པའི་གཞུང་ནས་བཤད་པའི་དཀོན་མཆོག་དང་། ལས་འབྲས། སྐྱེ་བ་སྔ་ཕྱི་སོགས་མེད་པར་ལྟ་བ་ལ་ལོག་ལྟ་ཞེས་འདོད་དགོས་ཀྱང་། ཡིན་ན་ཡང་འཇིག་རྟེན་ཀུན་ཁྱབ་ཀྱི་ཡ་རབས་བཟང་སྤྱོད་བཤད་ཡོང་དུས། གཞི་དང་བཅས་པ་ལས་ལྡོག་ཅེས་པའི་ལྡོག་སའི་ལོག་ལྟ་དེ་ངས་བལྟས་ན་དེ་ཙམ་ཞིག་ལ་ངོས་འཛིན་བྱེད་དགོས་མི་དགོས་པར་བྱ་བ་ཡག་པོ་ཞིག་བྱེད་ན་དེ་ལས་འབྲས་བུ་བཟང་པོ་ཞིག་འབྱུང་གི་ཡོད་པ་དང་། བྱ་བ་ངན་པ་ཞིག་བྱེད་ན་དེ་ལས་འབྲས་བུ་ཡང་ངན་པ་ཞིག་འབྱུང་གི་ཡོད་པའི་བསམ་ཚུལ་དེ་འཇིག་རྟེན་ཀུན་ཁྱབ་ཀྱི་ནང་སེམས་ཀྱི་ཐོག་ནས་བཟང་སྤྱོད་ཅིག་ཆགས་ཡོད་རེད། དེ་ལས་ལྡོག་ཏེ་བྱ་བ་བཟང་པོ་བྱེད་ན་དེ་ལས་འབྲས་བུ་བཟང་པོ་ཞིག་མི་འབྱུང་བར་གྱོང་རག་གི་ཡོད་པ་ལྟ་བུ་དང་། བྱ་བ་ངན་པ་ཞིག་བྱེད་པ་ཡིན་ན་དེ་ལས་འབྲས་བུ་ངན་པ་ཞིག་མི་འབྱུང་བར་དེ་ལ་ཁེ་ཕན་དང་འབྲས་བུ་བཟང་པོ་འབྱུང་གི་ཡོད་པའི་བསམ་ཚུལ་ལྟ་བུ། མ་ཟད་རྒྱུ་ནོར་དཔལ་འབྱོར་ཡང་དེ་ལ་བརྟེན་ནས་ཡོང་གི་ཡོད་པར་ལྟ་བའི་བསམ་ཚུལ་དེ་རྣམས་འཇིག་རྟེན་ཀུན་ཁྱབ་ཀྱི་ཡ་རབས་བཟང་སྤྱོད་བཤད་པའི་སྐབས་ཀྱི་ལོག་ལྟ་ཟེར་བ་དེ་འདྲའི་ཞིག་ལ་ངོས་འཛིན་དགོས་པ་མིན་འགྲོ་བསམ་གྱི་འདུག  དེར་བརྟེན་མི་དགེ་བཅུ་སྤོང་གི་ཚུལ་ཁྲིམས་ཡིན་ན་ཡང་རེད། གཞན་གནོད་གཞི་དང་བཅས་པ་ལས་ལྡོག་པའི་སྤྱོད་ཚུལ་དེ་འཇིག་རྟེན་ཀུན་ཁྱབ་ཀྱི་དབང་དུ་བྱས་ནས་ཆོས་ཁས་ལེན་མ་ལེན་ཚང་མས་བཟང་སྤྱོད་དུ་འདོད་དགོས་པ་གཅིག་དང་། ཚེ་འདི་ཙམ་གྱི་བདེ་སྐྱིད་ཀྱི་ཆེད་དུ་ཡང་ངེས་པར་དུ་དགོས་པ་ཞིག་རེད་སྙམ། མདོར་ན་ངའི་ངོས་ནས་ཡ་རབས་བཟང་སྤྱོད་ཟེར་བ་དེ་ཀུན་སློང་བཟང་པོ་ཞིག་གི་ཐོག་ནས་གཞན་ལ་དངོས་སུ་གནོད་པའམ་བརྒྱུད་ནས་གནོད་པའི་བྱ་བ་ལས་ལྡོག་པའི་སྤྱོད་ཚུལ་ཞིག་ལ་ཡ་རབས་བཟང་སྤྱོད་ཅེས་ངོས་འཛིན་བྱེད་ཀྱི་ཡོད།

གཉིས་པ། དེང་རབས་ཀུན་སྤྱོད་ལ་བཟང་ངན་གྱི་ཆ་གཉིས་ཀ་ཡོད་ཀྱང་། དེ་རིང་ངས་དགོས་དབང་གིས་ངན་ཕྱོགས་ནས་བཤད་ཀྱི་ཡིན། དུས་རབས་ཉེར་གཅིག་པ་འདིའི་ནང་གི་ཀུན་སྤྱོད་དེ་ག་འདྲ་ཞིག་ཆགས་ཡོད་རེད་ཟེར་ན། སྤྱིར་བཏང་ང་རང་ཚོ་འཛམ་བུ་གླིང་ཕྱོགས་ག་བར་བལྟས་པ་ཡིན་ན་ཡང་། ཚན་རིག་དར་རྒྱས་ཕྱིན་པའི་དབང་གིས་ཕྱིའི་དངོས་པོའི་རིགས་ཧ་ཅང་གི་ཡར་རྒྱས་ཚད་མཐོ་པོར་སླེབས་ཡོད་པ་དང་། མིའི་འཚོ་བའི་མཐུན་རྐྱེན་གྱི་ཆ་ནས་ཡིན་ན་ཡང་སྤྱི་ཡོངས་ནས་ཡར་རྒྱས་རྣམ་པ་འདྲ་པོ་ཞིག་ཕྱིན་ཡོད། དེ་བཞིན་དུ་མི་དང་མིའི་བར། རྒྱ་ཁབ་དང་རྒྱལ་ཁབ་ཀྱི་བར། གླིང་ཆེན་དང་གླིང་ཆེན་གྱི་བར་ལ། སྤྱིར་བཏང་གི་འབྲེལ་བ་དེ་སྔར་དང་མི་འདྲ་བར་འབྲེལ་བ་ཆེ་རུ་ཕྱིན་ཡོད་རེད་དེ། ཡིན་ན་ཡང་མང་ཆེ་བའི་འབྲེལ་བ་དེ་བཟང་སྤྱོད་ཀྱི་འབྲེལ་བ་ཞིག་མ་ཡིན་པར། སོ་སོའི་ཁེ་ཕན་གྱི་ཆེད་མ་བྱེད་ཐབས་མེད་དང་། ཡང་འགའ་ཞིག་ནི་ངོ་ཤེས་ཀྱི་འབྲེལ་བ་ཙམ་ཡིན། གང་ལྟར་ཕན་ཚུན་སེམས་ཐག་ཉེ་པོའི་ཐོག་ནས་གཅིག་གིས་གཅིག་ལ་ཡིད་ཆེས་བློས་འགེལ་གྱི་འབྲེལ་བ་དེ་ཆེས་དཀོན་པའི་གནས་སྟངས་ཤིག་ཆགས་ཡོད་པ་ཚོར་གྱི་འདུག  དཔེ་མཚོན་འགའ་ཞུ་བ་ཡིན་ན། དེ་ཡང་གཙོ་བོ་གསུམ་གྱི་ཐོག་ནས་བཤད་ཀྱི་ཡིན། གསུམ་དེ་ནི། རྩེད་འགྲན་པ། ཤེས་ཡོན་ཅན། སྒྱུ་རྩལ་བ་བཅས་གསུམ་གྱི་སྤྱོད་ཚུལ་ཐོག་ནས་ཞུ་ཡི་ཡིན། དེའི་དགོས་པ་རྒྱུ་མཚན་ཡང་། དེ་གསུམ་པོ་དེང་རབས་ཀྱི་གཞོན་སྐྱེས་ཚོའི་ཀུན་སྤྱོད་ལ་ཤུགས་རྐྱེན་ཧ་ཅང་ཆེན་པོ་ཐེབས་ཀྱི་ཡོད་པས་ཡིན།

༡༽ རྒྱལ་སྤྱིའི་ནང་དུ་རྩེད་འགྲན་འདྲ་པོ་ཞིག་གི་དབང་དུ་བྱེད་ན། རྒྱལ་སྤྱིའི་ཐོག་ལ་༼ཨོ་ལིམ་ཕིག་༽ཟེར་བ་འདྲ་པོ། དེ་བཞིན་གླིང་ཆེན་ནང་ཕན་ཚུན་དང་རྒྱལ་ཁབ་ཕན་ཚུན། ཚོགས་པ་དང་ལུང་ཚན་ཕན་ཚུན་བར་ལ་རྩེད་མོའི་རིགས་ཀྱི་བྱེད་སྒོ་སྣ་ཚོགས་པ་ཞིག་སྤེལ་དང་སྤེལ་བཞིན་པ་དེ་རེད། རྩེད་རིགས་ཀྱི་བྱེད་སྒོ་དེ་ཚོ་ཐོག་མའི་ཆ་ལ་འཛུགས་མཁན་ཚོས་དམིགས་ཡུལ་དེ། རྒྱལ་ཁབ་དང་རྒྱལ་ཁབ་ཀྱི་བར། ཚོགས་པ་དང་ཚོགས་པའི་བར། མི་དང་མིའི་བར་ལ་སེམས་ཐག་ཉེ་བོའི་མཐུན་འབྲེལ་དང་། ལྟད་མོ་ལྟ་མཁན་ཚོ་ལ་སྤྲོ་སྣང་དང་། རྩེད་མོ་བ་ཁོང་རང་ཚོ་ལ་ཡང་ལུས་བདེ་ཐང་ཡོང་བ་སོགས་གཞི་བཟུང་གིས་བཙུགས་ཡོད་ཀྱི་རེད་བསམ་གྱི་འདུག །ཡིན་ན་ཡང་ད་ཆར་དེ་དག་མང་ཆེ་བ་ཞིག་དམིགས་ཡུལ་དེའི་ཐོག་མ་སོང་བར་རྒྱལ་ཁབ་སོ་སོའི་མིང་གྲགས་དང་རྒྱལ་ཁབ་ཕན་ཚུན་འགྲན་རྩོད་ཀྱི་རྣམ་པ་དང་། གང་ཟག་སྒེར་སོ་སོ་ཡིན་ན་ཡང་མིང་གྲགས་དང་དཔལ་འབྱོར་འདུ་འགོད་འདྲ་པོ་ཞིག་གི་བསམ་བློའི་ཐོག་ནས་རྩེད་འགྲན་བྱེད་པའི་རྣམ་པ་ཞིག་ཆགས་སྡོད་ཀྱི་ཡོད་རེད། དེ་ལ་བརྟེན་ནས་སེམས་ཐག་ཉེ་པོ་དང་སེམས་གཏིང་གི་མཛའ་བརྩེའི་འབྲེལ་ལམ་དེ་ཡག་ཏུ་འགྲོ་བའི་ཚབ་ཏུ་སྡུག་ཏུ་ཕྱིན་པ་དང་། ལྟད་མོ་ལྟ་མཁན་ཚོ་ལ་ཡིན་ན་ཡང་སྤྲོ་སྣང་སྟེར་བའི་ཚབ་ཏུ་དངངས་སྐྲག་དང་འཇིགས་སྣང་། ཕན་ཚུན་ཞེ་འཁོན་སླེབས་པའི་རྒྱུར་འགྲོ་བ་འདྲ་བོ་མཐོང་གི་འདུག

༢༽ཤེས་ཡོན་གྱི་ཐོག་ལ་བསམ་བློ་ཞིག་གཏོང་བ་ཡིན་ན་ཡང་། སྤྱིར་བཏང་ཤེས་ཡོན་དེ་མི་སོ་སོའི་མི་ཚེའི་བདེ་སྐྱིད་དང་། དེ་དང་འབྲེལ་བའི་སོ་སོའི་ཉེ་འཁོར་དང་། དེ་ལས་ཁྱབ་ཆེར་བཏང་པ་ཡིན་ན་རྒྱལ་ཁབ་དང་མི་རིགས་རེད། འཛམ་བུ་གླིང་སྤྱི་ཡོངས་ལ་ཕན་ཐོགས་པའི་དངོས་པོ་ཞིག་ཡིན་དགོས་ཀྱི་ཡོད་རེད། དེར་བརྟེན་སྔ་མོ་ཡིན་ན་སློབ་སྦྱོང་བྱེད་དགོས་པའི་དམིགས་ཡུལ་ཡང་དེ་འདྲ་ཞིག་བཟུང་གི་ཡོད་རེད་དེ། ཡིན་ན་ཡང་ད་ཆར་མི་མང་ཆེ་བའི་བསམ་བློའི་ནང་ཤེས་ཡོན་དེ་དམིགས་ཡུལ་དེའི་ཐོག་མ་ཡིན་པར། གོང་དུ་ཞུས་པ་བཞིན་རང་གཅིག་པུའི་ཚེ་འདིའི་བདེ་སྐྱིད་ཀྱི་ཆེད་དུ་དང་། དེ་ཡང་ཕྱི་དངོས་པོ་ཁོ་ནས་འགྲུབ་ཀྱི་ཡོད་པའི་བསམ་ཚུལ་ཞིག་དང་། ཕ་རོལ་པོ་དང་འགྲན་རྩོད་ཀྱིི་རྣམ་པ་ཞིག་གི་ཐོག་ནས་ཤེས་ཡོན་སྦྱོང་པ་དང་།

༣༽ སྒྱུ་རྩལ་གྱི་ཐོག་ནས་ཞུ་ན། སྒྱུ་སྩལ་ལ་མང་པོ་ཞིག་ཡོད་པ་ལས་གློག་བརྙན་དང་གླུ་གར་བཅས་རེད། དེ་དག་དང་འཁྲབ་མཁན་ཚོས་གཞོན་སྐྱེས་ཚོར་སློབ་གསོ་བཟང་པོ་སྤྲོད་དགོས་པ་ཡིན་ཡང་། དེང་སྐབས་མང་ཆེ་བ་དེ་ལས་ལྡོག་སྟེ་ཆགས་སྡང་སོགས་སློང་བྱེད་དང་རྐུན་ཇག་སོགས་སློབ་མཁན་གྱི་དགེ་རྒན་ལྟ་བུར་འགྱུར་བཞིན་ཡོད། དེ་དང་དེ་མཚུངས་ཀྱི་དེང་དུས་ཀྱི་ཚོང་ལས་ཡིན་ནའང་རེད། ལས་དོན་ཆེ་ཕྲ་ཆུང་གསུམ་ག་འདྲ་ཞིག་ཡིན་ན་ཡང་། མང་པོ་ཞིག་གིས་རྒྱུ་ནོར་དཔལ་འབྱོར་སྒྲུབ་ཡ་ཞིག་དང་། མིང་གྲགས་དང་འགྲན་རྩོད་ཁོ་ནའི་རྣམ་པའི་ཐོག་ལ་འཇུག་སྡོད་པ་ཞིག་ཆགས་སྡོད་ཀྱི་ཡོད་རེད། བྱས་ཙང་དེང་རབས་ཀྱི་ཀུན་སྤྱོད་དེ་དེ་འདྲ་ཞིག་ཐོག་ལ་ཕལ་ཆེར་འགྲོ་བཞིན་པ་འདྲ་པོ་མཐོང་གི་འདུག

གསུམ་པ། འོ་ན་དེང་རབས་ཀྱི་ཀུན་སྤྱོད་དེ་དང་འབྲེལ་བའི་དཀའ་རྙོག་ག་རེ་ཡོད་རེད་ཅེ་ན། དེ་རིང་ཁ་སང་ང་རང་ཚོས་འཚོ་གནས་བྱེད་ས་འདི་ལ་། ས་མཚམས་ཆུ་མཚམས་འདྲ་བཅད་ནས་རྒྱལ་ཁབ་ཕན་ཚུན་བར་ལ་ས་རྩོད་དང་། ཆུ་རྩོད། གནམ་རྩོད་སོགས་དང་། དེའི་ཐོག་ནས་ཕན་ཚུན་དམག་འཁྲུག་གིས་དོན་མེད་མི་སེར་མང་པོ་ཞིག་གི་ལུས་སྲོག་ལ་གནོད་འཚེ་བྱེད་པ། དེ་དང་དེ་མཚུངས་ལྟ་གྲུབ་དང་ཤ་མདོག་སོགས་མི་འདྲ་རྒྱུ་མཚན་ཙམ་བཟུང་ནས་ཆོས་ལུགས་ཕན་ཚུན་དང་མི་རིགས་ཕན་ཚུན་བར་མཐོང་ཆུང་དང་ཁྱད་གསོད་བརྙས་བཅོས་དང་གསོད་རེས་ཀྱི་ཡ་ང་བའི་གནས་ཚུལ་གྱི་ཇི་རྙེད་ཅིག་བྱུང་དང་འབྱུང་བཞིན་པ་རེད། དེ་བཞིན་དུ་རྒྱལ་ཁབ་ནང་ལོག་ཡིན་ན་ཡང་མངའ་སྡེ་ཕན་ཚུན། ལུང་པ་ཕན་ཚུན། ཁྱིམ་མཚེས་ཕན་ཚུན། དེའི་ནང་ནས་ཀྱང་ནང་མི་ཕན་ཚུན། དེ་བས་ཀྱང་ཕ་མ་བུ་རྒྱུད་ཀྱི་བར་ལ་རྒྱུ་ནོར་སོགས་ཀྱི་རྩོད་རྙོག་དང་གསོད་རེས་མཚོན་པའི་བྱ་བ་ངན་པ་སྣ་ཚོགས་ཞིག་དེ་རིང་ཁ་སང་ཇེ་མང་ནས་ཇེ་མང་དུ་འགྲོ་བཞིན་ཡོད་པ་དེ་ང་རང་ཚོས་མཐོང་ཆོས་སུ་ཡོད་བཞིན་པ་དེ་རེད། དེ་དག་ཚང་མ་དུས་རབས་འདིར་མིའི་བཟང་སྤྱོད་ཉམས་ཆག་སོང་བའི་དབང་གིས་ཡོང་བ་ཤ་སྟག་རེད། དེ་ནི་ང་རང་ཚོ་ནང་བཅུད་ཀྱི་སེམས་ཅན་ཐོག་དཀའ་རྙོག་ཅིག་རེད།

དེ་བཞིན་དུ་ཕྱིའི་འཁོར་ཡུག་གི་ཆ་ནས་བསམ་བློ་ཞིག་གཏོང་པ་ཡིན་ན་ཡང་། དེ་རིང་ཁ་སང་ཁོར་ཡུག་ཧ་ཅང་གི་ཉམས་ཆག་འགྲོ་བཞིན་པ་རེད། གོ་ལའི་ཚ་དྲོད་ཧ་ཅང་འཕར་འགྲོ་གིན་འདུག་ཟེར་བ་འདྲ་པོ། འཛམ་གླིང་འདི་ལ་སེམས་འཁུར་ཡོད་པའི་མཁས་དབང་དང་གནད་ཡོད་མི་སྣ་ཚོས་དུས་རྒྱུན་དུ་སེམས་འཚབ་བྱས་དང་བྱེད་བཞིན་པ་དང་སྡུག་སྐད་རྒྱབ་དགོས་པ་ཞིག་ཆགས་ཀྱི་ཡོད་རེད།  དེ་དག་ཀྱང་མིའི་འདོད་རྔམས་ལ་བརྟེན་པའི་སྤྱོད་ཚུལ་ངན་པ་དེ་ལ་བརྟེན་ནས་བྱུང་བ་ཞིག་ཆགས་ཡོད་རེད། མིའི་འདོད་རྔམས་གྱིས་ཚད་ལས་རྒལ་བའི་བཟོ་གྲྭ་མང་པོ་འཛུགས་པ་དང་གཏེར་ཁ་སྔོག་འདོན། རྡུན་ཕྲན་དང་རྫས་ངན་རིགས་མང་པོ་བཟོ་སྐྲུན་བྱས་པ་སོགས་ལ་བརྟེན་དེ་རིང་ཁ་སང་སྔར་དང་མི་འདྲ་བ་ས་ཡོམ་དང་། ཆུ་ལོག རླུང་འཚུབ། མེའི་འཇིགས་པ་ལ་སོགས་དང་། ཡང་ཚ་སར་ཚ་དྲགས་པའི་དཀའ་ངལ་དང་། གྲང་སར་གྲང་དྲགས་པའི་དཀའ་ངལ། དེ་བཞིན་དུ་ཁ་ཤས་ལ་ཆུ་མང་དྲགས་པའི་དཀའ་ངལ། ལ་ལ་ཆུ་ཉུང་དྲགས་པའི་དཀའ་ངལ་སོགས་གོ་ལ་འདིའི་ཁོར་ཡུག་ཧ་ཅང་གི་ཉམས་ཆག་སོང་ནས། མཐའ་ན་རྩི་ཤིང་ཡན་ཆད་ཧ་ཅང་གི་ཉུང་ཉུང་ཆགས་འགྲོ་ཡི་ཡོད་པའི་གནས་སྟངས་ཆགས་ཡོད། དེ་འདྲ་ཡིན་དུས་ཕྱིའི་ཁོར་ཡུག་ཉམས་ཆག་དེ་ལ་བརྟེན་ནས་ནང་བཅུད་ཀྱི་སྲོག་ལྡན་ཚོར་ནད་ཡམས་འདྲ་མིན་སྣ་ཚོགས་ཤིག་བྱུང་དང་འབྱུང་བཞིན་པ་དེ་རེད། མ་ཟད་སྔར་དང་མི་འདྲ་བར་བཅོས་སུ་མེད་པའི་ནད་ངན་རིགས་ཧ་ཅང་མང་པོ་སྤང་ལས་ཤ་མོ་རྡོལ་བ་བཞིན་འབྱུང་གི་ཡོད་པ་འདི་རེད། བྱས་ཙང་དཀའ་རྙོག་དེ་ཚོ་ཕལ་ཆེ་བ་འགྲོ་བ་མིའི་རིགས་ཀྱི་ཀུན་སྤྱོད་དང་འབྲེལ་བའི་དཀའ་རྙོག་རེད།

བཞི་པ། འོ་ན་དེ་ལྟ་བུའི་བཟང་སྤྱོད་ཉམས་ཆག་དང་དེ་དང་འབྲེལ་བའི་དཀའ་རྙོག་ཡོང་སའི་གཞི་འདྲ་པོ་དེ་ག་འདྲ་ཞིག་རེད་ཅེས་ཟེར་བ་ཡིན་ན། ང་རང་གི་བསམ་ཚུལ་འདྲ་པོ་ཞིག་ཞུས་པ་ཡིན་ན། གཙོ་བོ་དེ་ང་རང་ཚོ་མི་ལ་རང་ཆས་སུ་ཡོད་པའི་བྱམས་བརྩེ་དང་བཟོད་བསྲན་འདྲ་བོ་ཡོད་པ། དཔེར་ན་ང་རང་ཚོ་བྱིས་པའི་དུས་ནས་ཕ་མ་ལ་བརྩེ་བ་དང་། དེ་བཞིན་དུ་ཕ་མ་ལ་བཟོད་བསྲན་འདྲ་པོ་ཞིག་ང་ཚོ་ལ་ཡོད་རེད། དེ་སུ་གང་གིས་ཀྱང་བསླབ་མི་དགོས་པར་རང་ཆས་སུ་ཡོད་པ་ཞིག་རེད། དེ་འདྲའི་ང་རང་ཚོའི༷་མིའི་རིན་ཐང་དེ་ཡར་རྒྱས་འགྲོ་བའི་ཚབ་ཏུ། དེ་ལས་ལྡོག་ཏེ་འདོད་རྔམས་དང་འཚེ་བའི་བསམ་པ་ལ་སོགས་པ། མདོར་ན་རང་གཞན་གྱི་རྒྱུད་འཁྲུག་བྱེད་མ་རབས་ཀྱི་བསམ་བློ་འདྲ་པོ་དེ་ཤུགས་ཆེ་རུ་དང་གོང་འཕེལ་དུ་ཕྱིན། དེ་ལ་བརྟེན་ནས་བཟང་སྤྱོད་རིགས་ཉམས་ཆག་འགྲོ་བ་དང། ངན་སྤྱོད་རིགས་གོང་འཕེལ་དུ་སོང་ནས་འཛམ་གླིང་འདིའི་ནང་དུ་དཀའ་རྙོག་མང་པོ་ཞིག་ཡོང་སྡོད་པའི་གནས་སྟངས་ཤིག་ཆགས་ཀྱི་ཡོད་རེད།

དེས་ན་མིའི་ཀུན་སྤྱོད་ངན་པ་དེ་ཡང་ནང་བསམ་བློ་ངན་པ་ཞིག་ལས་བྱུང་བ་དང་། བསམ་ངན་དེ་ཡང་གང་ལས་འབྱུང་བ་དང་ཇི་ལྟར་གོང་འཕེལ་དུ་འགྲོ་བ་ནི། ཕྱི་རོལ་ནས་གཞན་གྱིས་ཤུགས་རྐྱེན་དང་། གཞན་གྱིས་གནོན་ཤུགས་འདྲ་པོ་ཞིག་ལ་རག་ལས་པ་དང་དེ་དག་དང་ཧ་ཅང་གིས་འབྲེལ་བ་ཆེན་པོ་ཡོད་པ་ཞིག་མཐོང་གི་འདུག ། གང་ཡིན་ཟེར་ན་ཕ་མ་དང་དགེ་རྒན་གཙོས་པའི་སྤྱི་ཚོགས་ནང་གི་སློབ་གསོ་བ་ཚོས་སློབ་གསོ་དང་སློབ་སྦྱོང་སྤྲོད་སྟངས་བཅས་ཀྱི་ཐོག་འཐུས་ཤོར་ཆེན་པོ་ཤོར་བ་དང་། གཞན་ལ་ཁ་མིག་ཡ་བལྟ་བྱེད་ས་ཧ་ཅང་དཀོན་པ་སོགས་རྐྱེན་གྱིས་ཡིན་པ་ཚོར་གྱི་འདུག གོང་དུ་ཞུས་པ་བཞིན་རེད། ཤེས་ཡོན་དང་སྤྱི་སྒེར་གང་གི་ལས་དོན་བྱ་བ་གང་འདྲ་ཡིན་ན་ཡང་དེ་དག་ཕལ་ཆེ་བ་གཞན་གྱི་སློབ་གསོའི་ཤུགས་རྐྱེན་འདྲ་པོ་ཞིག་གིས། གཞན་འབུར་འཇོམས་བྱེད་ཡ་འདྲ་པོ་དང་། ཕྱི་དངོས་པོའི་དཔལ་འབྱོར་ཁོ་ནའི་ཆ་རྐྱེན་དུ་སྒྲུབ་ཀྱི་ཡོད་པ་འདྲ་བོ་རེད་འདུག  དཔེར་ན་ཕ་མ་མང་པོ་ཞིགགིས་རང་གི་ཕྲུ་གུ་ལ་ཐོག་མ་སློབ་སྦྱོང་བྱེད་ཕྱོགས་ཀྱི་ཐོག་ལ་སློབ་གསོ་ཞིག་སྤྲོད་ཡོང་དུས་ནས། ཁྱོད་ཀྱིས་སློབ་སྦྱོང་བྱེད་དགོས་ཀྱི་རེད། ཁྱེད་ཀྱིས་སློབ་སྦྱོང་མ་བྱེད་པ་ཡིན་ན་མ་འོངས་པར་ཁྱེད་རང་མི་གཞན་དང་འདྲ་མཉམ་བྱེད་ནས་འགྲོ་མི་ཐུབ་པར་ཁྱེད་རང་རྗེས་ལུས་ཐེབས་ཀྱི་རེད་ཟེར་བ་འདྲ་བོ་དང། ཡང་ན་ཁྱེད་རང་མི་གཞན་ལས་ལྷག་པ་ཞིག་བྱེད་དགོས་ཀྱི་རེད། དེ་མ་བྱེད་པ་ཡིན་ན་ཁྱེད་རང་མི་གཞན་དང་ཁྱད་མེད་དུ་འགྱུར་གྱི་རེད། ཡང་ན་ཁྱེད་རང་གིས་སློབ་སྦྱོང་བྱེད་དགོས་ཀྱི་རེད། གང་ལགས་ཟེར་ན། མ་འོངས་པ་ན་ཁྱེད་རང་ལ་དཔལ་འབྱོར་དགོས་ཀྱི་ཡོད་རེད། རྒྱུ་ནོར་དཔལ་འབྱོར་མེད་པ་ཡིན་ན་མི་ཚེར་བདེ་སྐྱིད་མི་འབྱུང་བ་དང་མིའི་གཞན་དབང་དུ་འགྲོ་བ་ལས་རང་དབང་ཡང་མེད་པ་དང་། གལ་ཏེ་རྒྱུ་ནོར་དཔལ་འབྱོར་ཡོད་ན་ག་རེ་བྱེད་བྱེད་རེད་ཟེར་བ་ལྟ་བུའི་དེ་འདྲའི་སློབ་གསོ་སྤྲོད་པ་དང་། གང་ལྟར་ཡང་རྒྱལ་ཁབ་སོ་སོ་ཡིན་ནའང་རང་གི་མི་སེར་རྣམས་ལ་སློབ་གསོ་སྤྲོད་སྟངས་དེ་སོ་སོའི་རྒྱལ་ཁབ་འདི། དཔལ་འབྱོར་དང་། འཕྲུལ་རིག་ལག་རྩལ་དང་འཕྲུལ་འཁོར་ཡིན་ན་རེད། རྡུལ་ཕྲན་མཚོན་ཆའི་གཙོས་གོ་ལག་ཆ་སོགས་གང་ཅི་ཐད་ནས་འཛམ་གླིང་གི་ནང་དུ་འབུར་དུ་ཐོན་པ་ཞིག་དང་། རྒྱལ་ཁབ་གཞན་པ་ཚོ་ལས་ཁྱད་དུ་འཕགས་པ་བཟོ་རྒྱུ་ཞིག་གི་ཆེད་དུ་སློབ་གསོ་སྤྲོད་སྡོད་པ་འདྲ་པོ་རེད། དེ་འདྲ་ཞིག་གི་ཐོག་ནས་གཞོན་སྐྱེས་ཚོ་ལ་གཞན་ལས་རང་གཙོ་ཆེར་བཟུང་བའི་བསམ་པ་དེ་ཤུགས་ཆེན་པོ་ཞིག་སྤེལ་གྱི་ཡོད་པ་དང་། སོ་སོ་གཅིག་པོའི་ཁེ་ཕན་གྱི་བསམ་བློ་ཞིག་དང་། ཡང་ན་ཁོ་རང་གི་རྒྱལ་ཁབ་དང་མི་རིགས་སྤྱི་ཚོགས་དེ་ཁོ་ནའི་ཁེ་ཕན་གྱི་བསམ་བློ་ཆུང་ཆུང་ཞིག་རྒྱ་བསྐྱེད་དེ་དེ་ལ་བརྟེན་ནས་མི་རིགས་དང་སྤྱི་ཚོགས་གཞན་ལ་བརྩི་མཐོང་མེད་པ་དང་བརྙས་བཅོས་སོགས་སྤྱོད་ཚུལ་ངན་པ་ཤུགས་ཆེན་པོ་དེ་འདྲ་ཡོང་གི་མེད་འགྲོ་སྙམ། བསམ་ཚུལ་དེ་འདྲ་ཞིག་གི་ཐོག་ནས་མ་འོངས་པར་གཞོན་སྐྱེས་ཚོ་ཤེས་ཡོན་ཅན་ཞིག་ཆགས་པ་ཡིན་ན་ཡང་རེད། རྒྱུ་ནོར་ཅན་ཞིག་ཆགས་པ་ཡིན་ན་ཡང་འདྲ། ཡང་ན་ཆབ་སྲིད་པ་དང་། འཛམ་གླིང་གི་རྩེ་ཕུད་ཀྱི་རྩེད་འགྲན་པ་སྙན་གྲགས་ཆེན་པོ་ཞིག་ཆགས་པ་ཡིན་ན་ཡང་རེད། ག་འདྲ་ཞིག་ཆགས་པ་ཡིན་ན་ཡང་འཛམ་གླིང་སྤྱི་ཡོངས་ལ་ཕར་བཞག སོ་སོའི་རྒྱལ་ཁབ་ཀྱི་ནང་དུ། སོ་སོའི་སྤྱི་ཚོགས་ཀྱི་ནང་དུ་ཡང་ཕན་ཐོགས་ངེས་ཅན་ཞིག་ཡོང་ཁག་པོ་རེད།  ཁོ་རང་ལ་ཡང་དོན་དམ་པའི་སེམས་ཀྱི་ཞི་བདེ་ཞིག་ཡོང་ཁག་པོ་རེད། གང་ཡིན་ཟེར་ན། ཐོག་མའི་ཀུན་སློང་གི་བསམ་པ་དེ་མ་དག་པ་ཞིག་ཡིན་དུས། དེ་ལ་བརྟེན་ནས་དོན་དམ་པའི་འབྲས་བུ་བཟང་པོ་ཞིག་དང་ཕན་ཐོགས་མཁན་ཞིག་མི་ཡོང་བ་ནི། འབྲས་བུ་རྒྱུའི་རྗེས་སུ་འགྲོ་དགོས་པའི་ཆོས་ཉིད་ཅིག་ཆགས་སྡོད་ཡོད་རེད། བྱས་ཙང་ཐོག་མའི་ཀུན་སློང་དེ་མ་དག་པ་ཡིན་དུས། མ་འོངས་པར་དཔལ་འབྱོར་ཆེན་པོ་ཞིག་ཆགས་པ་ཡིན་ན་ཡང་། དེས་སྤྱི་ཚོགས་ཀྱི་ནང་དུ་གཉའ་གནོན་དང་བཤུ་གཞོག་གཏོང་བྱེད་ལྟ་བུ་དང་། ཤེས་ཡོན་གྱི་ཐོག་ནས་ཆབ་སྲིད་མཁས་ཅན་ལྟ་བུ་ཞིག་ཆགས་པ་ཡིན་ན་ཡང་ཆབ་སྲིད་དེས་མི་མང་གི་བདེ་བ་སྒྲུབ་པ་དང་། དཀའ་ངལ་སེལ་རྒྱུའི་ཚབ་ཏུ་མི་མང་དབང་བསྒྱུར་བྱེད་ཡ། མི་མང་བེད་སྤྱད་ནས་སྤྱི་ཚོགས་ཀྱི་ནང་དུ་བརྡབ་གསིག་གཏོང་བ་མཚོན་པའི་སོ་སོའི་དཔལ་འབྱོར་ཁོ་ན་འདུ་འགོད་བྱེད་ས་ཡིན་པའི་བཟོ་འདྲ་ཞིག་གིས། ལྐོག་ཟ་རུལ་སུང་ལ་སོགས་པའི་བྱ་བ་ངན་པ་མང་པོ་ཞིག་སྒྲུབ་སྡོད་པའི་གནས་ཚུལ་ཞིག་ཆགས་ཀྱི་ཡོད་རེད། དེ་མ་ཟད་མིང་གྲགས། འགྲན་སེམས་དང་རྒྱུ་ནོར་སོགས་ཁོ་ནའི་ཆེད་དུ་ཤེས་ཡོན་ཞིག་སྦྱོང་དུས། དེ་ལ་བརྟེན་པའི་དྭོགས་པ་རྣམ་རྟོག་མང་པོ་ཞིག་སླེབས་ཡ་དང་། དེའི་ཐོག་ཏག་ཏག་ཅིག་འགྲོ་མ་ཐུབ་པ་དེས་སེམས་ལ་འཇིགས་སྣང་དང་སྔངས་སྐྲག སེམས་སྡུག་མང་པོ་ཞིག་སླེབས་སྡོད་པ། དེ་ལ་བརྟེན་ནས་ཆང་རག་ཚད་མེད་བཏུང་སྡོད་པ། བཟི་སྨན་སྤྱོད་པ་དང་། རྒྱུ་ནོར་དཔལ་འབྱོར་དང་ཐོབ་གོ་ས་སོགས་ཀྱི་ཆེད་དུ་རྫུན་བཤད་པ། དེ་བཞིན་དུ་རྐུ་མ་དང་ཇག་པ་རྒྱབ་པ་སོགས་སྤྱོད་ངན་རིགས་མང་པོ་ཞིག་བྱུང་བ་དང་། དེ་དག་ཐམས་ཅད་ཀྱང་མཐར་གཏུགས་ན་ཐོག་མའི་ཀུན་སློང་གི་བསམ་པ་དེ་མ་འགྲིག་པའི་དབང་གིས་རེད་སྙམ། དེ་ལྟ་བུའི་ཀུན་སློང་གི་བསམ་པ་ངན་པ་དེ་ཕྲུ་གུ་ཆུང་དུས་ནས་ཡོད་པ་ཞིག་རེད་དམ་ཞེ་ན། རྩ་བ་ནས་མ་རེད། གཞི་རྩའི་ཆ་ནས་བག་ཆགས་འདྲ་པོ་ཞིག་ཡོད་རྒྱུ་རེད་དེ། དེ་འདྲའི་བསམ་ངན་སློང་བའམ་ཤུགས་ཆེར་སྐྱེ་རུ་འཇུག་མཁན་ལྟ་བུ་དེ་ཕ་མ་དང་དགེ་རྒན། གྲོགས་པོ། ཉེ་འཁོར་བ་ཚོའི་ཤུགས་རྐྱེན་དང་སློབ་གསོ་སྤྲོད་སྟངས་དབང་གིས་དང་དེ་དག་ཤུགས་རྐྱེན་གྱིས་ཡོང་གི་ཡོད་འགྲོ་བསམ་གྱི་འདུག །གང་ལྟར་ཡང་རྐྱེན་རྩ་གཙོ་བོ་འདྲ་པོ་དེ་རང་ཉིད་ཀྱི་ཁེ་ཕན་ཁོ་ནའི་བསམ་བློ་དང་། བཟོད་བསྲན་འདྲ་པོ་ཞིག་གཏན་ནས་མེད་པར་མི་སྒེར་སོ་སོ་ཡིན་ནའང་རེད། རྒྱལ་ཁབ་ཕན་ཚུན། མི་རིགས་དང་ཆོས་ལུགས་ཕན་ཚུན་ཡིན་ན་རེད། ཕན་ཚུན་གནོད་པའི་བྱ་བ་ཆུང་ཙག་ཞིག་བྱུང་བ་ཡིན་ན་ཡང་གཅིག་ལ་གཅིག་ལན་དང་གཉིས་ལ་གཉིས་ལན་བྱས། དེ་འདྲའི་གནས་སྟངས་དེ་ཤུགས་ཆེ་རུ་འགྲོ་ཡོང་དུས་འཛམ་གླིང་འདིའི་ནང་དུ་མི་གསོད་ཁྲག་སྦྱོར་མཚོན་པའི་དཀའ་ངལ་མང་པོ་ཞིག་ཡོང་བཞིན་པ་དེ་རེད། མདོར་ན་རང་གཅིག་པུའི་བསམ་བློའི་ངན་པ་དེ་ཡང་ཐུག་ས་་གོང་དུ་ཞུས་པ་བཞིན་ཕྱིའི་འཁོར་ཡུག་ལ་ཧ་ཅང་འབྲེལ་བ་ཆེན་པོ་ཞིག་ཡོད་ས་རེད་བསམ་གྱི་འདུག

ལྔ་པ། འོ་ན་དཀའ་རྙོག་དེ་དག་སེལ་ཐབས་ག་འདྲ་ཞིག་དགོས་འདུག་ཞུ་ན། གོང་དུ་ཞུས་པ་བཞིན་རྒྱལ་ཁབ་ཡིན་ན་ཡང་རེད། སྤྱི་ཚོགས་ཡིན་ན་ཡང་རེད། སུ་འདྲ་ཞིག་ཡིན་ན་ཡང་བསམ་བློའི་སློབ་གསོ་བའི་མི་སྣ་དང་དགེ་རྒན། ལྷག་པར་དུ་ཕ་མ་ཚོ་ཤིན་ཏུ་ནས་གལ་ཆེན་པོ་ཞིག་རེད། ཕྲུ་གུ་ཆུང་ཆུང་གི་སྐབས་སུ་སློབ་གསོའི་ཁྱད་པར་གྱིས་ཕྲུ་གུ་ཆེན་པོའི་གནས་སྐབས་སུ་ཤུགས་རྐྱེན་ཐེབས་ཀྱི་ཡོད་པ་དེ་གསལ་པོ་ཆགས་སྡོད་ཡོད་པ་སོང་ཙང་ཕ་མ་གཙོས་པའི་སྤྱི་ཚོགས་སློབ་གསོ་བ་ཚོས་ཕྲུ་གུ་ལ་རང་ཆས་སུ་ཡོད་སྡོད་པའི་བྱམས་བརྩེ་དང་བཟོད་བསྲན་དེ་ཚོ་གྲས་དེ་ཡར་གོང་འཕེལ་དུ་གཏོང་བའི་ཐབས་ལམ་ཞིག་བསྟན་རྒྱུ་དང་། དཔེར་ན་ང་ཚོ་བོད་པ་ལྟ་བུ་ལ་ཆ་མཚོན་ན། སྔོན་གྱི་རྒན་རབས་ཚོའི་གནས་སྐབས་སུ་སྲོལ་བཟང་ཡོད་པ་ནི། རང་རང་གི་བུ་རབས་ཚ་བརྒྱུད་ཚོ་ལ་ཞར་དང་ཞོར་དུ་རྒྱུ་འབྲས་དགེ་སྡིག་གི་བླང་དོར་གྱི་གནས་ལ་སློབ་གསོ་ཡང་ནས་ཡང་དུ་གནང་སྲོལ་ཡོད་པ་རེད། ཡང་སྙིང་རྗེ་དང་བྱམས་པ་ལྟ་བུ་དང་། དེ་བཞིན་དུ་འདི་བྱེད་ན་དགེ་བ་རེད་ཟེར་བ་དང་། འདི་བྱེད་ན་མི་དགེ་བ་རེད་ཟེར་བ་ལྟ་བུ་དང་། ཡང་དེ་འདྲ་བྱེད་རྒྱུ་ཡོད་མ་རེད་སེམས་ཅན་ལ་གནོད་འཚེ་ཐེབས་ཀྱི་རེད་ཟེར་བ་ལྟ་བུ། ཐ་ན་ལམ་ཁ་ནས་འབུ་ཞིག་མཐོང་བ་ཡིན་ན་ཡང་དེ་སྐྱབས་དགོས་པ་སོགས་ཀྱི་ཐོག་སློབ་གསོ་སྤྲོད་པའི་ལུགས་སྲོལ་ཞིག་ང་ཆུང་ཆུང་གི་སྐབས་སུ་ནི་འདུག མི་རིགས་གཞན་ལའང་དེ་ལྟར་ཡིན་གྱི་རེད། དེ་ལྟ་བུ་དེང་སང་གི་ཕ་མ་ཚོར་ཡོད་མེད་མི་ཤེས། དེས་ན་ཕ་མ་ཚོས་ཕྲུ་གུ་ཚོ་ཆུང་ཆུང་ཡིན་པའི་གནས་སྐབས་ནས་གཞན་བརྟེན་གྱི་བསམ་བློའི་སློབ་གསོ་སྤྲོད་རྒྱུ་དང་། དཔེར་ན་ང་རང་ཚོ་ལ་བདེ་སྐྱིད་ག་འདྲ་ཞིག་དང་ཕྱིའི་དངོས་པོ་བཟང་པོ་ག་འདྲ་ཞིག་ཐོབ་པ་ཡིན་ན་ཡང་། གཞན་ལ་བརྟེན་ནས་ཡོང་དགོས་པ་མ་གཏོགས་རང་རང་སོ་སོ་གཅིག་པུས་ཡོང་མི་ཐུབ་པ་རེད། དེར་བརྟེན་གཞན་བརྟེན་གྱི་བསམ་བློ་ཞིག་བསྐྲུན་གང་ཐུབ་བྱ་རྒྱུ་དེ་ཧ་ཅང་གི་གལ་ཆེན་པོ་རེད། བསམ་པ་དེ་ནི་ང་ཚོ་ནང་པའི་གཞུང་ནས་བཤད་སྟངས་བྱེད་པ་ཡིན་ན་རྟེན་འབྱུང་ལྟ་གྲུབ་ཀྱི་ནང་དུ་བསྡུ་བ་རེད། གཞན་ལ་གནོད་ཚེ་ལྡོག་པའི་སྤྱོད་ཚུལ་དེ་སྤྱོད་པ་འཚེ་བ་མེད་པར་བསྡུ་བ་རེད། མདོར་ན་བདེ་སྡུག་ག་འདྲ་ཞིག་བྱུང་བ་ཡིན་ན་ཡང་རྒྱུ་ལ་བརྟེན་ནས་ཡོང་དགོས་པ་ཞིག་དང་། གཞན་ལ་བརྟེན་ནས་ཡོང་དགོས་པ་ཡིན་པས་འབྲས་བུ་བཟང་པོ་ཞིག་ཡིན་ན་དེ་ལ་རྒྱུ་བཟང་པོ་ཞིག་ཡོད་དགོས་པ་དང་དེ་མེད་ན་ཡོང་རྒྱུ་མེད་པ་ཞིག་རེད། དཔེར་ན་འབྲས་ཀྱི་མྱུ་གུ་སྐྱེ་བ་ལ་འབྲས་ཀྱི་ས་བོན་ཞིག་དགོས་ཀྱི་ཡོད་རེད་མ་གཏོགས། ནས་ཀྱི་ས་བོན་ལ་བརྟེན་ནས་ཡོང་རྒྱུ་མེད་པའི་གནས་སྟངས་ཤིག་གིས། འབྲས་བུ་ག་འདྲ་ཞིག་ཡིན་ན་ཡང་རང་དང་མཐུན་པའི་རྒྱུ་ཞིག་ལས་བྱུང་དགོས་པར་སོང་ཙང་། འབྲས་བུ་བདེ་སྡུག་གམ་བཟང་ངན་དེ་རྒྱུ་བཟང་ངན་གྱིས་ཁྱད་པར་ལས་བྱུང་བ་དང་། དེ་ཡང་སྡུག་བསྔལ་དེ་གཞན་ལ་གནོད་པའི་བྱ་བ་ཞིག་གི་སྟེང་ནས་བྱུང་བ་དང་། བདེ་བ་དེ་གཞན་ལ་ཕན་པར་བྱེད་པའི་རྒྱུ་ཞིག་དང་འབྲེལ་ནས་བྱུང་བ་ཡིན་ཞིང་། ང་རང་ཚོ་སུ་ཡིན་ན་ཡང་བདེ་བ་འདོད་ལ་སྡུག་བསྔལ་མི་འདོད་པ་གཅིག་མཚུངས་ཡིན་པས། བདེ་བ་དེ་ཐོབ་པ་ལ་དེའི་རྒྱུ་བསྒྲུབ་དགོས་པ་དང་། སྡུག་བསྔལ་དེ་མེད་པར་བཟོ་བ་ལ་དེའི་རྒྱུ་དེ་མེད་པ་བཟོ་དགོས་པ་ཞིག་ཡིན་དུས། ཕ་མ་ཚོས་རང་གི་ཕྲུ་གུ་ཆུང་ཆུང་ཡིན་པའི་གནས་སྐབས་ནས་རྒྱུ་འབྲས་རྟེན་འབྱུང་གི་རྣམ་བཞག་དང་། གཞན་ལ་བརྟེན་དགོས་པའི་བསམ་བློ། གཞན་ལ་ཕན་སེམས་བཅས་བསྐྲུན་གང་ཐུབ་བྱེད་དགོས་པ་དེ་ཧ་ཅང་གལ་ཆེན་པོ་ཞིག་རེད། དེ་བཞིན་དགེ་རྒན་ཚོ་ཡིན་ན་ཡང་དགེ་ཕྲུག་ཚོར་ཤེས་ཡོན་སློབ་སྦྱོང་དེ་གཙོ་བོ་མི་ཚེ་འདི་གའི་བདེ་སྐྱིད་ཀྱི་ཆེད་དུ་སྤྲོད་ན་ཡང་འགྲིག་གི་རེད་དེ། ཡིན་ན་ཡང་གཞན་ལ་འགྲན་པའི་ཕྱིར་རམ་རྒྱུ་ནོར་དཔལ་འབྱོར་ཁོ་ནའི་ཆེད་དུ་མ་ཡིན་པར་སློོབ་སྦྱོང་དང་མཉམ་དུ་རང་ཉིད་ཀྱི་བདེ་སྐྱིད་སོགས་ལེགས་ཚོགས་གང་ཡིན་ཡང་གཞན་ལ་བརྟེན་ནས་ཡོང་དགོས་པའི་སློབ་གསོ་བཟང་པོ་སྤྲོད་དགོས་པར་དགེ་མཚན་ཆེན་པོ་ཡོད་པར་མཐོང་། དེ་བཞིན་དུ་རྒྱལ་ཁབ་སོ་སོ་ཡིན་ན་ཡང་ཡ་རབས་བཟང་སྤྱོད་དེའི་སྒང་ལ་ཤུགས་རྐྱེན་ཐེབས་པ་ཞིག་བྱེད་དགོས་ཀྱི་འདུག་ཅེས་ཞུ་རྒྱུ་དང་། ལྷག་པར་དམག་འཁྲུག་གི་དུས་རབས་འདིར་བཟོད་སྒོམ་ནི་ཧ་ཅང་གི་གལ་ཆེན་ཞིག་མཐོང་གི་འདུག གང་ལགས་ཞུ་ན། འགྲོ་བ་མིའི་ཞེ་སྡང་གིས་བསྐྲུན་པའི་འཇིག་རྟེན་འདིའི་དམག་འཁྲུག་དེ་འགྲོ་བ་མི་རང་ཉིད་ཀྱིས་མེད་པར་བཟོ་དགོས་པ་མ་གཏོགས་གཞན་གང་གིས་ཀྱང་མི་ནུས། གལ་སྲིད་དེ་མེད་པར་མ་བཟོ་བར་དེ་མུར་ལུས་ན། ནམ་ཞིག་དམག་འཁྲུག་དེས་ཚུར་སྣོད་བཅུད་ཡོངས་རྫོགས་རྩ་མེད་དུ་གཏོང་ངེས་པ་རེད། དཔེར་ན་ཤིང་ལས་སྐྱེས་པའི་སྲིན་འབུས་ཤིང་བཟོས་པ་བཞིན་འགྱུར་ངེས་རེད། འོ་ན་དམག་འཁྲུག་སེལ་ཐབས་ཅི་ཡོད་ཅེ་ན། ཐབས་ལམ་ཡག་ཤོས་ནི་བཟོད་པ་རེད། རྒྱུ་མཚན་ནི་དམག་འཁྲུག་ནི་ཁོང་ཁྲོ་ལ་བརྟེན་ནས་བྱུང་བ་དང་། བཟོད་པ་ནི་ཁོང་ཁྲོའི་བཉེན་པོ་ཡིན་པས། དཔེར་ན་མེ་གསོད་བྱེད་ཆུ་མཆོག་ཡིན་པ་བཞིན་དུ་ཞེ་སྡང་གི་མེ་ལྕེ་འཇོམ་པ་ལ་བཟོད་པའི་ཆུ་བོ་དེ་ལས་ལྷག་པ་ཞིག་མེད། དེར་བརྟེན་ང་རང་ཚོས་ཕུགས་ཀྱི་ཁེ་ཕན་འཛམ་གླིང་འདིའི་མཐུན་འབྲེལ་དང་ཞི་བདེ་ལ་བསམ་ནས་གནས་སྐབས་བཟོད་བསྲན་བསྟེན་རྒྱུ་ཧ་ཅང་གལ་ཆེ། ལྷག་པར་དུ་དེང་གི་འཇིག་རྟེན་འདི་ཁ་ལོ་སྒྱུར་མཁན་ཐོབ་གོ་ས་ཡོད་པའི་དཔོན་རིགས་དང་། རྒྱུ་དངོས་པོ་ཡོད་པའི་འབྱོར་ལྡན། རྣམ་དཔྱོད་དང་ལག་བརྩལ་ཡོད་པའི་འཕྲུལ་ལས་མཁས་ཅན་ཚོར་གཞན་ལ་བྱམས་བརྩེ་དང་བཟོད་སྒོམ་དང་དཀྱེལ་ཡངས་དགོས་པ་ནི་ཤིན་ཏུ་ནས་གལ་ཆེའོ།

མཐའ་དོན་ཞུ་རྒྱུ་ནི། གོ་ལ་འདིའི་སྒང་གི་སྲོག་ལྡན་ཡོད་དོ་ཅོག་རང་ཉིད་བདེ་བ་འདོད་ལ་སྡུག་བསྔལ་མི་འདོད་པ་གཅིག་གྱུར་ཡིན་པ་དང་། ས་ཆེན་པོ་འདི་ནི་གོ་ལ་འདིའི་སྒང་གི་སྲོག་ལྡན་ཡོངས་རྫོགས་ལ་ཐོབ་ཐང་འདྲ་མཉམ་ཡིན་པར་མ་གཏོགས་ད་ལྟའི་དུས་རབས་འདིའི་འགྲོ་བ་མིའི་རིགས་གཅིག་པུར་མི་དབང་། དེར་བརྟེན་ང་ཚོས་སོ་སོའི་བདེ་སྡུག་གི་མྱོང་ཚོར་ལ་དཔག་ནས་གཞན་གྱི་ལུས་སྲོག་ལ་བརྩི་མཐོང་གནང་རོགས་ཞུ་རྒྱུ་དང། མ་ཟད་མི་རབས་རྗེས་མ་རྣམས་ལ་ཡང་ཐུགས་བསམ་བཞེས་ནས་བཟའ་བཏུང་གྱོན་གོས་སོགས་འཚོ་བའི་ལོངས་སྤྱོད་གང་གི་ཐད་ལའང་ངེས་པར་དུ་ཚོད་འཛིན་དང་གོ་ལ་འདི་ལ་གཅེས་སྤྲས་གནང་རོགས། ལྷག་པར་རང་ཅག་གི་ཚེ་སྲོག་ཡུན་གནས་དང་ལུས་སེམས་བདེ་ཐང་འདོད་ཚེ། ཁོར་ཡུག་འདི་བདག་སྐྱོང་ངེས་པར་དུ་གནང་དགོས། དེའི་འགན་འཁྲི་ཡང་ང་ཚོ་མི་རེ་ངོ་རེ་ལ་ཡོད་པ་ཤེས་དགོས། ། ཐུགས་རྗེ་ཆེ། སེར་བྱེས་དགེ་བཤེས་ཚེ་དབང་སྟོབས་ལྡན་གྱིས་ ༢༠༡༦-༩-༡༧ ཉིན།



2016/10/30

ལས་དང་པོ་བའི་སློབ་གཉེར་བ་ཞིག་ལ་ངེས་པར་ཚང་དགོས་པའི་གཞི་རྩའི་དགོས་མཁོ་གསུམ།


ལྷ་རམས་པ་ཏྲེ་ཧོར་ཟླ་བ་ཚེ་རིང་།

དེ་རིང་ཞོར་འཕྲོས་ཙམ་གྱིས་སྤྱིར་སློབ་གཉེར་བ་ཞིག་དང་ཁྱད་པར་དུ་ནང་བསྟན་གཞུང་ལུགས་ལ་སློབ་གཉེར་བྱེད་མཁན་ཞིག་ཡིན་ན་དེ་ལ་ཚང་དགོས་པའི་གཞི་རྩའི་ཆ་ཅན་འགའ་རེ་འདི་ནས་འཆད་ཁྲིད་ཀྱི་ཞར་ལ་སླར་ཡང་དྲན་གསོ་ཐེངས་གཅིག་བྱ་འདོད་བྱུང་།

དང་པོ།
མི་ཚེ་དོན་སྙིང་ལྡན་པ་ཞིག་དང་། དེ་ལས་བཟང་ན་བྱ་བཞག་རླབས་ཆེན་ཞིག་གི་དོན་དུ་གཏོང་བ་ལ་སློབ་གཉེར་གྱི་རྨང་གཞི་བརྟན་པོ་ཞིག་དགོས། བསླབ་གཞིའི་སློབ་གཉེར་གྱི་སྡེ་ཚན་གང་འདྲ་ཞིག་གི་ནང་དུ་ཞུགས་ན་ཡང་གཞན་གྱིས་བཙན་ཤུགས་ཀྱིས་དེད་པ་དང་། རི་བོང་ཅལ་འདྲོགས་ཀྱིས་རྒྱུགས་ནས་ཚུད་སོང་བ་ལྟ་བུ་ནི་བརྟན་པོ་མེད་ལ། དེ་འདྲ་ཞིག་གིས་སློབ་གཉེར་བའི་གྲལ་དུ་འཚང་མཁན་རྣམས་ནི། ངས་བལྟས་ན་ཕན་ཐོགས་མིན་གཉིས་ཀྱི་ཕྱི་མའི་བརྒྱ་ཆ་མང་བ་ཡོད་རེད་དྲན།
དེ་འདྲ་ཕལ་ཆེ་བ་ལ་རང་ངོས་ནས་ནུས་ཤུགས་དང་དོ་དབྱིངས་ཅི་ཡང་མེད་པས་ཁྲལ་ལྟ་བུ་ཆགས་ཀྱི་རེད། དེ་འདྲ་ཡིན་ཙང་རང་གི་སེམས་གཏིང་ནས་དབྱིངས་དང་དོ་སྣང་ཡོད་པའི་སློབ་གཉེར་བའི་སྡེ་ཚན་ཞིག་ཏུ་ངེས་པར་ཞུགས་དགོས། དེ་ནི་བརྟན་པོ་ཡོད་ལ། སློབ་གཉེར་བྱེད་ཚུལ་ལ་ཡང་གཞི་རིམ་གྱིས་ནུས་ཤུགས་ཡོད། འདི་ཤིན་ཏུ་གལ་ཆེ་རེད།

གཉིས་པ།
སློབ་གཉེར་བ་སྤྱིར་དང་ཁྱད་པར་ནང་བསྟན་སློབ་གཉེར་བྱེད་མཁན་ཞིག་ཡིན་ན་དངོས་པོའི་གནས་ལུགས་དང་། བདེན་དོན། དངོས་ཡོད་གནས་ཚུལ་ཅི་ཞིག་ཡིན་མིན་བརྟག་དཔྱད་བྱེད་མཁན་ཞིག་ཡིན་པ་ལས་བཤད་མཁན་སུ་ཡིན་དང་དེ་ཉིད་གྲུབ་མཐའ་གང་དུ་གཏོགས་མིན་ལ་འབྲེལ་བ་སྤུ་ཙམ་ཡང་མེད་པས། བློ་གཟུ་བོར་གནས་དགོས་པ་འདི་ཤིན་ཏུ་གལ་ཆེ་པོ་རེད།
ཀུན་ལ་ཐེ་ཚོམ་དང་བཅས་པ་དང་། གང་ཡང་ཡིན་ཆོག་པ་དང་། ཡིན་མི་སྲིད་པ་མིན་སྙམ་པ་དང་། ཁོང་གིས་དེ་ལྟར་གསུངས་ཀྱང་དངོས་གནས་ཅི་ཡིན་ནམ་སྙམ་པའི་སེམས་ཚོར་གྱི་ཟུར་ཞིག་དུས་རྟག་ཏུ་ངེས་པར་ཡོད་དགོས།
དང་པོ་ཉིད་ནས་ང་དགེ་ལྡན་པ་ཡིན། ང་ས་སྐྱ་པ་ཡིན་སྙམ་པ་དང་། འདི་གསུང་མཁན་བླ་མ་རྩ་ཆེན་ཡིན་པས་དེ་ལོས་ཡིན་སྙམ་པའི་ཕྱོགས་གཅིག་ཏུ་ལྷུང་ཚེ། གང་མཐོང་བ་དང་གང་ཐོས་པ་ཚང་མ་དེའི་ཕྱོགས་དང་སྒྲུབ་བྱེད་ཉག་གཅིག་ཏུ་འཆར་བ་ལས་ཕྱོགས་གཞན་པ་དེ་གཏན་ནས་མཐོང་མི་ཐུབ།
ཁྱད་པར་ངེད་ཅག་སློབ་གཉེར་བ་ཕལ་མོ་ཆེའི་ཁྲོད་དུ་རིམས་ནད་ལྟ་བུའི་ཀུན་ལ་ཁྱབ་པའི་ན་ཚ་ཞིག་ཡོད་པ་ནི། ཁོ་ང་ལས་མཁས་པ། བླ་མ་རྩ་ཆེན། སྐྱེས་བུ་དམ་པ་ཡིན་པས། ངས་ཁོང་གི་གསུངས་པ་དེ་ལས་གཞན་ཞིག་བསམ་མི་ཕོད། བརྟག་མི་ཕོད། བཤད་མི་ཕོད་པ་ལག་ཐལ་མོ་སྙིང་ཁར་སྦྱར་ནས་འདུག་ཅང་བྱེད་པ་འདི་ནི། འཕྲལ་སེལ་ལ་ཕན་ཐོགས་ལྟ་བུ་ཞིག་ཚོར་སྲིད་ཀྱང་ཕུགས་སུ་བརྟན་པོ་གཏན་ནས་མ་རེད།
སྟབས་ཉེན་ན་ སེམས་ཁམས་དང་ཀླད་པ་རང་དབང་གི་འཕེལ་རྒྱས་འགྲོ་བའི་གེགས་དང་འཆིང་ཐག་གི་རྒྱུ་སྡུག་ཤོས་དེ་ཆགས་སྲིད། ངེད་ཅག་ནི་དངོས་པོའི་བདེན་དོན་འཚོལ་མཁན་ཡིན་པས། བདེན་དོན་གྱི་ཆེད་དུ་གྲུབ་མཐའ་དགོས་པ་ཞིག་ཡིན་པ་ལས། གྲུབ་མཐའི་ཆེད་དུ་བདེན་དོན་རྩོད་པ་ནི་རྒྱུ་འབྲལ་གོལ་འཛོལ་དང་ཡོངས་སུ་ནོར་བ་རེད།
དེས་ན་སློབ་གཉེར་བ་སུ་ཞིག་ཡིན་ཡང་རང་གི་མོས་ཁམས་དང་འཚམ་པའི་གྲུབ་མཐའ་གང་དུ་ཞུགས་མིན་དང་། དགེ་རྒན་སུ་ཞིག་བསྟེན་མིན་དབང་ཚད་དང་གདམ་ཁ་ཡང་མཐར་ཐུག་ན་རང་ཉིད་ཁོ་ན་ལ་ཡོད་དགོས།
སློབ་གཉེར་བ་སུ་ཞིག་ཡིན་ཡང་སྒོ་གསུམ་ལ་གནོད་ཤུགས་མེད་པ་སེམས་ཁམས་དང་ཀླད་རྒྱ་རང་དབང་གི་སྒོ་ནས་འཕེལ་རྒྱས་སུ་འགྲོར་བཅུག་དགོས་པ་ཆེས་ཤིན་ཏུ་གལ་ཆེ་རེད། དེ་འདྲ་བྱས་ན་མི་སོ་སོ་ལ་ཡོད་པའི་ལྷན་སྐྱེས་ཀྱི་ནུས་པ་རྒྱས་ཏེ་སྐབས་རེ་ཡ་མཚན་པའི་བསམ་བློ་བ་དང་ལྟ་གྲུབ་པ་ངོ་མཚར་ཅན་དེ་འདྲའང་ཐོན་སྲིད་པ་རེད།

གསུམ་པ།
དགོན་སྡེ་ལ་ལར་སློབ་མ་སོ་སོས་བརྟག་དཔྱད་ནན་པོར་བྱས་ནས་རང་གི་འདོད་མོས་དང་འཚམ་པའི་དད་པ་བྱ་ཡུལ་གྱི་དགེ་རྒན་གྱི་མདུན་དུ་སློབ་ཁྲིད་འགྲོ་འདོད་ཤིན་ཏུ་ཆེ་ཡང་འགྲོར་མ་བཅུག་པར་དགེ་རྒན་གྱི་འོས་ཆོས་ཚང་མིན་དང་། སློབ་མའི་འདོད་པ་ཡོད་མེད་་སོགས་ལ་གཏན་མ་བལྟས་པར་ཁང་ཚན་དང་། མི་ཚན། ཤག་ཚང་སོགས་ཀྱི་ཆེད་བསྐོས་དང་ཐད་བསྐོས་ཀྱི་དགེ་རྒན་གྱི་འོས་ཆོས་གཏན་མ་ཚང་བའི་མི་རེ་གཉིས་ཀྱི་མདུན་དུ་ཨུ་ཚུགས་ཀྱིས་བཙན་བརྫངས་བྱས་པ་སོགས་ནི་སངས་རྒྱས་ཀྱི་དགོངས་པ་དང་འགལ། དམ་ཆོས་འདུལ་བ་སོགས་དང་མི་མཐུན་པར་མ་ཟད།
འཇིག་རྟེན་མི་ཆོས་རིང་ལུགས་ཙམ་དང་ཡང་རྒྱབ་འགལ་དུ་སོང་ཞིང་། དད་མོས་བྱ་ཡུལ་གྱི་དགེ་བའི་བཤེས་གཉེན་ནི་ལེགས་ཚོགས་ཐམས་ཅད་ཀྱི་རྩ་བ་ཡིན་པས། ཚེས་གཅིག་ནས་ནོར་ན་སུམ་ཅུའི་བར་འཁྲུག་ངེས་པས། མི་འདོད་སར་བཙན་བརྫངས་དང་འདོད་སར་བཙན་བཀག་ནི་བཀྲ་མི་ཤིས་པའི་བདུད་ལས་ཐུ་བོ་ཆེ་ཡིན་པས། བརྟག་དཔྱད་ནན་ཏན་གྱིས་འོས་ཆོས་ཚང་ཞིང་། འདོད་མོས་ཡོད་པའི་བཤེས་གཉེན་འཚོལ་བའི་དབང་ཚད་ཀྱང་སློབ་མ་རང་ཉིད་ལ་ངེས་པར་ཡོད་དགོས། རང་གི་འདོད་པ་དང་དད་པ་ཡོད་པའི་དགེ་བའི་བཤེས་གཉེན་ཞིག་བསྟེན་ཐུབ་ན་གཞན་ལྟ་ཞོག དད་མོས་ཙམ་གྱིས་སྟོབས་ཀྱིས་ཀྱང་འཆད་ཁྲིད་སེམས་ལ་འཇགས་བདེ་བ་དང་། ཡུན་རིང་མི་བརྗེད་པ་དང་། བཤེས་གཉེན་གྱི་བྱིན་རླབས་ཀྱང་རྒྱུད་ལ་འབྱུང་ངེས་པའི་ཁྱད་པར་ཏན་ཏན་ཡོད་རེད་སྙམ།

2016/07/17

སེར་བྱེས་མཁན་རབས་དོན་དྲུག་པ་རྗེ་བཙུན་དགེ་འདུན་ཆོས་འཕེལ་གྱི་རྣམ་ཐར་རགས་བསྡུས།

 
སེར་བྱེས་མཁན་རབས་དོན་དྲུག་པ་རྗེ་བཙུན་དགེ་འདུན་ཆོས་འཕེལ་གྱི་རྣམ་ཐར་རགས་བསྡུས།

སེར་བྱེས་ཏྲེ་ཧོར་རྗེ་བཙུན་དགེ་འདུན་ཆོས་འཕེལ་མཆོག་ནི་ཕྱི་ལོ་1941ལོར་ཏྲེ་ཧོར་དཀར་མཛེས་གྲོང་ཁྱེར་གྱི་ཉེ་འདབས་སུ་ཆགས་པའི་སུ་ངོ་ཞེས་པའི་གྲོོང་ཚོ་ཞིག་ཏུ་ཡབ་ཨ་དགའ་དང་ཡུམ་བསོད་ནམས་སྒྲོལ་མ་གཉིས་སུ་སྐུ་འཁྲུངས། དགུང་ལོ་བརྒྱད་ལོན་པ་ན་དཀར་མཛེས་དགོན་དུ་ཆོས་བཞུགས་གནང་ཞིང་དགོན་དུ་ལོ་ཤས་བཞུགས་རྗེས་གྲྭ་སར་ཕེབས། ཕྱི་ལོ་1955ལོར་གདན་ས་ཆེན་པོ་སེ་ར་དགོན་དུ་ཕེབས་གནང་གིས་བྱེས་མཁས་སྙན་གྲྭ་ཚང་དུ་གསར་ཞུགས་བྱས་ཏེ་རྒན་བསྟན་པ་ཉིི་མ་ཁག་ཐེག་དགེ་རྒན་དུ་བསྟེན་པར་གནང་། སྦས་པའི་རྣམ་འབྱོར་པ་ཆེན་པོ་རྒན་བློ་དགའ་མཆོག་དང་བྱེས་མཁས་སྙན་གྲྭ་ཚང་གི་མཁས་པའི་གཙུག་རྒྱན་རྒན་རིན་པོ་ཆེ་དགེ་བཤེས་བློ་བཟང་དབང་ཕྱུག་(སེར་བྱེས་མཁན་རབས་རེ་དྲུག་པ)ཅེས་གྲགས་པའི་སྙན་པ་ས་སྟེང་དུ་ཁྱབ་པའི་དམ་པ་གང་དེའི་ཞབས་རྡུལ་སྤྱི་བོས་བླངས་ཏེ་འགོ་བསྡུས་གྲྭ་ནས་བཟུང་གཞུང་ཆེན་ཁག་ལེགས་གཟིགས་གནང། དུས་འགྱུར་སྐབས་སྦག་ས་ཆོས་སྒ་དང་བྱེས་ཀྱི་སེ་ར་དགོན་དུ་རིམ་བཞིན་སློབ་གཉེར་འཕྲོ་སྐྱོང་གནང་།
ང་རང་གསར་བཞུགས་བྱས་ཏེ་ཐོག་མའི་དཔེ་ཁྲིད་ཞུས་པ་ནས་ད་བར་རྒན་ཁོང་གི་མདུན་དུ་དཔེ་ཁྲིད་དང་འཆད་ཁྲིད་དབང་གནང་ལུང་མན་ངག་སོགས་ཞུ་སྐལ་ཐོབ་ཅིང་། རྒན་ཁོང་གི་སྐུ་ཡོན་དང་དགོངས་པ་བཞེས་ཕྱོགས་སོགས་མི་ཉུང་བ་ཞིག་མཐོང་ཐོས་བྱུང་་ཡོད། དུས་རྒྱུན་གདན་སའི་གསར་བུ་བ་ཚོ་ལ་དཔེ་ཁྲིད་གནང་དུས་ཉིན་ཡ་ལ་དཔེ་ཁྲིད་དང་ཉིན་ཡར་བསླབ་བྱ་གནང་གི་ཡོད་ཅིང་། དཔེ་ཆ་ཁྲིད་དུས་ཀྱང་བཤད་པ་གཅིག་པོ་མིན་པར་རྟག་ཏུ་བསླབ་བྱ་དང་འབྲེལ་ནས་གསུངས་གནང་གི་ཡོད།
རྒན་ཁོང་ཉིད་བོད་ཀྱི་རྒྱལ་རབས་དང་ལོ་རྒྱུས། དམ་པ་ཚོའི་རྣམ་ཐར་སོགས་ཀློག་རྒྱུར་མཉེས་པོར་ཡོད་སྟབས་སྐབས་རེ་འདས་པའི་ལོ་རྒྱུས་ཀྱི་ཆགས་འཇིག་དང་སླད་མ་འོངས་བྱེད་འཆར་ཅི་དགོས་ཀྱང་ཁ་གསལ་གནད་ལ་ཁེལ་བའི་བཀའ་སློབ་ཡང་ཡང་གནང་གི་ཡོད། བཀའ་སློབ་དང་གསུང་བཤད་ཅི་འདྲ་ཞིག་གནང་རུང་རྙིང་ཞེན་དང་ཨུ་ཚུགས་མི་གནང་བར་ཐུགས་བབ་ཡངས་པོ་དང་གཟིགས་རྒྱ་ཆེན་པོས་དོན་དངོས་དང་མཐུན་པ་ཞེ་ཅིག་གནང་གིན་ཡོད་པས་གདན་སའི་བགྲེས་སོང་ཚོའི་གྲས་ན་དུས་དང་མཐུན་པ། གུ་ཡངས་དང་གཟིགས་རྒྱ་ཆེ་བ་དེ་ལྟ་བུ་རེ་ཨེ་ཡོད་སྙམ་པ་དྲན་མྱོང་། མཐུན་རྐྱེན་གང་འདྲ་ཞིག་འཛོམས་ནས་དེ་ལྟར་ཆགས་པ་ཡིན་མིན་ཁ་གསལ་ཞིག་མ་ཤེས་རུང་། ངས་བསམ་ཚོད་ལ་རྒན་ཁོང་དཔེ་དེབ་ཀློག་རྒྱུར་ཧ་ཅང་མཉེས་ཤིང་དཔེ་དེབ་སྣ་ཚོགས་གཟིགས་པའི་རྐྱེན་གྱིས་མིན་ནམ་སྙམ། ཐེངས་ཤིག་ལ་དགེ་ཕྲུག་ཅིག་གིས་དཔེ་དེབ་ལེགས་པོ་ཞིག་གཟིགས་འབུལ་ཆེད་རྒན་གྱི་སྐུ་ཚ་དེ་ལ་སྤྲོད་འདུག སྐུ་ཚ་དེས་དོ་ནུབ་དཔེ་དེབ་འདི་རྒན་ལ་འབུལ་རྒྱུ་མིན། དཔེ་དེབ་འདི་བཀླགས་ནས་མ་གཟིམ་པར་ཕྱི་པོར་བཞུགས་ཀྱི་རེད་ཅེས་བཤད་འདུག
ན་ནིང་ད་ལོ་གདན་སའི་སྐྱེས་ཆེན་མང་པོ་ཞིག་དགོངས་པ་གཞན་དོན་དུ་བཤེགས་ཏེ་དབང་ལུང་མན་ངག་གནང་མཁན་ཡང་དཀོན་ཙམ་གྱུར་ཡོད་སྟབས། གཞི་ནས་རྒན་ཁོང་གི་དབང་ལུང་མན་ངག་སྩོལ་རྒྱུར་ཞལ་བཞེས་གནང་བ་ལས། དེ་སྔ་ཡིན་ན་དཔེ་ཁྲིད་ཤ་སྟག་གནང་བཞིན་བཞུགས་པ་ལས་དབང་ལུང་གནང་རྒྱུ་ཞལ་བཞེས་གནང་གི་མེད། དེ་སྔར་དགེ་ཕྲུག་ཅིག་གིས་རྡོ་རྗེ་འཇིགས་བྱེད་ཀྱི་དབང་ཞུ་ཆེད་གསོལ་འདེབས་ཞུས་དུས། རྒན་ཁོང་གིས་ཟམ་པ་ལྟག་ཏུ་བཞག་སྟེ་ཆུ་རག་འོག་ནས་རྒྱག་ན་མི་འགྲིག ད་ལྟ་སྐྱབས་རྗེ་ཆོས་ལྡན་རིན་པོ་ཆེ་སོགས་བཞུགས་མུས་ཡིན་སྟབས་ཁོང་རྣམ་པར་ཞུས་ན་ཡག་ཚུལ་གྱི་བཀའ་སློབ་ཕེབས་ནས་ཞལ་བཞེས་གནང་མི་འདུག
ཟམ་གདོང་རིན་པོ་ཆེས་སེ་རར་གསུང་ཆོས་གནང་གཏན་ཁེལ་བ་རྒན་ཁོང་གིས་གསན་རྗེས། བུམ་པ་མགོ་ཐོག་བཞག་ནས་བྱིན་རླབས་ཐོབ་མིན་མི་ཤེས། བྱིན་རླབས་ཞེས་པ་ནི་མཁས་པ་ཚོའི་ལེགས་བཤད་ཉན་ནས་བློ་སྐྱེད་ཐོབ་པ་འདི་རང་ཡིན་ཞེས་ཟམ་གདོང་རིན་པོ་ཆེའི་གསུང་ཆོས་ལ་འགྲོ་ཐུབ་ན་བློ་སྐྱེད་ཧ་ཅང་ཆེན་པོ་ཡོད་ཚུལ་གསུངས་ཏེ་རྒན་ཁོང་ཉིད་ཀྱང་གསུང་ཆོས་སུ་ཕེབས་གནང་འདུག
སྔ་ལོ་སྔ་ལོ་ཞིག་ཏུ་དགེ་སྐོས་ཤིག་གིས་རྒན་རིན་པོ་ཆེ་ལ་ཆོས་རྭའི་ནང་དུ་སློབ་གཉེར་བ་དག་ལ་བཀའ་སློབ་གནང་དགོས་ཚུལ་གྱི་བཀའ་ཕེབས་བྱུང་རྗེས། བཀའ་ནན་མ་ཆོག་པར་དགེ་འདུན་འདུས་པ་རྒྱ་མཚོ་ལ་རྒན་ཁོང་གི་དགོངས་ཚུལ་ཅི་ཡོད་གསུང་གནང་སོང་། སྐབས་དེར་ད་ཡོད་ཀྱི་གདན་སའི་དཔེ་ཁྲིད་གནང་སྟངས་འདིར་འགྱུར་བ་ཞིག་བྱུང་ན་ཡག་ཚུལ་གྱི་བཀའ་སློབ་ཕེབས་ཤིང་། རྒན་རང་ཉིད་དཔེ་ཁྲིད་དགེ་རྒན་ཞིག་ཡིན་སྟབས་ཞོགས་པ་ནས་དགོང་མོའི་བར་འཛིན་གྲྭ་ཧ་ཅང་མང་པོ་ཞིག་ལ་གཞུང་ཆ་ཚང་ཁྲིད་དགོས་དུས་དགེ་རྒན་ཚོས་ཁྲིད་བྱའི་སློབ་ཚན་ཁག་གྲ་སྒྲིག་ལེགས་པོར་བྱེད་ཁོམ་མེད་པས་སློབ་ཁྲིད་སྐབས་ཇི་བཞིན་ཁྲིད་མ་ཐུབ་པའི་སྐྱོན་གནས་འབྱུང་ཉེ་ཆེ་ཚུལ། དེ་ལས་ཕར་ཕྱིན་དང་དབུ་མ་སོགས་གཞུང་ཆེན་ཁག་ཁྱད་ལས་ལྟ་བུས་གཞུང་གཅིག་རང་ཁྲིད་ཐུབ་མཁན་ཞིག་བྱུང་ན་སློབ་མ་ཚོ་ལ་བློ་སྐྱེད་ཆེ་བ་ཡོང་ཚུལ་སོགས་ཀྱི་གལ་འགངས་ཆེ་བའི་བཀའ་སློབ་ནན་པོར་གནང་། (བཀའ་སློབ་འདི་ཡིག་ཐོག་ཕབ་བཞིན་འདུག་པས་མི་རིང་བར་དྲ་གྲོགས་ཚོས་སྤྱན་གཟིགས་གནང་ཐུབ་སྲིད།) དུས་སྐབས་དེ་འདྲ་ལ་དེ་ལྟ་བུའི་དགོངས་པ་བཞེས་ཐུབ་མཁན་ཡང་དཀོན་ཙམ་ཡིན་ལ་སྐབས་དེ་ཤད་ནས་བཟུང་རྒན་ཁོང་གིས་ཉིན་རྒྱུན་སློབ་ཚན་ཆ་ཚང་ཁྲིད་རྒྱུ་མཚམས་བཞག་ནས་གལ་ཆེའི་གཞུང་ལུགས་མང་པོ་ཞིག་ཆེད་དུ་ཟླ་ངོ་མང་པོར་དཔེ་གཟིགས་གནང་རྗེས་འཆད་ཁྲིད་བྱེད་འགོ་བཙུགས་ཡོད། ཕར་ཕྱིན་གཟིགས་མཁན་ལས་དང་པོ་བ་ཚོར་དམིགས་ཏེ་རྗེ་བཙུན་ཆོས་ཀྱི་རྒྱལ་མཚན་གྱིས་མཛད་པའི་ཕར་ཕྱིན་སྐབས་དང་པོ་ཆ་ཚང་། དབུ་མ་གཟིགས་མཁན་ལས་དང་པོ་བ་དག་ལ་དམིགས་ཏེ་དབུ་མའི་སྤྱི་དོན་འཆད་ཁྲིད། རྗེའི་ལྟ་བའི་ལེགས་བཤད་ཆེན་པོ་ལྔ་ཁྲིད་རྒྱུ་དགོངས་བཞེས་ཀྱིས། ལྷག་མཐོང་ཆེན་མོ་ཆ་ཚང་འཆད་ཁྲིད། རྩ་ཤེར་ཊིཀ་ཆེན། དབུ་མ་དགོངས་པ་རབ་གསལ། ལེགས་བཤད་སྙིང་པོ་དབུ་མའི་སྐོར་ཆ་ཚང་འཆད་ཁྲིད་(འདི་མཇུག་མ་རྫོགས།)
སློབ་གཉེར་བ་དག་ལ་རྒྱུན་དུ་གཞུང་ཆེན་གཟིགས་དུས་རྩོད་རྒྱུ་ཞིག་དང་ལུང་འགལ་ཞིག་ག་འདུག་བལྟས་ཏེ་དཔེ་ཆ་ལྟ་བའི་གོམས་གཤིས་དེ་འཇག་མི་རུང་། གཞུང་གི་ཁོག་ལོན་པར་བྱས་ཏེ་དོན་ཇི་བཞིན་ཤེས་ཐབས་བྱེད་དགོས། གཞུང་མཁྲེགས་པོ་ཞིག་མདུན་དུ་བཞག་དུས་བཤད་ཐུབ་པ་ཞིག་ཡིན་ན་དཔེ་ཆ་ཤེས་པ་རེད་ཅེས་ཡང་ཡང་ནན་གསུང་གནང། ཚིག་གི་གོ་དོན་། དོན་གྱི་ཞིབ་ཆ། རང་གི་འཛིན་མཚམས་སོགས་ཀྱི་རྨང་གཞི་ལེགས་པོ་ཞིག་མེད་ཕྱིན་རང་ལུགས་གཏོད་སོ་མེད་པར་ཆགས་ཉེ་ཆེ་ཚུལ་དང་། ཡང་ནས་ཡང་དུ་དཔེ་ཆ་དང་འདྲིས་པར་བྱས་ན་ཤེས་ནས་དད་པ་ཐོབ་པ་ཞིག་ཡོང་རྒྱུ་ཡོད་ཅེས་གདམ་པར་མཛད།
རྒན་ཁོང་གི་སྐུ་ཚེ་ལོ་རྒྱུས་ཀྱི་རྡོ་རིང་ལྟ་བུ་དེ་ནི་གྲྭ་ས་རང་དུ་བཞུགས་ཤིང་བཞུགས་པ་ཙམ་མ་ཟད་གྲྭ་སའི་སློབ་གཉེར་བ་བརྒྱ་ཕྲག་བརྒལ་བ་གསོ་སྐྱོང་དང་གྲྭ་སའི་བསྟན་པ་ཉམས་མེད་བརྒྱུད་འཛིན་དང་དར་སྤེལ་གནང་ཡོད་པ་འདི་རང་ཡིན།

གོང་གི་རྒན་རིན་པོ་ཆེའི་རྣམ་པར་ཐར་པ་ཟུར་ཙམ་སྨྲས་འདི་ནི་ཁོ་བོའི་མཐོང་ཐོས་དབང་པོའི་མངོན་སུམ་དུ་གྱུར་པའི་གནད་ཅན་རགས་བསྡུས་ཙམ་ཡིན་གྱི་ཞིབ་ཅིང་ཕྲ་བ་ཞིག་ནི་ཁོ་བོ་ལྟ་བུ་ཞིག་གིས་བཤད་ཤེས་དང་འབྲི་ཐབས་མེད་པའི་ཚོད་དུ་ཡོད་ན། མི་སྙོབ་པ་ལ་ལག་སྙོབ་དེ་མ་བྱས་སོ།། ཆེད་དུ་བཤད་རྒྱུ་ཞིག་ལ་སྔ་སྲོལ་གྱི་རྣམ་ཐར་འབྲི་སྟངས་བཞིན་ཁ་ཡག་དང་ཚིག་ཡག་སྤུང་ཐབས་བྱས་མེད་ཅིང་། མ་མཐོང་བ་ལ་མཐོང་མདོག་དང་མ་དད་པ་ལ་དད་མདོག་དེའང་ཁོ་བོའི་གཤིས་སུ་མེད་པས་ན་གང་ཞིག་མཐོང་བ་དང་ཐོས་པ་དག་ཡི་གེར་ཕབ་པ་ཡིན་ནོ།།
སེར་བྱེས་ཏྲེ་བོ་སྲོང་བཙན་གྱིས་རྒན་རིན་པོ་ཆེའི་ཁྲི་འདོན་མཛད་སྒོ་ཉིན་རྟེན་འབྲེལ་མཚོན་སླད་དུ་སྤེལ།


2016/06/29

ཆེན་དང་ཆེ་ཇི་ལྟར་འབྲི་དགོས།


བོད་སྐད་ཡིག་གི་མིང་ཚིག་འབྲི་ལུགས་རེ་འགའ་ཅུང་མགོ་རྙོག་པོ་དང་། སྟབས་བདེ་མིན་པར་ཡོད་ཅིང་དེ་དག་ཇི་ལྟར་འབྲི་དགོས་པའི་དཔྱད་རྩོམ་རེ་ད་བར་མ་མཐོང་ལ་འོན་ཀྱང་རང་ཉིད་ཐེ་བའི་མི་མང་པོ་ལ་ཉིན་རྒྱུན་དཀའ་ངལ་འཕྲད་ས་ཞིག་ཡིན་སྟབས་ཁོ་བོོས་འདིའི་ཐད་དཔྱད་ཞིབ་མི་ཉུང་བ་ཞིག་ལ་ཞིབ་འཇུག་བྱས་ཏེ་ལས་སླ་པོའི་ཐོག་ནས་འབྲི་ཐབས་ཤིག་སྟོན་ཁུལ་བྱས་ཡོད།

ཚིག་མཛོད་ཁག་ཏུ་ཆེན་པོའི་དོན་བཤད་དུས། ཆུང་བའི་ལྡོག་ཕྱོགས་སྤྱིར་བཏང་ཞེས་བྲིས་ཡོད་ཅིང་། རིགས་མཐུན་གཞན་ལས་ཆེ་བ། བོངས་ཚོད་དང་རྒྱ་ཁྱོན་སོགས་གཞན་ལས་ཆེ་བའི་དོན་ཡང་བྲིས་འདུག མཚན་གཞི་ལ། ལམ་ཆེན་པོ། ཆུ་ཆེན། ལམ་ཆེན། སོགས་དང་། ཡང་ལོ་ཚོད་མཐོ་བ་ལ་འཇུག་པ། དགུང་ལོ་ཆེན་པོ་དང་། ལོ་ཆེན་པོ། ངའི་ཨ་མ་ལོ་ཆེན་པོ་ཡིན། ལྟ་བུ། གོ་གནས་དང་དབང་ཆ་ཆེ་བའི་དོན་ལ་འཇུག་པ། བླ་མ་ཆེན་པོ། དཔོན་པོ་ཆེན་པོ། ལྟ་བུ་ཡིན།

ཆེན་པོ་ཟེར་དུས་ཆེ་ཆུང་གཉིས་གཤིབ་ནས་གང་ཞིག་ཆེ་བ་དེ་ངོས་འཛིན་པ་ཞིག་མིན་པར་སྤྱིར་བཏང་ནས་ཆེ་བའི་རིགས་ལ་གོ་དགོས་པ་འདུག དཔེར་ན། ས་ཆ་ཞིག་ལ་ཤིང་སྡོང་ཆེན་པོ་གཅིག་བུ་ཞིག་ཡོད་ཚེ་དེ་ལ་ཤིང་སྡོང་ཆེན་པོ་ཞེས་ལབ་ཆོག་པ་ཡིན། དེ་ནི་སྤྱིར་ཆེན་པོའི་རིགས་སུ་བཏོགས་པའི་རྒྱུ་མཚན་གྱིས་ཡིན།  འོན་ཀྱང་དེ་ལ་ཤིང་སྡོང་ཆེ་བ་ཞེས་ནི་མི་ཟེར་ཏེ། གལ་སྲིད་དེ་བཞིན་ལབ་ན་ས་ཆ་དེར་ཤིང་སྡོང་ཆེ་ཆུང་གཉིས་སམ་དུ་མ་ཡོད་པའི་གྲས་ནས་ཆེ་བ་ངོས་འཛིན་པ་ཞིག་ཆགས་འགྲོ་བ་ཡིན། དེ་བཞིན་བུ་ཆེ་བ་དེ། ཁང་པ་ཆེ་བ། ལམ་ཆེ་བ། སོགས་ནི་ཆེ་ཆུང་གཉིས་བསྡུར་ནས་ཆེ་བ་ངོས་འཛིན་པ་ཞིག་དང་། གལ་སྲིད་བུ་གཅིག་ལས་མེད་པ་ཞིག་ཡིིན་ན་བུ་ཆེ་བ་ཞེས་མི་ཟེར། དེ་མཚུངས་ཆེ་ཤོས་ཞེས་པའང་ན་ཡིག་མེད་པ་དེ་འབྲི་དགོས།

ཆེན་པོ་ཚིག་བསྡུ་བྱེད་པ། དཔེར་ན། ལམ་ཆེན།-ལམ་ཆེན་པོ། གལ་ཆེན།-གལ་ཆེན་པོ། འགངས་ཆེན།-འགངས་ཆེན་པོ། རླབས་ཆེན།-རླབས་ཆེན་པོ། པཎ་ཆེན།-པཎ་གྲུབ་ཏ་ཆེན་པོ། སྒྲ་ཆེན།-སྒྲ་ཆེན་པོ། བསྐལ་ཆེན།-བསྐལ་བ་ཆེན་པོ། མཁས་ཆེན།-མཁས་པ་ཆེན་པོ། ས་ཆ་ཧ་ཅང་རྒྱ་ཆེན་པོ་འདུག་ཅེས་པ་ཚིག་བསྡུ་བྱེད་དགོས་ཚེ། ས་ཆ་ཧ་ཅང་རྒྱ་ཆེན་འདུག་ཅེས་འབྲི་ཆོག་པ་ཡིན།

ཆེ་བའི་ཚིག་བསྡུ། ལམ་ཆེ།-ལམ་ཆེ་བ། གལ་ཆེ།-གལ་ཆེ་བ། འགངས་ཆེ།-འགངས་ཆེ་བ། རླབས་ཆེ།-རླབས་ཆེ་བ། སྒྲ་ཆེ།-སྒྲ་ཆེ་བ། བསྐལ་ཆེ།-བསྐལ་པ་ཆེ་བ། རྒྱ་ཆེ།-རྒྱ་ཆེ་བ། གནད་དོན་འདི་ནི་ཧ་ཅང་གལ་ཆེ་བ་ཞིག་ཡིན་ཞེས་པ་ཚིག་བསྡུ་བྱེད་ན། གནད་དོན་འདི་ནི་ཧ་ཅང་གལ་ཆེ་ཡིན་ཞེས་འབྲི་དགོས། རང་གིས་འབྲི་བ་ཙམ་མིན་པར་གཞན་གྱིས་བྲིས་པ་གོ་བ་ལེན་དུས་ཀྱང་གཅིག་མཚུངས་ཡིན། གལ་ཏེ་ཁྱེད་ཀྱིས་ཚིག་བསྡུ་འདི་དག་ཤེས་པར་བྱོས་དང་དུས་རྒྱུན་ཆེན་དང་ཆེ་གཉིས་ཇི་ལྟར་བེད་སྤྱོད་བྱེད་དགོས་མིན་ལེགས་པར་ཁོང་དུ་ཆུད་ཐུབ།

འདི་ནས་བཤད་དགོས་པ་ཞིག་ལ་ཆེན་མོ་ཞེས་པ་འདི་ཇི་ལྟར་འབྲི་དགོས་པའི་སྐོར་གྱི་དཔྱད་གཞི་ཞིག་མ་རྙེད་ལ། ཚིག་མཛོད་དུ། ཆེན་པོ་དང་དོན་འདྲ་ཞིང་གཙོ་བོར་ཆེད་དུ་བཏགས་པའི་མིང་མཐར་སྦྱོར་བ་ཞེས་འཁོད་འདུག། ལམ་རིམ་ཆེན་མོ། སློབ་གྲྭ་ཆེན་མོ། ནང་བསྟན་སློབ་གཉེར་ཁང་ཆེན་མོ། རྒྱུགས་སྤྲོད་ཆེན་མོ། ཚིག་མཛོད་ཆེན་མོ། སོགས་བེད་སྤྱོད་དང་ལག་ལེན་བྱེད་མུས་ཡིན། ངས་བསམ་ན་ནང་དོན་རྒྱ་ཆེ་ཆུང་སོགས་ཀྱི་དབང་ལས་ཆེན་མོ་ཞིག་བཏགས་ཀྱི་འདུག་སྙམ་སྟེ། སློབ་གྲྭ་ཆེན་པོ་ལབ་དུས་ཕྱིའི་བཀོད་པ་སོགས་རྒྱ་ཆེ་ཆུང་བཤད་པ་དང་། སློབ་གྲྭ་ཆེན་མོ་ཟེར་དུས་ཕྱིའི་བཀོད་པ་སོགས་མིན་པར་ནང་གི་སློབ་ཚན་དང་གནས་རིམ་སོགས་སློབ་ཆུང་དང་སློབ་འབྲིང་དག་ལས་ཆེ་བའི་རྒྱུ་མཚན་གྱིས་ཡིན། དེ་བཞིན་མདུན་རེ་རྒྱུགས་སྤྲོད་རེ་བཏང་བ་ལ་རྒྱུགས་སྤྲོད་དང་ལོ་འཁོར་རྒྱུགས་སྤྲོད་ལ་རྒྱུགས་སྤྲོད་ཆེན་མོ་ལྟ་བུ་ནང་དོན་གྱི་ཆ་ནས་ཆེན་མོ་འབྲི་མིན་ཐད་ལག་ལེན་དང་བེད་སྤྱོད་གཏོང་བཞིན་འདུག་སྙམ་པའོ།།
ཕྱི་ལོ་2016ལོ་འགོ་བྲིས་ཤིང་ཟླ་6-29ལ་བསྐྱར་བཅོས་དང་ཁ་གསབ་བྱས།



2016/05/25

ཨེ་མོ་རི་ཚན་རིག་ཟབ་སྦྱོང་འགོ་བཙུགས་པ།


མི་ལོ་སུམ་ཅུ་ལྷག་གི་སྔོན་ནས་༸གོང་ས་མཆོག་གིས་ནང་པ་ཚོས་ཚན་རིག་སྦྱོང་གལ་ཆེ་ཚུལ་གྱི་བཀའ་སློབ་ཐེངས་མང་གནང་བ་ཙམ་མ་ཟད། འགྲོ་གྲོན་ཕོན་ཆེར་གནང་སྟེ་བོད་ཀྱི་དཔེ་མཛོད་ཀྱི་འགན་ཁུར་འོག དགེ་བཙུན་དད་གཉེར་ཅན་མི་ཉུང་བ་ཞིག་གིས། མི་ལོ་བཅུ་ལྷག་གི་རིང་དུ་ཚན་རིག་ཟུར་སྦྱོང་མཛད་དེ་སྐུ་ལས་གང་མང་སྐྱོན་པའི་གྲུབ་འབྲས་སུ། ཨེ་མོ་རི་གཙུག་ལག་སློབ་གཉེར་ཁང་དུ་དགེ་འདུན་པ་སྐོར་ཐེངས་གསུམ་ཕེབས་ཐུབ་པ་བྱུང་ཡོད་ཅིང་། 2013ལོ་རྒྱུས་ཐོག་ཏུ་བོད་ཀྱི་དགེ་འདུན་པ་སྐོར་ཞིག་གིས་ཨེ་མོ་རི་གཙུག་ལག་ཁང་ནས་སློབ་ཐོན་ལག་ཁྱེར་ལེན་པའི་མཛད་སྒོ་ཐོག་ཏུ་བགྲེང་སྟེ་ཐེངས་དང་པོའི་སློབ་ཐོན་ལག་ཁྱེར་བླངས་ཡོད། ཁོ་ཚོས་གྲས་ཀྱིས་ད་སྐབས་བོད་ཀྱི་དགོན་སྡེ་ཁག་ཏུ་ཚན་རིག་སློབ་དེབ་བསྒྱུར་སྒྲིག་དང་ཉིན་རེའི་སློབ་ཚན་ཁྲིད་རྒྱུ། དགེ་སྡེའི་ཚན་རིག་དང་འབྲེལ་བའི་ཕྱག་ལས་སྣ་མང་ལ་རྐང་འགན་ཁུར་བཞིན་ཡོད།

ད་དུང་༸གོང་ས་མཆོག་སྐུ་སྒེར་གྱིས་ཚན་རིག་པ་དག་དང་<སེམས་དང་སྲོག>གི་ལས་རིམ་དུ་ཐུགས་འགན་བཞེས་ཏེ་བགྲོ་གླེང་མཛད་བཞིན་ཡོད་ཅིང་། སྔ་ལོར་སེ་ར་དགོན་དུ་<སེམས་དང་ཚེ་སྲོག་>གི་བགྲོ་གླེང་ཐེངས་30པ་དེ་བསྐྱངས་ཡོད།

1987ལོར<སེམས་དང་ཚེ་སྲོག>ཚོགས་པ་གསར་འཛུགས་གནང་ཞིང་། ༸གོང་ས་མཆོག་ནི་ཚོགས་པ་འདི་གསར་འཛུགས་གནང་མཁན་གྱི་གྲས་ནས་གཅིག་ཡིན། ལྷག་པར་དུ་ད་བར་ཚོགས་པ་འདི་འཕེལ་རྒྱས་དང་རྒྱ་བསྐྱེད་ཡོང་བའི་གཞི་རྩ་ནི་ཁོང་ཆགས་ཡོད་ཅེས་འབྲེལ་ཡོད་ཡིག་ཆར་འཁོད་འདུག

ད་བར་<སེམས་དང་ཚེ་སྲོག>ཚོགས་པར་ཚོགས་མི་ཉིས་ཁྲི་རྒལ་བྱུང་འདུག་ཅིང་། ཚོགས་པ་འདིས་ཚན་རིག་དང་འབྲེལ་བའི་ཉམས་ཞིབ་དང་ལས་རིམ་སྣ་ཚོགས་ཤིག་གཉེར་ནས་འགྲོ་གྲོན་ཡང་ཨ་སྒོར་ས་ཡ་ལྔ་བཅུ་ང་ལྔ་ལྷག་ནར་གཏོང་བྱས།

བཀའ་སློབ་ཙམ་མིན་པར་བོད་ཀྱི་དགོན་སྡེ་དག་ཏུ་ཤུགས་རྐྱེན་ཡོང་ཐབས་སུ་<སེམས་དང་སེམས་སྲོག་>གི་བགྲོ་གླེང་གདན་ས་ཁག་ཏུ་འཚོག་རྒྱུ་བྱས་པ་སོགས་ལས་རིམ་གང་མང་དབུ་འཛུགས་མཛད་ནའང་བོད་ཀྱི་དགོན་སྡེ་ཁག་ཏུ་འགུལ་དཀྱོག་ཅིག་ཐེབས་མེད། མཐའ་མར་ཨུ་ཐུག་པ་ལྟ་བུས་གདན་ས་གསུམ་གཙོས་པའི་དགེ་ལྡན་པའི་དགོན་ཁག་དུ་མར་ཚན་རིག་འཛིན་གྲྭ་གསར་འཛུགས་དགོས་ཚུལ་དང་རི་བོ་དགེ་སྡེ་པའི་དགེ་ལུགས་རྒྱུགས་སྤྲོད་ཆེན་མོའི་ནང་དུ་ཚན་རིག་རྒྱུགས་སྤྲོད་འཇུག་དགོས་པའི་བཀའ་སློབ་ནན་ཆེར་ཕེབས་རྗེས་གདན་ས་གསུམ་དང་དགོན་སྡེ་མང་པོའི་ནང་དུ་དངོས་སུ་ཚན་རིག་འཛིན་གྲྭ་གསར་འཛུགས་དང་། སློབ་ཚན་བཀོད་བསྒྲིགས། སློབ་དེབ་ཆེད་བསྒྲིགས། དགེ་རྒན་ཐབས་འཚོལ་སོགས་བྱས་ཏེ་ཚ་ཚ་འུར་འུར་མ་བྱས་དཀའ་མེད་ཅིག་ལ་ཐུག་སྟེ་ཕྱི་ལོ་2012ལོར་དངོས་སུ་གདན་ས་གསུམ་དུ་ཚན་རིག་འཛིན་གྲྭ་གསར་འཛུགས་ཐུབ་པ་བྱུང་ཡོད།

སློབ་ཚན་དང་དགེ་རྒན་སོགས་ཀྱི་དཀའ་ངལ་ཙམ་མིན་པར་དགེ་འདུན་པར་ཚོར་ཚན་རིག་གི་རྨང་གཞི་ཨང་རྩིས་སོགས་ཀྱི་གཞི་རྩ་ཡག་པོ་མེད་རྐྱེན་སྐྱེ་དངོས་དང་རྫས་འགྱུར་ཚན་རིག་གཏིང་ཟབ་པོ་ཤེས་ཐབས་དཀའ་ཡང་ཐོག་མའི་ཚན་རིག་ངོ་སྤྲོད་དང་ཨང་རྩིས་རྒྱབ་ལྗོངས་སུ་མི་དགོས་པའི་རིག་ཚན་མང་པོ་སྦྱོང་པར་བྱས།

 ཕྱི་ལོ2014ནས་ཨེ་མོ་རི་དང་བོད་ཀྱི་ཚན་རིག་ཟུང་འབྲེལ་གྱིས། ཨེ་མོ་རི་ཚན་རིག་ཟབ་སྦྱོང་དབུ་འཛུགས་གནང་སྟེ་ཟླ་བ་གཅིག་གི་རིང་དུ་ཟབ་སྦྱོང་བྱེད་བཞིན་ཡོད་ཅིང་། འདི་ལོ་ཡང་ཕྱི་ཟླ་5ཚེས་18ནས་ཟླ་ངོ་གཅིག་གི་རིང་དུ་ཟབ་སྦྱོང་གནང་གཏན་ཁེལ་ཡོད། ད་ལོའི་ཨེ་མོ་རི་ཚན་རིག་ཟབ་སྦྱོང་ཐེངས་གསུམ་པ་གདན་ས་གསུམ་དུ་འཚོག་རྒྱུ་དང་། འདི་གར་སེ་ར་དགོན་དུ་ཟབ་སྦྱོང་དུ་བཞུགས་པའི་ཚན་རིག་འཛིན་གྲྭའི་ཁོང་ནས་འཛིན་གྲྭ་གསུམ་མཉམ་བཞུགས་དང་སེ་ར་བྱེས་སྨད་གཉིས། བཀྲིས་ལྷུན་པོ་བཅས་ནས་དགེ་འདུན་པ་332མཉམ་བཞུགས་གནང་བཞིན་ཡོད།

ཧིན་སྒོར་འབུམ་བཅུ་ལྷག་གི་འགྲོ་སོང་ཡོད་པའི་ཟླ་ངོ་གཅིག་གི་ཟབ་སྦྱོང་འདིར། ཨེ་མོ་རི་གཙུག་ལག་སློབ་གཉེར་ཁང་དང་དེ་མིན་གྱི་གཙུག་ལག་སློབ་གཉེར་ཁང་གི་འབུམ་རམས་པ་དང་ཉམས་ཞིབ་པ། སློབ་ཆེན་ཁག་གི་སློབ་དཔོན་ཆེན་མོའི་གོ་གནས་བཞེས་པའི་དགེ་རྒན་ཉི་ཤུ་ཙམ་ཆེད་ཕེབས་ཀྱིས་ཟབ་སྦྱོང་གནང་གི་རེད། སློབ་ཚན་དུ་ཚན་རིག་གི་ལྟ་གྲུབ། སྐྱེ་དངོས་ཚན་རིག དངོས་ཁམས་ཚན་རིག དབང་རྩའི་ཚན་རིག་བཅས་ཁྲིད་རྒྱུ་དང་། ཉིན་རེའི་སློབ་ཐུན་བཞི་རེ་དང་ཆུ་ཚོད་5་ལྷག་བཅས་གཏོང་དགོས་ལ། གཟའ་མཇུག་ཏུ་བདུན་གཅིག་གི་ཁྲིད་ཟིན་པ་ཁག་ལ་རྒྱུགས་སྤྲོད་གཏོང་དགོས། 

2016/05/07

སྨྲེ་སྔགས་དབྱངས་ཀྱི་མཆོད་པ།


སེར་བྱེས་ཏྲེ་ཧོར་མཁན་ཟུར་རྗེ་བཙུན་བློ་བཟང་དཔལ་ལྡན་དགོངས་པ་རྫོགས་པའི་ཡིད་སྐྱོ་བའི་གནས་ཚུལ་མིག་སྔར་ལྷགས་བཞིན་པའི་སྐབས་འདིར་དམ་པ་ཁོང་རྗེས་དྲན་དང་མྱ་ངན་ཞུ་ཆེད་དུ་སྙན་ཚོམ་འདི་ཆེད་སྒྲིག་བྱས་པ་ཡིན།
(གསལ་བཤད། རྩོམ་འབྲི་བའི་མིང་གི་ཀ་མད་བཞིན་རྩོམ་ཡིག་སྔ་ཕྱི་བསྒྲིགས་ཡོད།)


ཡང་བསྟན་པའི་སྒྲོན་མེ་ཞིག་ཟུམ་སོང་
            _____མཁར་སྒང་བསོད་ནམས་དབང་ལྡན།

ཐོས་བསམ་སྒོམ་པའི་བྱ་བར་ཆགས་པས་འབྱོར་པའི་འདུ་འགོད་བློ་ལ་མ་དྲན་འཇིག་རྟེན་བླུན་པོའི་ཕུལ་བྱུང་ཞིག །
མི་བསྲུན་སྐྱེ་བོས་ཡང་ཡང་རྒོལ་ཡང་སྡང་མིག་ཚིག་མཚོན་གཡོ་འདེབས་མ་ཤེས་འཇིག་རྟེན་བླུན་པོའི་ཕུལ་བྱུང་ཞིག །
སྲིད་ཞིའི་དཀའ་གནད་མདུད་པ་གྲོལ་ལ་སྨན་མཆོག་འཛིན་པའི་ཐབས་མཁས་ཐུགས་རྗེས་འཇིག་རྟེན་འདས་པའི་མཁས་མཆོག་ཅིག །
འཁོར་སློབ་ལ་སོགས་རིས་མེད་ཀུན་ལ་རྟག་ཏུ་འཛུམ་པའི་ཐུགས་རྗེའི་མདངས་གསལ་སྐྱབས་རྗེ་གང་ལ་སྙིང་ནས་འདུད། །

དད་ལྡན་སློབ་མར་རྗེས་བརྩེའི་ཐུགས་ཀྱིས་སྐྱོ་ངལ་ཀུན་སྤངས་གཞན་དོན་མཛད་བཟང་བསམ་མི་ཁྱབ་པའི་ངང་ཚུལ་ཅན། །
ཐུགས་རྗེས་འགྲོ་ལ་ཀུན་ནས་ཆགས་ན་མ་དག་ཞིང་འདིར་ཉམས་ཐག་བོར་ནས་དག་པའི་ཞིང་དུ་ཆས་ཕོད་དམ། །
དེའི་ཕྱིར་བསྟན་འགྲོ་ཀུན་ནས་སྐྱོང་ལ་འཆིང་བ་མ་ལྷོད་ཟླ་ཞལ་འཛུམ་མདངས་མྱུར་དུ་སྟོན་ཅིག་བླ་མ་རྗེ། །
ཚེ་ཚེ་རབས་རབས་རྗེས་འཛིན་ལྕགས་ཀྱུས་འདོར་བ་མ་གནང་སྐྱབས་མཆོག་བླ་མར་གསོལ་འདེབས་ཕུར་ཚུགས་སྙིང་ནས་ཞུ། །

ཞེས་པ་འདིའང་རང་ཅག་རྣམས་ལ་དུས་གསུམ་རྒྱལ་བ་ཀུན་ལས་བཀའ་དྲིན་ལྷག་པའི་སྐྱབས་རྗེ་མཁན་ཟུར་རྡོ་རྗེ་འཆང་མཚན་བརྗོད་པར་དཀའ་བ་རྗེ་བཙུན་བློ་བཟང་དཔལ་ལྡན་དཔལ་བཟང་པོ་མཆོག་ཕྱི་ལོ་ 2016-5-1 བོད་ཟླ་ 3 ཚེས་ 24 ཉིན་ཐཻ་ཝན་རྒྱལ་ས་ཐཻ་པེའི་དགོང་མོ་ཆུ་ཚོད་ 8:10 རྒྱ་གར་ལྷོ་ཕྱོགས་གྲོང་ཁྱེར་ཅེ་ནཻའི་ཆུ་ཚོད་ 5:40 ཐོག་རེ་ཞིག་དགོངས་པ་ཆོས་དབྱིངས་སུ་ཐིམ་ཚུལ་བསྟན་པ་ལ། མདང་དགོང་སྨོན་ལམ་དང་དྲང་ངེས་ལེགས་བཤད་སྙིང་པོ་སོགས་མཚན་ཐོག་ཐག་ཏུ་དགེ་འདུན་འདུས་པ་རྒྱ་མཚོ་དང་ལྷན་དུ་བཏོན་ཅིང་། དེ་རིང་ 5-2 ཞོགས་པའི་ཆ་ལ་གུས་སློབ་སེར་ཏྲེ་མཁར་སྒང་བསོད་ནམས་དབང་ལྡན་གྱིས་དད་གདུང་དྲག་པོས་བྲིས་པ་དགེའོ།། །།

གདུང་སེལ་དབྱངས་ཀྱི་མཆོད་སྤྲིན།


བསོད་ནམས་ལེགས་བྱས་མཐའ་ཡས་གསེར་གྱི་སྙིང་པོ་རུ།།
དྲི་མེད་རྒྱལ་བའི་ལུང་རིགས་མི་གཡོ་སྤོ་མཐོ་བ།།
རྣམ་དག་བཤད་སྒྲུབ་གང་གཱ་འཛིན་མའི་རྒྱུན་བཏམས་པ།།
འགྲོ་བའི་དཔལ་གྱུར་དཔལ་ལྡན་བླ་མ་གཙུག་ན་རྒྱལ།།
དཔག་མེད་འགྲོ་བ་སྨག་རུམ་མུན་པའི་གཏིང་མཐའ་རུ།།
སྡུག་བསྔལ་གསུམ་གྱི་སྟོབས་ལྡན་གླང་པོས་བརྫི་བ་ན།།
བརྩེ་བའི་འོད་ཀྱི་ཟླ་གཞོན་འཛུམ་པ་ལྟ་བུ་ཡི།།
གཞན་དོན་མཛད་ལ་སྐོམ་པ་ཆུ་དང་འཕྲད་ཇི་བཞིན།།
མ་དག་གླིང་འདིར་བྱོན་ཞིང་ཐལ་མའི་རྟུལ་ཞུགས་བཟུང་།།
ཐུགས་རྒྱུད་འཇམ་པ་དྲི་མེད་ཆུ་ཤེལ་འོད་ཀྱི་ངོས།།
ཞི་བའི་འཛུམ་གྱི་འདབ་བརྒྱ་མེ་ཏོག་གྲོལ་བ་ན།།
བརླང་ཞིང་རྩུབ་པའི་ཁྲོ་བ་འཕྱུར་བའི་དགྲ་བོས་ཀྱང་།།
མཐོང་ན་འབར་བའི་དུག་གི་མེ་ལྕེ་རང་སར་དེངས།།
རང་བཞིན་སྤྲོས་མེད་ལྟ་བའི་རལ་གྲི་གདེངས་བ་ཡིས།།
འཁོར་བའི་མཚོ་ཆེན་སྲུབས་པའི་རླབས་ཀྱི་གཡོ་བ་རུ།།
གྲངས་མེད་བསོད་ནམས་ཚོགས་ཀྱི་གྲུ་ཆེན་ལ་ཞུགས་ཏེ།
འཇིགས་རུང་སྲིད་པའི་འཁོར་བའི་གནས་ལས་རབ་ཏུ་བརྒལ།
བྱམས་ཆུབ་སེམས་དང་སྙིང་རྗེའི་འོད་མདངས་འཕོྲ་བ་ཡིས།།
མགོན་མེད་འཁྱམ་པའི་འགྲོ་བའི་ཡིད་ལ་དཔལ་སྟེར་ཀྱང་།།
མི་སྲུན་སྐྱེས་བུ་བླུན་པོའི་གདོན་ཆེན་བདག་འཛིན་དེ།།
བསྲེགས་ཤིང་ཚིག་སྟེ་རྡུལ་ཙམ་ཡང་ནི་རྨང་མེད་བཏང་།།
ཟབ་ཅིང་ཕྲ་བའི་མཐའ་ཡས་ཆོས་ཀུན་གནས་ལུགས་ལ།།
ཐོས་བསམ་སྒོམ་པས་རྨོངས་དང་སོམ་ཉི་ཀུན་འཇོམས་པས།།
གྲགས་པས་འཁུར་བའི་རློམ་པས་འགྱིང་བའི་ཆེན་པོ་དག།
ཚིག་ལ་འཁྲིལ་ཅིང་རྩེན་པའི་བྱིས་པ་བཞིན་དུ་གྱུར།།
རང་རྒྱུད་སྨིན་ཞིང་དུལ་བའི་ཕ་རོལ་ཕྱིན་པ་བཅུའི།།
བློ་སྦྱོང་གནད་དུ་ངམ་གྱིས་གཞོལ་ཞིང་འཇུག་པ་ལ།།
བློ་སྟོབས་རི་རབ་ལྟར་བརྟན་བརླིང་བའི་འཕགས་པ་མཆོག།
དུག་གསུམ་འཆིང་བས་བསྡམས་པའི་ཕ་རོལ་སྐྱེས་བུའི་རྒྱུད།།
འདུལ་ལ་ཐབས་མཁས་བསྡུ་བའི་དངོས་པོ་བཞི་སྐྱོང་བ།།
གསལ་དང་འཇམ་ལ་སྙན་པའི་གསུང་གི་ཆ་ཤས་ཙམ།།
གཞན་དོན་མ་འདྲེས་རྡུལ་ཙམ་ཡོད་པའི་སྐབས་སྤང་ངོ་།།
མདོར་ན་འཕགས་པའི་ནོར་གྱིས་ཕྱུག་པའི་ཡོན་ཏན་མཛོད།།
ས་གཞི་དང་ནི་ནམ་མཁའ་ལྟ་བུའི་གཡོ་མེད་དུ།།
གཞན་གྱི་དོན་དུ་སྐད་ཅིག་ཙམ་ཡང་ལྷོད་མེད་པ།།
རྒྱལ་བ་དགྱེས་པའི་མཛད་བཟང་བ་དན་རབ་དཀར་བ།།
མཁས་པ་མགུ་བའི་ཡིད་ཀྱི་ནམ་མཁའི་ཀློང་དུ་འགུལ།།
རབ་འབྱམས་གཞུང་གི་ཟབ་མོའི་ལྟ་བ་རྟོགས་དཀའ་བར།།
དྲི་མེེད་ཐུགས་ཀྱི་དཀྱིལ་འཁོར་མཐིལ་དུ་ལྟེམ་མེར་འཁྱིལ།།
གཙང་བཀྲུའི་ཐུགས་ཀྱི་ཀུ་མུད་གཉེན་ལས་ཕྱུང་བ་ཡི།།
ཞི་དུལ་འོད་ཀྱི་ཟིལ་མ་དད་པའི་སྙིམ་པར་སིམ།།
རིས་མེད་འགྲོ་བ་འཁོར་བ་ལས་སྒྲོལ་སེམས་དཔའ་མཆོག།
རེ་ཞིག་རྟག་འཛིན་འཆིང་བས་བཅིངས་པའི་གདུལ་བྱ་རྣམས།།
མི་རྟག་རླུང་གི་གཡོ་བའི་འདུ་བྱེད་སྒྱུ་མའི་ངང་ཚུལ་དུ།།
བསྐུལ་བ་ཡང་ནི་འགྲོ་བའི་སླད་ལ་ཞིང་གཞན་དུ།།
སྣང་བའི་བདག་པོ་སེམས་དཔལ་ཁྱེད་ཉིད་གཤེགས་པ་བས།།
ཉི་མ་བྱེ་བ་འོད་ཀྱིས་དྲངས་པའི་སྣང་བ་ནུབ།།
དམ་པ་བཤུམ་པའི་སྤྱན་ཆབ་བྲུག་སྟེ་རྫིང་བུར་གྱུར།།
ཞི་བདེའི་བསིལ་བ་ཟླ་ཟེར་འབྱུང་བ་རྒྱུན་ཆད་ཅིང་།
འཁོར་བའི་རྒྱ་མཚོར་འོབས་སུ་ལྟུང་བའི་རྗེས་འབྲངས་དག།
ཕ་མ་བྲལ་བའི་བྱིས་པ་བཞིན་དུ་གདུང་བས་མནར།།
སྙིགས་མ་ལྔ་བདོའི་དུས་ཀྱི་ཡོ་ལང་བཙན་པོ་ན།།
སྡུག་བསྔལ་གསུམ་གྱིས་བག་མེད་མནར་བའི་འགྲོ་བའི་སྨན།།
བསྟན་པ་རིན་ཆེན་གདུང་འདེགས་ཀ་ཆེན་རེ་ཟུང་ཙམ།།
གྱུར་པའི་ངང་ཚུལ་དེས་ཀྱང་སེམས་དཔའ་ཆེན་པོ་ཁྱེད།།
སླར་ཡང་གངས་ལྗོངས་བསྟན་དང་འགྲོ་བའི་དཔལ་གྱུར་ཅིག།

         ཞེས་བདག་གི་རྗེ་བླ་མ་སེར་བྱེས་མཁན་ཟུར་བློ་བཟང་དཔལ་ལྡན་མཆོག་སྐུ་ཞི་བ་ཆོས་དབྱིངས་སུ་འཐིམ་ཚུལ་བསྟན་ནས་ཉིན་གཉིས་ཀྱི་རྗེས་སུ་གང་གི་སློབ་བུའི་གྲལ་མཐར་གནས་པ་ལྕོག་མིག་འབོད་པས་དད་པ་ཆེན་པོས་སྦྱར་བའོ།།

ས་གཞི་འོད་དུ་འཁྱིལ་བའི་སྒྲོན་མེ་ཞིག་གཟིམས་སོང་།
_____གོ་བོ་འཆི་མེད།
ས་གཞི་འོད་དུ་འཁྱིལ་བའི་སྒྲོན་མེ་ཞིག།
ཞི་འཇམ་ཐུགས་བརྒྱུད་མངའ་བའི་སེམས་དཔའ་ཞིག།
སྙན་འཇེབས་ལེགས་བཤད་སྒྲོག་མཁས་དེད་དཔོན་ཆེ།།
གློ་བུར་ཞི་བར་གཟིམས་འདི་ཡིད་རེ་འཁྲེང་།།

བརྒྱ་ཕྲག་སློབ་ཚོགས་སྐྱོང་བའི་བཤེས་གཉེན་ཆེ།།
ལུང་རིགས་གཏེར་དུ་སྦྲུམ་པའི་མངའ་བདག་ཆེ།།
ཞི་དུལ་བརྟུལ་ཞུགས་འཆང་བའི་བདག་ཉིད་ཅན།།
ཞི་དབྱིངས་ལམ་ལ་བཞུད་འདི་ཕམ་ཁ་ཞིག།

དགྱེས་འཛུམ་ཉམས་འགྱུར་བག་ཕེབས་སྐུ་མངའ་ཞིང་།།
སྙན་འཇེབས་གསུང་དབྱངས་ཁམས་པའི་འགྱུ་ཁུག་ལྡན།།
ཟབ་ཡངས་ཐུགས་རྗེའི་གྲིབ་བསིལ་ཀུན་སྙོམས་པའི།།
དཔལ་ལྡན་བླ་མ་གཤེགས་འདིར་གདུང་བས་མནར།།

ཞི་བདེའི་དེད་དཔོན་ཆེན་མོའི་སྐྱབས་འོག་ནས།།
ཤར་བསྐྱོད་ལམ་བུ་རྙེད་འབྱེད་མཁས་རྗེས་འཛིན་པ།།
ཞི་འཛུམ་མི་ཕྱེད་དད་པའི་དམ་ཚིག་ཅན།།
གློ་བུར་ཞིང་གཞན་གཤེགས་འདི་ཕམ་ཁ་ཉིད།།

རྣམ་དཔྱོད་རིགས་ལམ་རྩལ་གྱི་བང་ཁ་ཅན།།
རྣམ་མང་འགྲོ་ལ་བརྩེ་བའི་ཐུགས་ཞགས་ཅན།།
རྣམ་དག་རྒྱལ་སྲས་སེམས་དཔའི་ལྟ་སྤྱོད་ཅན།།
རྣམ་གསུམ་ངུར་སྨྲིག་ཅན་ཁྱེད་གང་དུ་བཞུད།།

སྣ་མང་ལེགས་བཤད་འཆད་མཁས་སྨྲ་ཡངས་ཅན།།
ལུང་རིགས་བརྒལ་རྟགས་རྩོད་མཁས་རིགས་ལམ་ཅན།།
བརྒྱ་ཕྲག་རིགས་པས་དཔྱོད་མཁས་མཛད་བཟང་ཅན།།
སྨྲ་དབང་བཤེས་གཉེན་མགོན་ཁྱེད་གཤེགས་འདིར་སྐྱོ།།


བློ༵་རིགས་རི་མོ་བཀྲ་བའི་མགོན་པོ་ཉིད།།
བཟ༵ང་པོའི་རང་གཤིས་མངའ་བའི་སྐྱེ་མཆོག་ཅིག།
དཔ༵ལ་ལྡ༵ན་བླ་མ་གང་ཁྱེད་མི་ཡུལ་ནས།།
དག་པ་ཞི་དབྱིངས་གཟིམས་འདི་སྐྱོ་བ་ཞིག།

གང་གི་ཞབས་ཟུང་བཏུགས་ཏེ་ལེགས་བཤད་གསུང་།།
རྣ་བར་སིམ་པའི་བགོ་སྐལ་མ་བྱུང་རུང་།།
གང་ཞིག་དགྱེས་འཛུམ་མཇལ་བའི་སྐལ་བ་དེས།།
གང་ལ་དད་འདུན་ཅན་པོས་འཕྲལ་མར་སྤེལ།།

གོང་མའི་རྣམ་ཐར་སྐྱོང་ལ་དཔའ་ངར་ཅན།།
རྣམ་དཔྱོད་རྩལ་སྟོབས་ངོམ་པའི་གཤོག་ཟུང་ཅན།།
ཡང་སྤྲུལ་གཞོན་གསར་པའི་འོད་སྟོང་གི།
ས་གཞི་འོད་དུ་འཁྱིལ་བ་བདག་གིས་སྨོན།།


ཞེས་པ་འདི་ནི་གདན་ས་འབྲས་སྤུངས་ནས་གོ་བོ་འཆི་མེད་དུ་འབོད་པས་མཁན་ཟུར་དམ་པ་རྗེ་བཙུན་བློ་བཟང་དཔལ་ལྡན་གང་ལ་དད་པའི་གདུང་འབོད་དུ་ ༢༠༡༦/༥/༦ ཉིན་གྱི་ཕྱི་དྲོ་འཕྲལ་མར་སྤེལ།


དེ་རིང་གི་ཉི་མས་རི་བོ་བརྒལ་སོང་།

 _____རྒྱང་མིག་པ།
བླ་མ་ལགས
ཁྱོད་ཉིད་ང་ཚོ་དང་གྱེས་ཀྱང
ང་ཚོས་ད་དུང་ཁྱེད་ཀྱི་གདམས་ངག་རྣམས་ཡིད་ལ་དྲན་བཞིན་ཡོད

བླ་མ་ལགས
མི་ཚེ་འདིར་ཁེར་རྐྱང་ངང་འཚོ་ཡང
འཇིག་རྟེན་ན་སྐྱོ་གདུང་ཆེ་བའི་སྐྱེ་འགྲོའི་ཆེད
དུས་རྟག་ཕན་སེམས་དང་བྱམས་སྐྱོང་དོར་མ་མྱོང་བའི་ཁྱོད
ཆེས་མཐར་མཇུག་གི་སྐྱབས་འཇུག་དེ་དབྱངས་སུ་གྱེར་བཞིན
ང་ཚོའི་མིག་ལམ་ན་མངོན་པ་མེད་པའི་སྣང་ཚུལ་དེ་ཅི་ཡིན་ནམ

བླ་མ་ལགས
ཁྱོད་ནི་ནམ་མཁའི་ཉི་མ་བཞིན
འཇིག་རྟེན་ན་ཆེས་བཀའ་དྲིན་ཆེ་ལ་གཟི་འོད་འཕྲོ
མིའི་ཡུལ་ཚ་རླབས་འཕྱུར་བའི་ཡུལ་གྲུ་ཞིག་ནས
ཁྱོད་ཀྱི་བཀའ་སློབ་དང་མི་ཚེ་ལ་ཕྱིར་དྲན་བྱས་དུས
ཁྱེད་ནི་ཟིམ་པ་མེད་པའི་གནས་མཆོག་འདིའི་ཤེས་རབ་ཀྱི་བདག་པོ་ཞིག
མུན་སེལ་གྱི་སྐར་མ་འོད་ཆེ་ཞིག་དང་ཆོས་ཀུན་ནས་མཚུངས

བླ་མ་ལགས
ཁྱོད་ནི་ཁ་རྩང་གི་ཉིན་མོ་དེ་ནས
སྐྱེ་འཆི་ལ་རང་དབང་ཡོད་ཀྱང་འདི་ནས་ཕེབས་སོང
གདུལ་བྱ་ལ་ཉེ་རིང་མེད་ཀྱང་ང་ཚོ་དང་བྲལ་སོང
ཟབ་དོན་གྱི་ལྟ་བ་རྙེད་པའི་སེམས་དཔལ་ཞིག
ཐབས་མཁས་ཀྱིས་ཐུགས་སྲས་འཁྲུངས་བའི་བྱང་ཆུབ་ཞིག
ལས་དབང་དམན་པའི་འཇིག་རྟེན་ནས་བྲལ་ཐལ

བླ་མ་ལགས
ཁྱེད་ཀྱི་རྣམ་ཤེས་གསོན་པོ་དེར
མཚན་བཟང་དབུས་ན་འོད་རླབས་འཕྲོ་ཡང
ད་དུང་འཇིག་རྟེན་འདི་མུན་པས་བརླབས་སོང
མཐར་འཇུག་གི་སློབ་བུ་རྣམས་སྡུག་གིས་མནར་སོང
ཁྱོད་ཉིད་ཉེ་རིང་མ་ཆུང      བརྩེ་སེམས་དེ་ང་ཚོ་ལ་ཕྱོགས་རོགས

དེང་རབས་འཕྲུལ་གྱིས་སྐྲུན་པའི་འཇིག་རྟེན་འདིར།།
ཡོད་ཚོད་རང་ལ་དབང་བའི་འདུ་ཤེས་དེར།།
བདེན་གཉིས་ཚུལ་བཞིན་རྟོགས་པའི་ཤེས་རབ་ཀྱིས།།
དུས་རྟག་གཡོ་མེད་གཟིགས་ཤིག་བླ་མས་མཁྱཻན།།

རྒྱལ་བསྟན་སྤྱི་དང་ཁྱེད་པར་གངས་ལྗོངས་སུ།།
སྐུ་གཟུགས་མཚན་དཔེའི་ལོང་ཚོ་གསར་ཚེས་ཏེ།།
ཉམས་ཐག་འགྲོ་བའི་ཚོགས་རྣམས་འདྲེན་སླད་དུ།།
ཡང་སྤྲུང་བློ་བཟང་དཔལ་ལྡན་མྱུར་བྱོན་སྨོན།།

བསྟན་པའི་བདག་པོ་སེར་བྱེས་མཁན་ཟུར་རིན་པོ་ཆེ་རྗེ་བཙུན་བློ་བཟང་དཔལ་ལྡན་མཆོག་གི་དངོས་སློབ་བྲག་བླ་འཇམ་དབྱངས་རྡོ་རྗེའམ་དྲ་མིང་"རྒྱང་མིག་"གིས་བླ་མའི་བཀའ་དྲིན་རྣམས་ཡིད་ལ་དྲན་བཞིན་སྤྱི་ལོ་༢༠༡༦ ཕྱི་ཟླ་ ༠༥ པའི་ཚེས་༠༦ ཉིན་སྐྱོ་ངལ་གྱི་ཚུལ་དུ་བྲིས་པའོ།

གདུང་སེལ་དབྱངས་ཀྱི་མཆོད་སྤྲིན།
 _____ལྕོག་མིག

བསོད་ནམས་ལེགས་བྱས་མཐའ་ཡས་གསེར་གྱི་སྙིང་པོ་རུ།།
དྲི་མེད་རྒྱལ་བའི་ལུང་རིགས་མི་གཡོ་སྤོ་མཐོ་བ།།
རྣམ་དག་བཤད་སྒྲུབ་གང་གཱ་འཛིན་མའི་རྒྱུན་བཏམས་པ།།
འགྲོ་བའི་དཔལ་གྱུར་དཔལ་ལྡན་བླ་མ་གཙུག་ན་རྒྱལ།།
དཔག་མེད་འགྲོ་བ་སྨག་རུམ་མུན་པའི་གཏིང་མཐའ་རུ།།
སྡུག་བསྔལ་གསུམ་གྱི་སྟོབས་ལྡན་གླང་པོས་བརྫི་བ་ན།།
བརྩེ་བའི་འོད་ཀྱི་ཟླ་གཞོན་འཛུམ་པ་ལྟ་བུ་ཡི།།
གཞན་དོན་མཛད་ལ་སྐོམ་པ་ཆུ་དང་འཕྲད་ཇི་བཞིན།།
མ་དག་གླིང་འདིར་བྱོན་ཞིང་ཐལ་མའི་རྟུལ་ཞུགས་བཟུང་།།
ཐུགས་རྒྱུད་འཇམ་པ་དྲི་མེད་ཆུ་ཤེལ་འོད་ཀྱི་ངོས།།
ཞི་བའི་འཛུམ་གྱི་འདབ་བརྒྱ་མེ་ཏོག་གྲོལ་བ་ན།།
བརླང་ཞིང་རྩུབ་པའི་ཁྲོ་བ་འཕྱུར་བའི་དགྲ་བོས་ཀྱང་།།
མཐོང་ན་འབར་བའི་དུག་གི་མེ་ལྕེ་རང་སར་དེངས།།
རང་བཞིན་སྤྲོས་མེད་ལྟ་བའི་རལ་གྲི་གདེངས་བ་ཡིས།།
འཁོར་བའི་མཚོ་ཆེན་སྲུབས་པའི་རླབས་ཀྱི་གཡོ་བ་རུ།།
གྲངས་མེད་བསོད་ནམས་ཚོགས་ཀྱི་གྲུ་ཆེན་ལ་ཞུགས་ཏེ།
འཇིགས་རུང་སྲིད་པའི་འཁོར་བའི་གནས་ལས་རབ་ཏུ་བརྒལ།
བྱམས་ཆུབ་སེམས་དང་སྙིང་རྗེའི་འོད་མདངས་འཕོྲ་བ་ཡིས།།
མགོན་མེད་འཁྱམ་པའི་འགྲོ་བའི་ཡིད་ལ་དཔལ་སྟེར་ཀྱང་།།
མི་སྲུན་སྐྱེས་བུ་བླུན་པོའི་གདོན་ཆེན་བདག་འཛིན་དེ།།
བསྲེགས་ཤིང་ཚིག་སྟེ་རྡུལ་ཙམ་ཡང་ནི་རྨང་མེད་བཏང་།།
ཟབ་ཅིང་ཕྲ་བའི་མཐའ་ཡས་ཆོས་ཀུན་གནས་ལུགས་ལ།།
ཐོས་བསམ་སྒོམ་པས་རྨོངས་དང་སོམ་ཉི་ཀུན་འཇོམས་པས།།
གྲགས་པས་འཁུར་བའི་རློམ་པས་འགྱིང་བའི་ཆེན་པོ་དག།
ཚིག་ལ་འཁྲིལ་ཅིང་རྩེན་པའི་བྱིས་པ་བཞིན་དུ་གྱུར།།
རང་རྒྱུད་སྨིན་ཞིང་དུལ་བའི་ཕ་རོལ་ཕྱིན་པ་བཅུའི།།
བློ་སྦྱོང་གནད་དུ་ངམ་གྱིས་གཞོལ་ཞིང་འཇུག་པ་ལ།།
བློ་སྟོབས་རི་རབ་ལྟར་བརྟན་བརླིང་བའི་འཕགས་པ་མཆོག།
དུག་གསུམ་འཆིང་བས་བསྡམས་པའི་ཕ་རོལ་སྐྱེས་བུའི་རྒྱུད།།
འདུལ་ལ་ཐབས་མཁས་བསྡུ་བའི་དངོས་པོ་བཞི་སྐྱོང་བ།།
གསལ་དང་འཇམ་ལ་སྙན་པའི་གསུང་གི་ཆ་ཤས་ཙམ།།
གཞན་དོན་མ་འདྲེས་རྡུལ་ཙམ་ཡོད་པའི་སྐབས་སྤང་ངོ་།།
མདོར་ན་འཕགས་པའི་ནོར་གྱིས་ཕྱུག་པའི་ཡོན་ཏན་མཛོད།།
ས་གཞི་དང་ནི་ནམ་མཁའ་ལྟ་བུའི་གཡོ་མེད་དུ།།
གཞན་གྱི་དོན་དུ་སྐད་ཅིག་ཙམ་ཡང་ལྷོད་མེད་པ།།
རྒྱལ་བ་དགྱེས་པའི་མཛད་བཟང་བ་དན་རབ་དཀར་བ།།
མཁས་པ་མགུ་བའི་ཡིད་ཀྱི་ནམ་མཁའི་ཀློང་དུ་འགུལ།།
རབ་འབྱམས་གཞུང་གི་ཟབ་མོའི་ལྟ་བ་རྟོགས་དཀའ་བར།།
དྲི་མེེད་ཐུགས་ཀྱི་དཀྱིལ་འཁོར་མཐིལ་དུ་ལྟེམ་མེར་འཁྱིལ།།
གཙང་བཀྲུའི་ཐུགས་ཀྱི་ཀུ་མུད་གཉེན་ལས་ཕྱུང་བ་ཡི།།
ཞི་དུལ་འོད་ཀྱི་ཟིལ་མ་དད་པའི་སྙིམ་པར་སིམ།།
རིས་མེད་འགྲོ་བ་འཁོར་བ་ལས་སྒྲོལ་སེམས་དཔའ་མཆོག།
རེ་ཞིག་རྟག་འཛིན་འཆིང་བས་བཅིངས་པའི་གདུལ་བྱ་རྣམས།།
མི་རྟག་རླུང་གི་གཡོ་བའི་འདུ་བྱེད་སྒྱུ་མའི་ངང་ཚུལ་དུ།།
བསྐུལ་བ་ཡང་ནི་འགྲོ་བའི་སླད་ལ་ཞིང་གཞན་དུ།།
སྣང་བའི་བདག་པོ་སེམས་དཔལ་ཁྱེད་ཉིད་གཤེགས་པ་བས།།
ཉི་མ་བྱེ་བ་འོད་ཀྱིས་དྲངས་པའི་སྣང་བ་ནུབ།།
དམ་པ་བཤུམ་པའི་སྤྱན་ཆབ་བྲུག་སྟེ་རྫིང་བུར་གྱུར།།
ཞི་བདེའི་བསིལ་བ་ཟླ་ཟེར་འབྱུང་བ་རྒྱུན་ཆད་ཅིང་།
འཁོར་བའི་རྒྱ་མཚོར་འོབས་སུ་ལྟུང་བའི་རྗེས་འབྲངས་དག།
ཕ་མ་བྲལ་བའི་བྱིས་པ་བཞིན་དུ་གདུང་བས་མནར།།
སྙིགས་མ་ལྔ་བདོའི་དུས་ཀྱི་ཡོ་ལང་བཙན་པོ་ན།།
སྡུག་བསྔལ་གསུམ་གྱིས་བག་མེད་མནར་བའི་འགྲོ་བའི་སྨན།།
བསྟན་པ་རིན་ཆེན་གདུང་འདེགས་ཀ་ཆེན་རེ་ཟུང་ཙམ།།
གྱུར་པའི་ངང་ཚུལ་དེས་ཀྱང་སེམས་དཔའ་ཆེན་པོ་ཁྱེད།།
སླར་ཡང་གངས་ལྗོངས་བསྟན་དང་འགྲོ་བའི་དཔལ་གྱུར་ཅིག།

         ཞེས་བདག་གི་རྗེ་བླ་མ་སེར་བྱེས་མཁན་ཟུར་བློ་བཟང་དཔལ་ལྡན་མཆོག་སྐུ་ཞི་བ་ཆོས་དབྱིངས་སུ་འཐིམ་ཚུལ་བསྟན་ནས་ཉིན་གཉིས་ཀྱི་རྗེས་སུ་གང་གི་སློབ་བུའི་གྲལ་མཐར་གནས་པ་ལྕོག་མིག་འབོད་པས་དད་པ་ཆེན་པོས་སྦྱར་བའོ།།

དྲན་གདུང་དབྱངས་ཀྱི་མཆོད་པ།
 _____བློ་བཟང་ཆོས་འཕེལ།
བློ་༵བཟང་གྲགས་སོཊ་དངོས་བརྒྱུད་བླ་མ་དང་། །
བ༵ཟང་སྤྱོད་སྤེལ་མཛད་རྗེ་བཙུན་ཏཱ་རེ་མ། །
ད༵པལ་ཆེན་པདྨ་དབང་གི་ལྷ་ཚོགས་སོགས། །
ལྡ༵ན་གྲོལ་བཤེས་གཉེན་བསྔག་ལ་མཐུན་རྐྱེན་སྩོལ། །

ཐུབ་པའི་བསྟན་པ་མིང་ཙམ་གྱུར་དུས་འདིར། །
གསུང་རབ་སྤྱི་དང་བློ་བཟང་རྒྱལ་བའི་བསྟན། །
རང་གིས་འཛིན་ཅིང་གཞན་ལ་སྤེལ་མཁས་པའི། །
བསྟན་འཛིན་བཤེས་གཉེན་ཆེན་པོ་སྙིང་ནས་དྲན། །

ཁྱེད་ཐུཊ་མཁྱེན་དཔྱོད་ནམ་མཁའ་ཡངས་པ་ལས། །
འཁྲུངས་པའི་ཟབ་རྒྱས་ཆོས་ཀྱི་ཆར་ཆེན་དག །
སྐལ་ལྡན་ཚོགས་ཀྱི་རྣ་བའི་ཞིང་ས་རུ། །
ཕབས་ཏེ་རྣམ་དག་ལམ་ལ་ཁྲིད་དེ་དྲན། །

མགོན་པོ་ཁྱེད་ཀྱི་ཐུགས་ཀྱི་གྲིབ་སོའི་འོག །
ལན་གཅིག་ངལ་གསོ་ཐོབ་པའི་སྐལ་ལྡན་ཚོཊ། །
གསུང་གི་བདུད་རྩིར་ངོམས་མེད་སྤྱད་གྱུར་ཏེ། །
ས་བཅུ་ལམ་ལྔའི་རྟོགས་པ་མྱུར་བགྲོད་ཤོག །

དཀར་ཕྱོཊ་ལྷ་ཚོཊ་རྣམས་ཀྱི་བྱིན་རླབས་དང་། །
དད་ལྡན་སློབ་བུའི་སྨོན་པའི་བདེན་སྟོབས་ཀྱིས། །
མགོན་པོ་ཉིད་དང་མཚུངས་པའི་ཡང་སྤྲུལ་ཞིག །
བདག་སོཊ་བསྟན་འགྲོའི་མགོན་དུ་མྱུར་བྱོན་ཤོག །

ཁྱེད་ཀྱི་ཡོན་ཏན་འོ་མའི་ཆུ་གཏེར་ལས། །
ཐིཊ་པ་ཙམ་ཞིག་བསྔཊ་པའི་རྣམ་དཀར་འདིས། །
སྲིད་གསུམ་གྲོང་དུ་ལུས་བའི་འགྲོ་བ་ཀུན། །
གཏན་བདེའི་གོ་འཕང་མཆོག་དེ་བརྙེས་གྱུར་ཅིག །

དམན་པ་བདག་ལ་བཀའ་དྲིན་ཤིན་ཏུ་ཆེ་བའི་སེར་བྱེས་མཁན་ཟུར་རིན་པོ་ཆེ་༸རྗེ་བཙུན་བློ་བཟང་དཔལ་ལྡན་མཆོག་དགོངས་པ་གཞན་དུ་གཤེགས་རྗེས་སུ་གུས་སློབ་ཟུར་རྙིང་གོང་མ་སེར་ཏྲེ་བློ་བཟང་ཆོས་འཕེལ་གྱིས་གདུང་ཤུགས་དྲག་པོས་2016/5/5 ཉིན་བྲིས།།

གསོལ་འདེབས་དབྱངས་ཀྱི་མཆོད་པ།
 _____ཚེ་རིང་ཕུན་ཚོགས།
སྐལ་པ་སྤྱོད་དེ་མཛད་པའི་ཆ་རེར་ཡང་།།
བསྟན་པའི་ཁུར་བཞེས་སྙིང་རྗེ་གཞན་དབང་གིས།།
འགྲོ་ལ་གཟིགས་པ་མ་ཆུང་ཐབས་མཁས་པའི།།
རྗེ་བཙུན་བླ་མ་དམ་པ་གང་དེར་འདུད།།

བློ་གྲོས་ཡོངས་པའི་མདོ་བརྒྱུད་མཁའ་གཤེགས་མ།།
དཔྱད་གསུམ་དག་པའི་བསྟན་པའི་སྲོལ་འཛིན་མཆོག།
སྙིགས་མའི་དུས་འདིར་བསྟན་པའི་སྒྲོན་མེ་ཁྱེད།། 
གཞན་དུ་ཕེབས་པའི་སློབ་ཚོགས་བསོད་ནམས་དམན།།

བླ་མ་ཞིང་གཞན་ཕེབས་པའི་གཏམ་ངན་དེ།།
བདག་ཅག་སློབ་བུ་རྣམས་ཀྱི་ཐོས་ཙམ་ནས།།
ཤུལ་དུ་ལུས་པའི་སྤྲང་འཁྱམ་སློབ་བུའི་ཚོགས།། 
སྡུག་གི་མུན་པས་ལུས་སེམས་སྐྱོ་བས་ལྕི།།

བླ་མ་ཁྱེད་ནི་དམ་ཚིག་གཙང་དང་གཅིག།། 
མདོ་བརྒྱུད་གསུངས་རབ་མཁའ་ལ་ཐོག་མེད་གཉིས།། 
ཁྲོ་བ་མི་མངའ་བཟོད་པའི་སྟོབས་བརྟན་གསུམ།།
བསམ་ཞིང་བསམ་ན་དད་པ་ལྷག་ཏུ་འཕེལ།། 

བདག་ཅག་སློབ་བུ་རྣམས་ཀྱིས་མགོན་ཁྱེད་ཀྱི།།
གསེར་ཞལ་མཇལ་བའི་སྐལ་བཟང་བྲལ་ན་ཡང་།།
ནམ་ཞིག་འདི་ནས་ཕྱི་འཕོས་གྱུར་མ་ཐག།། 
དམ་པ་ཁྱེད་ཀྱིས་རྗེ་བཟུང་ལམ་བསྟན་ཤོག།། 

གསེར་གྱི་རི་བོ་ལས་ལྷག་བླ་མ་གང་།།
རེ་ཞིག་འཇིག་རྟེན་འདི་ནས་ཟིམ་གྱུར་ཀྱང་།།
འགྲོ་ལ་བརྩེ་བས་དབང་གིས་ཡང་སྤྲུལ་ཞིག།།
མ་ཐོགས་མྱུར་བ་མྱུར་དུ་ཕེབས་པ་གསོལ།།

སེར་བྱེས་མཁན་ཟུར་རིན་པོ་ཆེ་རྗེ་བཙུན་བློ་བཟང་དཔལ་ལྡན་མཆོག་དགོངས་པ་གཞན་དུ་གཤེགས་རྗེས་སུ་གུས་སློབ་དབུ་གསར་གོང་མ་འཛིན་གྲྭ་ཆོས་མེད་སྤྲང་འཁྱམ་པ་ཚེ་རིང་ཕུན་ཚོགས་ནས་ཡིད་སྐྱོར་བ་དང་བཅས་ཏེ་བྲིས།།

སེར་བྱེས་མཁན་ཟུར་རྗེ་བཙུན་བློ་བཟང་དཔལ་ལྡན་མཆོག་དགོངས་པ་གཞན་དུ་གཤེགས་པར་རྗེས་དྲན་ཞུ།

 _____སེར་ཤུལ་རིན་ཆེན་དོན་གྲུབ།

མཁྱེན་པའི་རྩལ་གྱིས་གཞུང་ཆེན་སྒོ་གླེགས་འབྱེད།།
བཟོད་པའི་མཐུ་ཡིས་ཁྲོ་བའི་གཉེན་ལ་བཞེངས།།
བསྟན་པའི་མཛེས་རྒྱན་བློ་བཟང་དཔལ་གྱིས་ཕྱུག།
ཚུལ་ལྡན་དགེ་བའི་བཤེས་ཁྱེད་དྲན་པར་འོས།།

སེར་ཤུལ་རིན་ཆེན་དོན་གྲུབ་ཀྱིས་དམ་པ་གང་གི་དགོངས་རྫོགས་ལ་གུས་པས་ཕུལ།། ༢༠༡༦/༥/༣/ ལ།

གཤེགས་ཤུལ་ན་སྨྲེ་ངག་འཁྱིལ་འདུག
 _____སྲོང་བཙན།
མི་སྙན་གཏམ་གྱི་ཐིགས་པ་ས་ལ་བབ།།
སྙིང་རུས་གུས་ཆག་ཐེབས་པའི་གཤེད་དུ་སོང་།
ས་ཆེན་སྡུག་གིས་གཡོས་པའི་འགྲམ་ངོགས་ན།།
མིག་ཆུ་འབབ་ལ་ཁད་ཀྱི་སློབ་མས་འཚངས།།
མཇལ་ན་ཡིད་སྲིན་གླང་པོ་རབ་ཏུ་དུལ།།
ཐོས་ན་རང་རྒྱུད་གྱོང་པོ་མཉེན་དུ་གྱུར།།
སྐྱིད་སྡུག་ཅི་བྱུང་རང་བློ་གཏད་ས་ཞིག།།
ཡོད་སྙམ་སེམས་ཚོར་དྲོན་མོ་འཁྱགས་ལ་འབྱར།།
རྡོག་སྣེ་ས་མཐར་སྲིངས་བའི་ནམ་ཟླ་ནས།།
ཚ་དྲོད་མེ་སྤུངས་འབར་བས་ལོ་ཟླ་འདེད།།
མི་ཚེ་དཀའ་བ་སྤྱོད་ན་སྐྱོ་གྱུར་རུང་།།
མགོན་ཁྱེད་རླུང་བུའི་ཚབ་ཏུ་ཡོད་དུས་སྐྱིད།།
སྙིང་ལ་གདོན་གྱིས་གཡབ་མོ་འཕྱོ་བའི་ཚེ།།
གྲོགས་ལ་སྡིག་གིས་འཁྲུལ་སྣང་བཏབ་པའི་དུས།།
ཅི་བསམ་དྲན་དུ་མེད་པའི་ལམ་སྣེ་ནས།
མགོན་ཁྱེད་ཉི་མ་བཞིན་དུ་རོལ་དུས་སྐྱིད།།
རི་བོ་ཞིག་ཅིང་ཆུ་གཏེར་འཁྲུགས་ན་ཡང་།།
ས་གཞི་གས་ལ་རྒྱ་མཚོ་འཕྱུར་མོད་རུང་།།
སེམས་ཀྱི་ཁེན་ས་མི་འགྱུར་རྡོ་རྗེ་ཞིག།
ཡོད་སྙམ་མི་འཇིགས་པ་སྤོབས་པ་ཡོད་མྱོང་ཨང་།
བུ་སློབ་དག་གི་ངོ་གདོང་སྐྱོ་བས་མནན།།
སྐད་འདར་ཚིག་འཁྱོར་མགྲིན་པ་བརྣང་བཞིན་རེངས།
ཅི་བྱེད་འདི་བཀོལ་མེད་པའི་རྣམ་འགྱུར་དེ།། 
མཐོང་དུས་སྙིང་ལ་གས་སྲུབས་རེ་རེ་ཤོར།།
ལྟོས་བཅས་རང་གཟུགས་ཞི་བའི་དབྱིངས་སུ་བསྡུས།།
སྣང་བ་སྒྱུ་མ་ལྟར་དེ་རང་འགག་སོང་།།
ཅི་ཡང་མེད་ཅིང་གང་ཡང་མེད་གྱུར་བ།།
བུ་སློབ་ཚོགས་ཀྱིས་ཀྱེ་མ་ཀྱེ་ཧུ་འབོད།།
མཁའ་སྤྱོད་དག་པའི་ཞིང་ནས་དར་སྣེ་སྲིངས།།
ནུབ་ཕྱོགས་བདེ་ལྡན་དཔལ་ལས་དབྱངས་སྙན་འཁྲོལ།།
མཐའ་ཀླས་རབ་འབྱམས་རྒྱལ་བས་སྔོན་བསུ་བ།།
མགོན་ཁྱེད་གང་ན་ཕེབས་སམ་གང་དུ་བཞུགས།།
དད་པའི་ཟུང་ཐག་དགུ་སྒྲུལ་སྙིང་ལ་མདུད།།
གུས་པའི་ཕྱག་རྒྱ་མ་ཞིག་བྲང་ན་འདེབས།།
བཀའ་གསུང་བྱིན་ཅན་རུས་རྐང་ཚིགས་ལ་བརྐོས།།
ནམ་ཡང་བརྗེད་པ་མེད་དེ་ཁྱེད་ཉིད་ལགས།།
བྱམས་པའི་ངག་ནས་གསེར་གྱི་ཐིགས་པ་ལྷུང་།།
ཟབ་གསལ་རྒྱལ་བའི་ཉིད་ཁུ་གདམས་པར་མཛད།།
བརྩེ་བའི་ཞལ་ནས་འཛུམ་གྱི་མེ་ཏོག་འཐོར།།
སློབ་བུའི་ཚོགས་ཀྱི་ཡིད་སེམས་བདེ་ལ་བཀོད།།
གྲོགས་མེད་ཁེར་མ་སྐྱུར་བའི་སློབ་བུའི་ཚོགས།།
རྒྱུས་མེད་འཕྲང་ལམ་དེད་ནས་འོ་དོད་འབོད།།
མགོན་ཁྱེད་དག་པས་ཞིང་དུ་མ་བཞུགས་པར།།
ད་ལྟ་ཉིད་དུ་བུ་སློབ་ཚོགས་ལ་གཟིགས།།

མཁན་ཟུར་རིན་པོ་ཆེ་དགོངས་པ་རྫོགས་པར་ཕངས་སེམས་དང་སྐྱོ་བ་སྐྱེ་བཞིན། ལྷག་པར་དུ་སློབ་མ་དག་ཅི་བྱེད་འདི་བྱ་མེད་པའི་གནས་སུ་གྱར་བ་མཐོང་དུས་ཡིད་སྐྱོ་བས་ཁེངས་བཞིན་སྨྲེ་སྔགས་གྱི་ཚུལ་དུ་ཤར་མར་བྲིས་སོ།།

 
༺ དཔར་སྐྲུན་བདག་དབང་། Copyright © 2015 སྲོང་བཙན་དྲ་བ། དྲ་ཚིགས་བཟོ་མཁན། བསོད་ནམས་ཟླ་བ།

Powered by Themes24x7